ESEKIELU 13 - Tuvalu Revised Bible

Ko Muna Fakapelofeta ki Pelofeta Tagata 'Loi

1A te Aliki ne faipati mai ki a au,

2ana muna, “Te tagata ola, muna toka atu a pelofeta Isalaelu kola e fatu eiloa ne latou olotou muna fakapelofeta. Fai ki a latou ke fakalogo mai ki te muna a te Aliki.”

3Konei a muna a te Aliki Sili: “A pelofeta valea konei ko malaia! E faite olotou fakaasiga kae fai pela i a latou ko ulufia ne te agaga o te Atua.

4Tino Isalaelu, a au pelofeta ko se aoga pela eiloa me ne alope kola e nofo i koga masei o se fa'kai.

5E se leoleo ne latou a koga o te pui kola ne maofa, e se toe faite aka foki ne latou, tela la, a Isalaelu e se mafai o 'pulu ke malu manafai e oko mai te taua i te aso o te Aliki.

6A olotou fakaasiga e se tonu, mo valoaga a latou ne loi katoa eiloa. E fai ake latou pela me ko taku fekau tela e folafola ne latou, kae e seki uga atu eiloa ne au latou; kae e fakamoemoe ke taunu olotou muna ne fai!

7Konei aku muna ki a latou: A fakaasiga kona e lavea ne koutou e se tonu, mo valoaga kona e fai ne koutou ne loi katoa. E fai ake koutou pela me ko aku muna, ka ko au e seki faipati atu eiloa ki a koutou!”

8Tela la, muna a te Aliki Sili ki a latou, “A otou muna e loi, mo otou fakaasiga e se tonu. Au e takalialia i a koutou.

9Ka fakasala nei ne au koutou pelofeta kona e fai fakaasiga loi, mo valoaga se tonu. Ka se nofo koutou i te koga e maopoopo ei toku fenua o fakaiku a mataupu; a otou igoa ka se aofia i te fakasologa o tino Isalaelu; ka se toe foki eiloa koutou ki te otou fenua. Tena la, ka iloa ei ne koutou i a au ko te Aliki Sili.

10 Iele 6.14; 8.11 “A pelofeta ne taki'se ne latou toku fenua, o fai pela i mea katoa e lei katoa. Kae tela la, e se lei mea katoa! Ne faite aka ne toku fenua a te pui ki fatu kae ne o'mai a pelofeta o vali ki te lase.

11Fai ki pelofeta kona i te lotou pui e maofa. Ka fakato ne au se vaiua 'lotu eiloa. A te vaiua fatu ka 'to ki ei, kae ka agi mai foki ki ei te matagi malosi eiloa.

12Ka maofa ki lalo a te pui, kae ka o'mai a tino o fesili mai ki a koe me se a te aoga o te lase.”

13Konei a muna a te Aliki Sili: “Ona ko toku kaitaua, tena ka fakaagi mai se ne au se matagi malosi, kae faka'to se vaiua 'lotu eiloa, mo te vaiua fatu, ke fakamasei ei a te pui.

14Au e mafaufau o ofa ki lalo a te pui tena ne vali ne latou ki te lase, o ofa likiliki, ke takato fakasau a fatu o te fakavae. Ka maofa ki lalo, kae ka mate katoa koutou i ei. Tena la, ka iloa ei ne koutou i a au ko te Aliki.

15“A te pui, mo latou kola ne vali ne latou ki te lase, ka lagona ne latou a te malosi o toku kaitaua. Tena la, ko fakailoa atu ei ne au i te pui ko seai, pena foki mo latou kola ne vali ne latou ki te lase —

16ko pelofeta kola ne fai ki tino i Ielusalema i mea katoa e lei, kae tela la, e se lei!” Ko te Aliki Sili tena ne faipati atu.

Ko Muna Fakapelofeta ki Pelofeta Fafine

17Muna a te Aliki, “Te tagata ola, kilo atu nei ki fafine i te otou fenua kona e fai olotou valoaga. Muna toka atu latou

18kae fai atu a muna konei a te Aliki Sili ki a latou:

“Koutou fafine ko malaia. E sui ne koutou a taulima fakataulaitu mo tino katoa, pela foki mo solosolo fakataulaitu ke sai i ulu o tino, ko te mea ke isi te mana o latou o pule a olaga o nisi tino. A koutou e manako ke maua ne koutou te mana o fakaola kae tamate a tino o toku fenua, kae ke fakaaoga ne koutou mo te lei o koutou.

19E fakamasiasi ne koutou au i mua o toku fenua, ko te mea fua ke maua ne koutou ne mu kalite mo ne nai falaoa fakafete. E tamate ne koutou a tino kola e se tau o mate, kae tausi ne koutou ke ola a tino kola e se tau o ola. Tena la, ne fakaloiloi ne koutou toku fenua, kae ne talitonu atu ki a koutou.”

20Konei a muna a te Aliki Sili: “Au e takalialia i taulima kola e fakaaoga ne koutou o taumafai o pule te ola mo te mate. Ka futi keatea ne au a taulima mai i otou lima kae fakasaoloto a tino kola ei lalo o te otou pulega.

21Ka sae keatea ne au otou solosolo kae fakasao toku fenua mai i te otou malosi ki te se gata mai. Tena la, ka iloa ei ne koutou i a au ko te Aliki.

22“E fakalotovaivai ne koutou a tino amio lei ki otou tala loi, ko tino kona e se manako au ke fakamae ne se tino. E taofi ne koutou a tino amio masei ke se tiaki olotou uiga masei ke sao latou.

23Tela la, a otou fakaasiga se tonu mo valoaga loi ko oti atu. Ko fakasao nei ne au toku fenua mai i te otou malosi, ko te mea ke iloa ne koutou i a au ko te Aliki.”