EPELU 13 - Tuvalu Revised Bible

Ko Auala e Fakafiafia ei te Atua

1Ke fakatau alofa koutou e pela eiloa mo ne taina i a Keliso.

2Kene 18.1-8; 19.1-3Masaua o fakaafe ne koutou a tino fakaalofa i otou fale. E isi ne tino ne talimalo faka'lei ki tino, kae ne tali faka'lei foki ki agelu mo te se iloa ne latou me ne agelu.

3Ke masaua foki ne koutou a tino kola e i loto i fale puipui, ke pela me fale puipui fakatasi koutou. Ke masaua foki a latou kola e puapuagatia, ke pela me puapuagatia fakatasi koutou mo latou.

4E 'tau o faka'malu ne tino katoa a te fakaipoipoga, ka ko tauavaga e 'tau o fakatau a'lofa. E fakamasino ne te Atua a latou kola e fina lalolagi, pela foki mo latou kola e mulilua.

5 Teu 31.6,8; Iako 1.5 Ke faka'mao koutou mai te matatupe, kae loto ma'lie ki mea ko maua ne koutou. Me ne muna mai te Atua, “E se tiakina lele eiloa ne au koutou, e se tuku tiaki lele eiloa ne au a koutou.”

6Sala 118.6Tela la, ke loto 'toa tatou o fai ake penei,

“A te Aliki ko toku fesoasoani,

Ko se mataku au!

Ki so se mea e fai mai ne se tino ki a au.”

7Masaua ne koutou otou takitaki muamua, kola ne taku atu ne latou a te muna a te Atua. Mafaufau me ne ola pefea, kae ne 'mate foki pefea; fakaakoako la ki te lotou fakatuanaki.

8A Iesu Keliso e pau eiloa i te aso anafi, i te aso nei, ke oko ki te se gata mai.

9Sa talia akoakoga fakaatea ke takitaki ei koutou keatea mai te auala tonu. Se mea 'tau ki te fakamalosi otou loto ne te alofa tauanoa o te Atua, e se i te fakalogo ki tulafono e uiga ki meakai; a latou kola e fakalogo ki tulafono konei, e se maua ne fesoasoani mai i ei.

10A faitaulaga kola e ga'lue i te fale tapuaki ave sale i malaga, e seai se lotou saolotoga o 'kai ki taulaga i te tou fata faitaulaga.

11Levi 16.27A te Faitaulaga Pule e aumai ne ia te toto o manu ki te Potu e Sili i te Tapu, o ofo atu ke fai mo taulaga o agasala; ka ko foitino o manu e 'sunu i tua o te fa'kai.

12Ona ko te mea nei, ne mate ei foki a Iesu i tua o te fa'kai, ko te mea ke faka'ma ne ia a tino mai olotou agasala e alatu i tona toto.

13Ke olo atu tatou ki a ia i tua o te fa'kai, ke kau fakatasi tatou mo ia i tona masiasi.

14Me e seai se fa'kai tumau mō tatou i te lalolagi; e fakatalitali fua tatou ki te fa'kai ka oko mai.

15Ke avatu eiloa ne tatou a tavaega ki te Atua ke fai mo o'tou taulaga ki a ia e alatu i a Iesu; ko tona uiga, ke 'viki faeloa tatou ki tona igoa i o'tou leo.

16Sa puli i a koutou o fai te mea 'lei, kae ke fesoasoani foki te sua tino ki te sua tino, me ko taulaga konei e fiafia ki ei te Atua.

17Fakalogo ki otou takitaki kae sasale foki i olotou fakatonuga. E se mapu eiloa latou i te tausiga o otou agaga, me 'tau mo latou o avatu se tala a olotou galuega ki te Atua. Kafai e faka'logo koutou ki ei, e fai olotou galuega mo te fiafia, kae masei te se faka'logo ki ei, ko fai ei olotou galuega mo te se fiafia, ko maumau ei olotou galuega mō koutou.

18Ke fai talosaga koutou mō matou. E talitonu matou me tonu faeloa omotou mafaufau, me ma'nako faeloa matou o fai te mea tonu i taimi katoa.

19Ko toe fakamolemole atu au ki a koutou, ke 'talo koutou ki te Atua ko te mea ke toe foki atu au ki a koutou, i se taimi pili mai.

Ko te 'Talo

20Ko oti ne fakatu ne te Atua a te tou Aliki ko Iesu mai tino 'mate. A ia ko te Tausi Mamoe Sili o mamoe ona ko tona mate, tela ko te fakailoga o te feagaiga se gata mai.

21Ke tuku atu ne te Atua o te filemu ki a koutou a mea 'lei katoa e ma'nako koutou ki ei, ko te mea ke fai ne koutou tona loto, ka ke mafai foki ne ia e auala i a Iesu Keliso, o fai ne ia i o'tou loto a mea kola e fiafia a ia ki ei. Ke i a Keliso te 'malu ki te se gata mai! Amene.

Ko Muna Fakapalele

22Au e fakamolemole atu ki a koutou e oku taina, ke faka'logo koutou mo te kufaki ki te talaiga fakamalosi loto; me e toetoe fua a te tusi tenei ko tusi atu ne au.

23E 'tau o iloa ne koutou i te tou taina ko Timoteo ko oti ne 'tala mai i te fale puipui. Kafai e oko vave mai a ia i se taimi pili mai, e olo atu maua manafai e fanatu au o asi koutou.

24Ko a'lofa atu matou ki otou takitaki katoa pela foki mo kelisiano katoa. Ko a'lofa atu foki a taina mai i Italia ki a koutou.

25Ke i a koutou katoa te alofa tauanoa o te Atua.