IOPU 18 - Tuvalu Revised Bible

Pilitati

1-2Iopu, kae a, ko tino pena mo koe e se mafai o nofo filemu?

Kafai e nofo malie koe o fakalogologo, Ko faipati atu ei matou ki a koe.

3Se a te pogai e mafaufau ei koe i a matou e valea pela me ne pulumakau?

4A koe e fakamae foki eiloa ne tou kaitaua.

E mata ka lavaki te lalolagi i tou kaitaua?

E a, ka fakagasue ne te Atua a mauga ke fakamalie ei koe?

5 Iopu 21.17 A te mōli a te tagata masei e tamate eiloa;

A tena ulaga ka se toe ula eiloa.

6A te moli i tena faleie ka fakapouli.

7A ona pou ne mautakitaki, kae nei ko siga fua;

Ko siga a ia — e pogai eiloa i ona manatu fia tonu.

8E sasale a ia ki loto i te tili, tena ko lavelave ei ona vae;

9Ko lave ona mulivae i te malei, tena ko taofi ei a ia ne te malei.

10E isi se malei ne funa i te laukele;

E isi se malei ne tao i tena auala.

11A te fakamataku e fakatalitali ki a ia i ona feitu katoa;

E tautali i a ia i ona maga katoa.

12Ne maumea a ia, kae nei ko likiliki;

A te puapuaga ko tu o fakatalitali i ona tafa.

13A tena foitino ko tofu i te masaki fakamataku,

Ko pogai ei te pala o ona lima mo ona vae.

14Ko ave keatea a ia mai i te faleie ne nofo ei a ia mo te saogalemu,

Kae ko toso ki mua o te Tupu o te Mate.

15Nei, so se tino e fia nofo i tena faleie

Manafai ko oti ne fakapauta ki te pauta ko te salufa e fakama ei te faleie mai i te masaki.

16A ona aka mo kaula ko mage kae ma'lo.

17Ko se takutakua a ia i loto i tena kaiga, pela foki ki tino katoa;

Ko se toe masaua a ia ne tino.

18Ka afuli a ia keatea mai i te fenua o tino ola,

Ka afuli keatea mai i te mainaga ke fano ki te pouliga.

19E seai ne tino i tena gafa e ola mai.

20A tino katoa, mai i te saegala ki te togala,

Kola e lagona ne latou tena ikuga, ka polepole i te mataku.

21Tena te ikuga o tino amio masei, te ikuga o tino kola e se saga lele eiloa ki te Atua.