IOPU 21 - Tuvalu Revised Bible

1-2Fakalogo mai ki aku muna ka fai atu;

Tena fua te fakamafanafanaga e manako au ki ei mai i a koutou.

3Tuku mai au ke faipati atu, ka oti au ne faipati,

Ko fakalili mai ei au manafai e fia fakalili mai koutou ki a au.

4Au e se kinau mo se tino ola penei mo tatou;

E isi eiloa se pogai e tau ei au o se toka penei.

5Kilo mai ki a au. E a, e poi koutou i a au?

6Kafai au e mafaufau ki te mea ne tupu ki a au,

Ko oko eiloa i toku poi, kae polepole foki eiloa toku foitino.

7Ai a e talia ei ne te Atua a tagata masei ke ola kae talia foki ne ia ke olo ake o ma'tua kae maumea?

8E fai olotou tamaliki mo mokopuna, kae ola ke lavea ne latou te tupuakega o olotou tamaliki mo mokopuna.

9A te Atua e se aumai ne ia a puapuaga ki olotou fale;

E se nofo ma'taku eiloa latou.

10E tonu, a olotou pulumakau e fanafanau kae seai se fakalavelave e oko ki pulumakau i taimi e fanau ei.

11A olotou tamaliki e teletele kae tafao e pela me ne tamā mamoe,

12Kae saka ki leo o kitala mo faili.

13E oti atu eiloa a olaga o latou i te filemu,

Kae mate filemu seai se fita.

14A tino masei e fai ki te Atua ke sa fakalavelave atu ki a latou;

E se fia iloa ne latou te loto o te Atua e uiga ki te olaga o latou.

15E mafaufau latou me e seai se aoga o te tavini atu ki te Atua io me ko te fai talosaga ki a ia.

16E taofi latou pela i a latou e manuia eiloa i te lotou malosi,

Kae e se mafai eiloa o talia ne au a mafaufauga o latou.

17E a, kai galo atu eiloa te mainaga o te tagata amio masei?

Kai fetaui eiloa se tino o latou mo se fakalavelave?

Kai fakasala eiloa ne te Atua a tino masei i tena kaitaua,

18Kae fue latou keatea e pela me ne kau saito e agina i se matagi,

lo me e pela me ne pefu e agina i se kautaufa?

19A koutou e fai mai i te Atua e fakasala ne ia a te tamaliki i te agasala a tena tamana.

Ikai! A te Atua ke fakasala eiloa ne ia a tino ne agasala ke fakaasi atu me ne fakasala latou ona ko olotou agasala.

20A tino agasala ke tuku eiloa ke fakasala ona ko olotou agasala;

Tuku ke lagona ne latou te kaitaua o te Atua Malosi.

21Kafai ko gata te ola o te tagata, e mata e toe saga atu a ia ki ana tamaliki, me e fiafia me ikai?

22E mafai ne se tino o akoako te Atua, tela e fakamasino ne ia a tino maluga?

23-24A nisi tino e malosi faeloa ke oko eiloa ki te aso e mate ei latou;

E mate mo te fiafia mo te filemu,

mo olotou foitino e makona faeloa.

25A nisi tino e seai eiloa se fiafia e maua ne latou;

E ola kae mate atu i te fi'ta.

26Kae pau katoa a tino katoa, e mate kae tanu,

Kae fonu foitino i ilo.

27E iloa ne au otou mafaufauga masei kona e fai.

28E fesili ake koutou penei, “Tefea nei te fale o te tagata takutakua, te tagata tela e fai amioga masei?”

29Kai faipati eiloa koutou ki tino e fai malaga sale?

E a, e se iloa ne koutou a te lipoti e aumai sale ne latou?

30Kafai e oko ki te aso e kaitaua ei te Atua kae fakasala ne ia a tino,

Ko te tagata amio masei e masani o fakasao sale.

31E seai se tino e mafai ne ia o moli fakamasei se tino amio masei,

Io me e taui atu ki a ia e tusa eiloa mo ana amioga masei ne fai.

32Kafai ko avatu tena foitino ki te koga e tanu ei a tino mate,

Ki tena tanuga tela e leoleo fakalei,

33E afe mo afe ka olo i te solo o te mate,

Ka ko te laukele e takato filemu i luga i tena foitino.

34Ka ko koutou! E taumafai koutou o fakamafanafana au ki otou muna se aoga!

A otou tali katoa kona e fai mai ne loi katoa eiloa!