IOANE 14 - Tuvalu Revised Bible

Ko Iesu ko te Auala ki te Tamana

1Ne fai atu a Iesu ki a latou: “Sa manava'se kae pole koutou. Fakatuanaki ki te Atua, kae fakatuanaki mai foki ki a au.

2E uke a potu i te fale o toku Tamana, kae tenei au ka fano o fakatoka se koga mo koutou. Moi seai, penei e se fai atu ne au ki a koutou.

3Kafai foki e fano au o fakatoka se koga e 'nofo i ei koutou, au e toe foki mai, ko ave ei ne au a koutou, ko te mea ke iai koutou i te koga e nofo ei au.

4Ko iloa foki ne koutou te auala ki te koga tela e fano au ki ei.”

5Ne fai mai Toma ki a ia, “Te Aliki, e se iloa ne matou a te koga e fano koe ki ei; e mafai la pefea o iloa ne matou te auala?”

6Ne tali atu Iesu ki a ia: “Ko au te auala, te munatonu mo te ola. E seai se tino e fanatu ki te Tamana manafai e se alatu mai i a au.

7Ne fai atu a ia, “nei ko iloa ne koutou au, ko iloa foki ne koutou toku Tamana; kae mai i te taimi nei o fano ki mua, ko iloa ne koutou a ia me ko oti ne lavea ne koutou.”

8Ne fai mai Filipo ki a ia, “Te Aliki, fakaasi mai ki a matou te Tamana; tena fua te mea e fia iloa ne matou.”

9Ne tali atu a Iesu: “Ko leva nei eiloa taku fakatasiga mo koutou katoa, kae e seki iloa ne koe au e Filipo? Ko te tino ko kilo ki a au, ko kilo foki ki te Tamana. Ai a la e fai mai ei koe, ‘Fakaasi mai ki a matou te Tamana’?

10E a, e se talitonu mai koe, me i a au e nofo i loto i te Tamana, ka ko te Tamana foki e nofo i loto i a au? A pati kola ko oti ne faipati atu ne au ki a koutou, e se mai i a au eiloa, ka ko te Tamana tela e nofo i loto i a au, e fai eiloa ne ia ana galuega.

11Ke na talitonu mai la koutou me i a au e nofo i loto i te Tamana, a te Tamana foki e nofo i loto i a au. Kafai e se tena, talitonu mai koutou ki a au ona ko galuega kona.

12Au e muna tonu atu ki a koutou: so se tino e talitonu ki a au, ka fai foki ne ia galuega kola e fai ne au. E tonu, ka fai eiloa ne ia a galuega e sili atu i te 'lasi, i te mea ia au e fano ki toku Tamana.

13So se mea e fakatagi mai ei koutou i toku igoa, e fai eiloa ne au, ko te mea ke vikia ei te Tamana ona ko te Tama.

14Kafai e fakatagi mai koutou ki se mea i toku igoa, e fai eiloa ne au.”

Ko te Folafolamaiga o te Agaga Tapu

15“Kafai e a'lofa mai koutou ki a au, ke tausi ne koutou aku poloakiga.

16Ka fakatagi atu foki au ki te Tamana, ko uga mai ei ne ia ki a koutou te sua Fesoasoani, ko te Agaga o te munatonu. Ko te mea ke nofo mau i a koutou ki te se gata mai.

17A ia ko te Agaga, tela e fakaasi ne ia te meatonu e uiga ki te Atua. E se mafai o talia a ia, i te mea e se lavea kae se iloa foki a ia ne te lalolagi. Kae e iloa ne koutou a ia, me nofo mau faeloa a ia i a koutou, kae e i loto foki ia koutou.

18“Ka se tuku ne au koutou ke fakaa'lofa, kae ka toe vau au ki a koutou.

19Ko se leva nei, ko se toe lavea ei au ne te lalolagi, kae ka lavea faeloa au ne koutou; i a au e ola, tena te mea e ola ei foki koutou.

20Kae ka oko mai te aso, ka iloa ei ne koutou i a au e nofo i loto i toku Tamana; a koutou foki e 'nofo i loto i a au, mo au foki e nofo i loto i a koutou.

21“So se tino e talia ne ia aku poloakiga kae tausi ki ei, ko ia tena e alofa mai ki a au; a ia foki tela e alofa ki a au, e alofagina ne toku Tamana, au foki e alofa ki a ia, kae ka fakaasi foki au ki a ia.”

22Ne fai mai a Iuta e se ko te Isikaliota, “Te Aliki, ai a ka fakaasi mai ei koe ki a matou, kae se ko te lalolagi?”

23Ne tali atu a Iesu ki a ia: “Kafai e alofa mai se tino ki a au kae tausi ne ia aku muna, ka alofa foki toku Tamana ki a ia, ka o'mai foki maua mo toku Tamana ke 'nofo fakatasi mo ia.

24So se tino e se alofa ki a au, e se tausi foki ne ia aku muna; ka ko te muna tela ne fakalogologo koutou ki ei, e se e aku, kae e a te Tamana tela ne uga mai ne ia au.

25“A mea konei e fai atu ne au i a tatou koi 'nofo tasi.

26Ka ko te Fesoasoani, ko te Agaga Tapu tena, ka uga mai ne te Tamana e alatu mai i toku igoa, o akoako atu ki a koutou i mea katoa; e fakamasaua atu foki a mea katoa kola ko oti ne fai atu ne au ki a koutou.

27“E avatu ne au ki a koutou te filemu; ko toku filemu eiloa tenei e avatu ei ne au ki a koutou; e se avatu ne au e pela mo te avatuga ne te lalolagi ki a koutou. Sa manava'se koutou, sa ma'taku foki koutou.

28Ne lagona mai ne koutou ia au ne fai atu ki a koutou, ‘Au ka fano, kae ka toe vau au ki a koutou!’ Moi a'lofa mai koutou ki a au, penei ko fia'fia koutou i a au e fanatu ki te Tamana; me sili toku Tamana i a Au.

29Ko oti ne taku atu ne au ki a koutou ka koi tuai o oko mai, ko te mea ke talitonu mai koutou manafai e oko mai.

30Ko se mafai ne au o faipati fakaloaloa atu ki a koutou; me tenei ko vau te aliki masei o te lalolagi nei. Kae e se sili atu tona malosi i a au.

31Ka ko te mea e 'tau o iloa ne te lalolagi, i a au e alofa ki te Tamana. Tena te mea e fai ei ne au so se mea e fakatonu mai ne ia.

“Tou 'tu ki luga o olo keatea mai konei.”