1“Mai i kona, ne malaga atu tatou ki te fenua o Pasana, kae ne vau a te Tupu ko Oko mo tena kautau o taua mai ki a tatou i tafa o te fa'kai o Etelei.
2Kae ne fai mai te Aliki ki au penei, ‘Sa mataku ki a Oko. Ka tuku atu ne au a ia mo tena kau mo tena fenua ki ou lima. Ke fai atu foki ne koe ki a ia a te mea tela ne fai ne koe ki a Sekono te tupu o Amoli tela e nofo i Hesepono.’
3“Tena la, ne tuku mai foki ne te Aliki a te Tupu ko Oko mo tena fenua ke fakatakavale ne tatou, tena ne ta valevale ei ne tatou.
4I te taimi foki tena, ne fakatakavale katoa ne tatou ona fa'kai — e seai eiloa se fa'kai e seki puke ne tatou. A te katoaga e tusa mo te onosefulu fa'kai, ko te kogā fenua katoa eiloa o Alikopa, te koga e pule ei a te Tupu o Pasana ko Oko.
5A fa'kai katoa konei e isi ne olotou 'pui maluga, mo mataloa o te fa'kai, mo fiti e loka ei a mataloa kona, kae e uke foki a fa'kai foliki e seai ne pui o latou.
6Ne ofa fakamasei ne latou a fa'kai katoa kona, kae tamate a tagata katoa, mo fafine mo tamaliki, e pela eiloa mo te mea ne fai ne tatou ki fa'kai o Sekono, te Tupu i Hesepono.
7Ne puke ne tatou a pulumakau kae fao a mea taua i fa'kai kona.
8“I te taimi tena, ne puke ne tatou mai i tupu o Amoli kona e tokolua a te fenua i te feitu ki te saegala o te Vaitafe o Iolitana, mai i te Vaitafe o Alinona ke oko ki te Mauga o Helemoni.
9A te Mauga o Helemoni e fakaigoa ne tino Saitonu ko Siliona, kae e fakaigoa ne tino Amoli ko Senila.
10Ne puke katoa ne tatou te kogā fenua o te Tupu ko Oko o Pasana: ko fa'kai i te kogā koga laugatasi, ko te kogā laukele o Kileata mo Pasana, ke oko atu eiloa ki fa'kai o Saleka mo Etelei i te saegala.”
11A te Tupu ko Oko ko te toe tino fakaoti eiloa i te gafa o te kau Lefaima. A te pusa ne fao ei tena foitino i te matega, e faite ki fatu, e tusa mo te ono futu te lauefa kae tai maua te sefulufa futu te loa i te fua faka te malo. Tenei eiloa koi lavea atu i te fa'kai o te kau Amoni ko Lappa.
Ko Matakaiga i te Saegala o te Iolitana(Nume 32.1-42)12“I te taimi ko puke ei ne tatou a te fenua tena, ne tuku atu ei ne au ki matakaiga o Leupena mo Kato a te kogā laukele i te feitu ki matu o Aloela, i tafa o te Vaitafe o Alinona, mo te feitu e tasi o te fenua mauga o Kileata fakatasi mo fa'kai i ei.
13Ne tuku foki ne au ki te afā o te matakaiga o Manase a te toega o Kileata mo te laukele katoa o Pasana, te koga ne pule ei a Oko, te koga tena ko te kogā laukele katoa o Alikopa.”
A te fenua o Pasana ko te fenua o te kau Lefaima.
14A Iaila, mai i te matakaiga o Manase, ne puke ne ia te kogā laukele kātoa o Alikopa, tela ko Pasana, ke oko atu eiloa ki te tuakoi o Kesula mo Maaka. Ne fakaigoa ne ia a fa'kai kona ki tena igoa, kae konei eiloa koi fakaigoa ko fa'kai o Iaila.
15“Ne tuku ne au a Kileata ki te kaukaiga o Makila ko te matakaiga o Manase.
