EPELU Fakatomuaga - Tuvalu Revised Bible
Fakatomuaga Te Tusi ki tino Epelu ne tusi ki se potukau Kelisiano kola, ne fakafeagai mo te fanakega o uiga 'teke ki a latou, tela se tulaga fakamataku ki, me ko mafai ei ne latou o tiakina te talitonuga faka-kelisiano. A te Tusitala ne fakamalosi ne ia latou, ko te olotou fakatuanaki ke tulaga muamua o fakasi me i a Iesu Keliso, ko te fakapatonuga mo te toe fakaasiga fakaoti a te Atua. I tena fakamatalaga ne fakataua ne ia a manatu e tolu: (1) A Iesu ko te Tama a te Atua ki te se gata mai, tela ne tauloto ne ia a te tonuga o te fakalogo ki te Tamana, e auala i te puapuaga tela ne kufaki ne ia. Ona ko ia ko te Tama a te Atua, a Iesu e maluga atu ki pelofeta o te Feagaiga Mua, ki agelu, e pela foki mo Mose. (2) A Iesu ko oti ne fakailoa mai ne te Atua, i a ia se faitaulaga ki te se gata mai, tela e sili atu i faitaulaga katoa o te Feagaiga Mua. (3) Ne auala mai i a Iesu a te fakaolaga o tino talitonu mai i te agasala, te mataku, mo te mate; kae ko Iesu, ko te Faitaulaga Maluga, ne fakatoka ne i a te fakaolataga mautinoa, tela ne fakafoliga mai muamua ne faifaiga faka te lotu, i te faiga o taulaga ki manu i te talitonuga Epelu.Mai i fakaasiga fakatautau o ata o tino fakatuanaki i tala fakasolopito o Isalaelu i te (mataupu 11), a te Tusitala ne tusi ne ia se fakatagi, ki tino faitau ke tumau i te fakatuanaki, kae i te mataupu e 12 a ia ne fakamolemole ki tino faitau, ke fakatumau eiloa te olotou fakamaoni ki te gataga, kae ke tumau te kilo ki a Iesu, kae kufaki sose puapuaga mo fakasauaga kola e oko atu ki a latou. Ne fakaoti te tusi ki pati fautua mo fakamasauaga.Ko Fakasologa o MataupuFakatomuaga: A Keliso ko te fakakatoatoaga o fakaasiga a te Atua (1.1-3)Keliso e sili atu i luga o agelu (1.4—2.18)Keliso e sili atu i luga o Mose mo Iosua (3.1—4.13)Te sili o te tulaga fakafaitaulaga a Keliso (4.14—7.28)Te sili o te feagaiga a Keliso (8.1—9.22)Te sili o te taulaga o Keliso (9.23—10.39)Te taua o te fakatuanaki (11.1—12.29)Fakafiafia te Atua (13.1-19)Talo Fakaoti (13.20-21)Muna fakaoti (13.22-25)
