LUTA 1 - Tuvalu Revised Bible

Elimeleka mo Tena Kaiga ko Malaga Atu ki Moapi

1-2I aso taumua eiloa, kae siki ai se tupu o Isalaelu, ne poko ei te oge i te fenua. E isi se tagata e igoa ki a Elimeleka mai te pui kaiga o Efalata, tela e nofo i Peteleema i Iuta ne olo mo tena avaga ko Naomi mo la tamaliki tagata e tokolua ko Malona mo Kiliona o nofo i ne mu aso i te fenua ko Moapi. I te taimi ne nofo ei a latou i kona,

3ne mate ei a Elimeleka, kae nofo ei a Naomi mo ana tamaliki tagata tokolua,

4kola ne avaga ki tamafine Moapi, ko Olepa mo Luta. I te sefulu tausaga ki tua ifo

5ne 'mate foki ei a Malona mo Kiliona, kae 'toe mai fua ei a Naomi, seai se avaga, seai foki se fanau.

Ko 'Foki atu a Naomi mo Luta Ki Peteleema

6I se taimi fakamuli ifo, ne logo a Naomi me ko oti ne fakamanuia ne te Aliki a tena fenua me ko toe uke a meakai i ei; tena ne fakatoka ei a ia mo avaga a ana tama tagata o olo atu keatea mai Moapi.

7Ne olo tasi latou o foki ki Iuta, kae i te ala

8ne faipati atu ei a ia ki a laua penei, “Foki ki ou lua kaiga o tausi ou lua matua. Ke alofa atu te Aliki ki a koulua e pela eiloa mo te lua alofa ki a au mo aku tama tagata.

9Ke fai foki ne te Aliki se auala e toe maua ei ne au lua avaga.”

Ne sogi atu a Naomi kae fakatofa atu ki a laua, tena ne kamata ei laua o 'tagi,

10kae fai atu ki a Naomi penei, “ikai! Tatou e olo tasi eiloa ki tou fenua.”

11Ne tali mai a Naomi ki a laua, “Aku tama, e 'tau mo koulua o 'foki. Ai a e manako ei koulua o olo tasi mo au? E mafaufau a koulua me e toe mafai o maua ne aku tama tagata ke avaga mo koulua?

12Toe 'foki ki ou lua kaiga, me i a au ko to matua, ko se 'tau o toe avaga. E tusa eiloa me toe avaga au ma po nei ke maua ne aku tama tagata,

13e fakatali eiloa koulua ke matua laua? E a, kafai a te mea tenei se vaoga ke se avaga koulua ki nisi tino ake? Ikai, aku tama, e iloa ne koulua me faigata a te feitu tena. A te Aliki ko fulitua mai ki a au, kae ko oko eiloa toku alofa mo koulua.”

14Ne toe 'tagi foki a latou, tela ne sogi fakamavae atu a Olepa ki te matua o tena avaga kae foki atu ki tena kaiga, ka ko Luta ne 'piki atu eiloa ki a ia.

15Ne faipati atu ei a Naomi ki a ia, “Luta, ko oti ne foki tou taina ki tena fenua mo tena atua. E 'tau foki mo koe o tautali atu i a ia.”

16Ne tali atu a Luta, “Sa finau mai ke tiakina koe ne au! Au e loto ke olo tasi taua. Me i so se koga e fano a koe ki ei, e fano au ki ei; i so se koga e nofo a koe i ei, au e nofo foki i ei. A tou fenua kafai mo oku fenua, a tou Atua kafai foki mo oku Atua.

17So se koga e mate ei a koe, e mate foki au i ei, e tanu foki au i ei. Ke i luga i au te fakasalaga a te Aliki manafai e tuku tiakina ne au a koe, so se mea vagana ko te mate fua e mavae ei au mo koe!”

18Ne se toe faipati a Naomi i te mea ne iloa ne ia a te loto 'nau o Luta ke olo tasi laua.

19Ne ma'laga atu a laua, ke oko atu eiloa ki Peteleema. Ite olo atuga a laua, a tino i te fa'kai lasi ko Peteleema ne logoā, kae ko fafine i kona ne fesili ake penei, “Ko Naomi tonu eiloa tenei?”

20Ne tali atu Naomi ki a latou penei, “Sa fakaigoa au ki a Naomi, kae fakaigoa mai au ki a Mala, i te mea ko fonu toku ola i puapuaga mai te Atua Malosi.

21I te aso ne tiakina ei ne au a te fenua tenei, au ne maumea; kae nei ko toe fakafoki mai au ne te Aliki e aunoa mo se mea e tasi. Ai a la e tapa mai ei koutou i a au ko Naomi, kae se iloa ne koutou me i te Aliki Malosi ne fakasala ne ia au ki puapuaga?”

22Tenei te tala o te foki maiga a Naomi mai Moapi fakatasi mo Luta te tamafine Moapi, tela ko te avaga a tena tama. I te taimi ne oko mai ei a laua ki Peteleema, kae ko fatoa kamata te katiga o kalite matua.