16Ka ko matakaiga o Leupena mo Kato, ne tuku ne au ki ei a te koga laukele mai Kileata ke oko atu eiloa ki te Vaitafe o Alinona. A te kogaloto o te Vaitafe tena ko te tuakoi o latou ki saute, ka ko te tuakoi ki matu ko te Vaitafe o Iapoka, ko te sua vaega o te vaitafe tena ko te tuakoi o Amoni.
17A te koga laukele o latou ki te feitu ki te togala, e oko atu eiloa ki te Vaitafe o Iolitana, mai te Vai o Kalilaia i matu ke oko ifo eiloa ki te Tai Mate i saute, kae oko atu foki eiloa ki te tafito o te Mauga o Peseka i te saegala.
18 Iosu 1.12-15 “I te taimi tena, ne tuku atu ne au a fakatonuga konei ki a latou: ‘A te Aliki te 'tou Atua ko oti ne avatu ne ia ki a koutou a te fenua tenei i te feitu ki te saegala o te Iolitana ke nofo koutou i ei. Fakatoka nei otou kautau ke olo ki te sua feitu o te Iolitana, i mua o nisi matakaiga o Isalaelu, o fesoasoani ki te pukega o te fenua tena i ei mo latou.
19Ko otou avaga fua mo tamaliki mo pulumakau, e iloa ne au me uke otou pulumakau, e nofo i fa'kai konei ko oti ne tuku atu mo koutou.
20Ke fesoasoani koutou ki otou taina Isalaelu i te pukega o te fenua tenei ne tuku mai ne te Aliki mo latou i te feitu ki te togala o te Iolitana, ke oko ki te taimi e fakanofo ei latou mo te filemu ne te Aliki i te fenua tena, e penei mo te mea ko oti ne fai ne ia mo koutou. Kafai ko toka te feitu tena, ko foki mai ei koutou ki te fenua tenei ko oti ne tuku atu ne au mo koutou.’
21“Tena, kae fakatonu atu au ki a Iosua penei: ‘Ko oti ne lavea ne koe a te mea ne fai ne te Aliki te otou Atua ki a Sekono mo Oko e pena foki eiloa te mea ka fai ne ia ki tino katoa i te fenua tena ka puke ne koutou.
22Sa mataku i a latou, i te Aliki te otou Atua ka taua mo koutou.’
Mose ko se Talia ke Ulu ki Loto i Kanana23 Nume 27.12-14; Teu 32.48-52 “I te taimi tena, ne talo atu au ki te Aliki penei,
24‘Te Aliki Maluga, e iloa ne au me ko oti ne fakaasi mai ne koe ki a au, ko te kamataga fua o mea gali kae fakaofoofogia kola ka fai ne koe mai mua nei. E seai se atua i te lagi io me i lalo i te lalolagi e mafai ne ia o fai a mea fakaofoofogia kona ne fai ne koe.’
25Te Aliki, talia mai ke fanatu au ki te sua feitu o te Vaitafe o Iolitana, ke lavea ne au a te fenua laukele ola tena i ei, te fenua maugā gali mo Mauga o Lepanona.’
26“Mai i uiga se lei o koutou tino Isalaelu, tena ne kaitaua mai ei a te Aliki ki a au, kae se fia fakalogo mai ki a au. Muna a ia ki a au penei, ‘Na lava i kona! Sa toe taku mai te mea tena!
27Fano ki te ulu o te Mauga o Peseka kae kilo ou mata ki matu mo saute, pela foki ki te saegala mo te togala. Kilokilo fakalei ki mea e lavea ne koe, me i a koe ka se oko atu ki te sua feitu o te Iolitana.
28Tuku atu a fakatonuga ki a Iosua. Fakamalosi atu tena loto, me ka taki ne ia te fanauga a Isalaelu ki te sua feitu o puke mo latou a te fenua tena e lavea ne koe.’
29“Tena, ne nofo eiloa tatou i te vanu tela e fakafesagai ki te fa'kai o Petepeolo.”
Who We AreWhat We EelieveWhat We Do
2025 by iamachristian.org,Inc All rights reserved.
