IELEMIA 12 - Tuvalu Revised Bible

Ielemia ko Fesili ki te Aliki

1“Te Aliki, kafai e finau taua i te mataupu tenei e avake ne au.

A te ikuga e tonu eiloa koe.

Kae e ui eiloa i tena, e fia fesili atu eiloa au e uiga ki te fakamasinoga tonu.

Ai a e maumea ei a tino amio masei?

Ai a e taunu sale ei a fakamoemoega o tino se fakamaoni?

2Ne toki ne koe latou, mau ei olotou aka ki te laukele;

Ne ola ake, fua mai ei olotou fuataga.

E faipati faeloa latou ki mea lei e uiga ki a koe,

Kae tela la, e se fia saga atu eiloa ki a koe.

3Ka ko koe, e te Aliki, e iloa ne koe au;

E lavea ne koe aku mea e fai,

E lavea foki ne koe a toku alofa ki a koe.

Toso atu a tino amio masei konei pela me ne mamoe kola ka ave o ta;

Leoleo fakalei latou ke oko ki te taimi e ta ei latou.

4E gata afea te malō o te motou laukele?

E gata afea te mage o mouku i fatoaga?

A manu vae fa mo manu eva ka mate ona ko uiga masei o omotou tino,

Ko tino kola e fai sale penei, ‘E se lavea ne te Atua a mea a tatou e fai.”’

5Muna a te Aliki,

“Ielemia, kafai ko se maua ne koe o fakatautele mo tagata,

E mafai la pefea ne koe o fakatautele mo solofanua?

Kafai se mafai ne koe o tu fakalei i te fenua ateatea,

Ka mafai la pefea ne koe o tu fakalei

I te vao i tafa o te Iolitana?

6Ke oko foki eiloa ki ou taina, ko tino tonu i tou kaiga,

Ne fakatogafiti foki ne latou a koe;

Ko kau fakatasi latou o taua atu ki a koe.

Sa talitonu ki a latou, e ui eiloa e faipati fakalei atu.”

Ko te Fanoanoa o te Atua ona ko Tena Fenua

7Muna a te Aliki,

“Ko oti ne tiakina ne au a Isalaelu;

Ko se manako au ki toku malo filifilia.

Ne tuku atu ne au a toku fenua pele i te loto ki te malosi o olotou fili.

8A toku fenua filifilia ko fulitua mai ki a au;

Ko gulu mai latou ki a au

E pela me ne leona i te vao,

Tela la, ko se fiafia lele eiloa au ki a latou.

9A toku fenua filifilia ko pela me se manu eva

Tela e ta ne manu eva ko oka mai i feitu katoa.

Kalaga atu ki manu vao

Ke o'mai o fakatasi mai ki te kaiga!

10E tokouke a takitaki o fenua fakaatea ne fakamasei ne latou a taku togavine;

Ne lakalaka ne latou aku fatoaga;

Ne fuli ne latou toku fenua gali ke liu toafa.

11Ne fai ne latou ke liu vao;

Ko takato se aoga i oku mua.

A te fenua katoa ko liu toafa,

Kae seai eiloa se tino e fia saga atu ki ei.

12A tagata ne ui mai i toafa maluga,

O o'mai o taua kae faomea.

Ne uga ne au te taua ke fakamasei ei te fenua katoa;

E seai eiloa se tino e mafai o ola i te filemu.

13A tino o toku fenua e toki ne latou a saito,

Kae e maua fua ne latou ne mouku;

Ne galue malosi, kae seai se lotou mea e maua mai i ei.

Ona ko toku kaitaua fakamataku ko ala ei o se aoga olotou lakau kaina.”

Ko te Feagaiga a te Aliki ki Tuakoi o Isalaelu

14Muna a te Aliki, “E isi ne aku muna a fia fai ki tuakoi o Isalaelu kola ne fakamasei ne latou a te fenua tenei ne tuku ne au mo toku fenua ko Isalaelu. Ka ave keatea ne au a tino masei kona mai i olotou fenua e pela me se lakau ne unu, kae ka fakasao ne au a Iuta mai i a latou.

15Kafai ko oti ne ave keatea ne au a latou, kae ka toe alofa au ki a latou; ka toe fakafoki mai ne au a malo takitasi ki olotou fenua.

16Kafai e talia ne latou a te talitonuga a toku fenua mo olotou loto katoa, kae tauto foki latou penei, ‘A te Atua e ola’ — e pela mo te akoakoga ne latou a tino o toku fenua ke tauto i te igoa o Paala — tena la, ka fai foki latou mo oku tino kae ka maumea latou.

17Kae kafai se malo e se fakalogo, ka unu ne au kae ta fakamasei. Ko au, te Aliki, tena ne faipati atu.”