SALAMO 44 - Tuvalu Revised Bible

Te Talo mō se Puipuiga

1Te Atua, ko oti ne lagona ne matou ki omotou taliga,

Ne taku mai ki a matou ne omotou tupuna,

E uiga ki galuega lasi ne fai ne koe i olotou taimi,

i aso ko leva ne teka atu:

2i te tuliga ne koe keatea a tino mai olotou fenua,

Kae faka'nofo i ei ou tino i fenua kona;

i te fakasalaga foki ne koe a nisi malo kae fakamanuia ne koe ou tino.

3Ne seki fakatakavale ne ou tino a fenua kona ki olotou pelu;

Ne seki manumalo latou i te lotou malosi eiloa,

Kae ko tou 'mana mo tou malosi,

Mo te fakamaoniga o tou fakatasi mo latou,

Ko fakaasi mai ei me ne alofa koe ki a latou.

4A koe ko toku tupu mo toku Atua; e tuku atu ne koe te manumalo ki ou tino,

5Kae i tou 'mana e fakatakavale ei ne matou omotou fili.

6E seki fakalagolago au ki taku kausana,

io me ko taku pelu ke sao ei au;

7Ka ko oti ne fakasao ne koe matou mai omotou fili,

Ko oti foki ne fakatakavale ne koe a latou kola e ita mai ki a matou.

8E viki atu faeloa a matou ki a koe,

Kae fakafetai atu ki a koe ki te se gata mai.

9Kae nei, e te Atua, ko oti ne tiakina ne koe matou,

Kae tuku atu matou ke takavale;

Ko se toe fakatasi mai koe ki omotou kautau.

10Ko fai ne koe matou ke 'tele keatea mai omotou fili,

Kae ave ne latou omotou mea ma latou.

11Ko tuku atu ne koe a matou ke tamate pela me ne mamoe;

Ne fakasalalau foki ne koe matou i fenua fakaatea.

12Ne fakatau atu ne koe ou tino ki se 'togi māmā,

Me ko se taua latou i ou manatu.

13Ka lavea ne omotou tuakoi a mea ne fai ne koe ki a matou,

Tela ne fakatauemu kae fakalili mai ei latou ki a matou.

14Ko fai ne koe matou mo mea fakalumalumagina a fenua;

E luelue mai olotou ulu mo te fakalili ki a matou.

15Au e fonu i te ma mo te masiasi,

16i te fakalogo atu ki muna fakatauemu mo te fakamasei,

Mai oku fili mo tino kola e ita ki a au.

17Kae ne seki fakapuli eiloa ne matou a koe,

io me ofa ne matou te feagaiga ne fai ne matou mo koe.

18E seki fai pela me ne seki fakamaoni matou ki a koe,

E seki fai foki pela me seki faka'logo matou ki au fakatonuga.

19Ka ko tiakina eiloa ne koe a matou e aunoa mo se fesoasoani i loto i manu fe'kai;

Ne tiakina ne koe matou i te pouliga matolu.

20Kafai ne seki tapuaki atu matou ki te motou Atua,

Kae ne 'talo atu matou ki se atua fakaatea,

21E iloa eiloa ne koe te mea tena,

i te mea e iloa ne koe a mafaufauga 'funa o matou.

22 Loma 8.36 E pogai mai i a koe te tamatega o matou i aso katoa,

Ko pela foki matou me ne mamoe ka tamate.

23Te Aliki, ala mai! Ai a e moe ei koe?

Tu mai ki luga! Sa teke mai ki a matou ke oko ki te se gata mai!

24Ai a e muni ei koe i a matou? Mo a ma puli i a koe omotou puapuaga mo omotou fakalavelave!

25Ko 'siga masei matou ki lalo i te laukele;

Ko takato matou i te pefu, i a matou ko takavale.

26Tu mai ki luga kae fesoasoani mai!

Fakaola mai matou i tou alofa tumau!