1 SAMUELU 9 - Tuvalu Revised Bible

Ko Fetaui Samuelu mo Saulo

1E isi se tagata maumea kae takutakua, e igoa ki a Kiso, mai i te matakaiga o Peniamina; a ia se tama tagata a Apielu, kae ko te mokopuna o Selolo, kae se tino mai te kaiga o Pekolata i te kaukaiga o Afia.

2E isi sena tama tagata ko Saulo, se tagata taulekaleka kae ko tugamalie eiloa tena olaga. A Saulo ko te 'toe tagata loa eiloa i Isalaelu kae ko 'toe tagata taulekaleka foki eiloa.

3I te aso e tasi, ne galo a asini a Kiso, tena ne fai atu ei a ia ki a Saulo penei, “Olo mo se tavini tokotasi o sala mai a asini.”

4Ne olo atu laua ki te fenua mauga o Efalaima ke oko atu foki ki te kogā fenua o Salisa, kae ne seki maua eiloa ne laua a asini i koga kona; tena ne toe olo atu laua ki te kogā fenua o Salima, kae e galo eiloa a asini i ei. Ne toe olo atu laua ki te kogā laukele o Peniamina, kae e se maua eiloa i kona.

5I te okoatuga o laua ki te kogā laukele o Sufi, ne fai atu ei a Saulo ki tena tavini, “Taua ka foki ki te fale me e fai aka nei, ko se mafaufau mafa toku tamana ki asini kae manavase ki a taua ma galo.”

6Ne tali atu te tavini penei, “Fakatali! E isi se tagata 'malu i konei tela e fakaaloalo ne tino me i mea katoa e faipati ne ia e taunu katoa. Taua ka olo ki ei, se taumate ka mafai ne ia o fakaasi mai te koga ne olo ki ei a asini.”

7Ne fesili atu Saulo, “Kafai e olo taua ki te tagata tena, se a te mea e tau o ave ne taua ki ei? Ko seai ne meakai i ta taga, kae ko seai foki se mea e tau o tuku ne taua ki a ia.”

8Ne tali atu te tavini, “E isi se tupe siliva a aku tenei ke tuku ki ei, ko fakaasi mai ei ne ia te koga e nofo ei a asini a tou tamana.”

9-11Ne tali atu Saulo penei, “Ko 'lei, taua ka olo ki ei.” Tena ne olo atu ei laua ki te fa'kai tena e nofo ei te tagata 'malu tena. Ite sasaleatuga a laua o olo ki luga i te fa'kai tela e tu i luga i te mauga foliki, ne fetaui laua mo tamafine e olo o asu vai. Ne fesili atu laua ki tamafine kona penei, “A te pelofeta e nofo i te fa'kai?” I te taimi tena, a te pelofeta e fakaigoa ko te tino, kilo 'mao, tela la, kafai se tino e manako o faipati ki te Atua, e mua o fai penei, “Tatou ka olo ki te tagata kilo 'mao.”

12-13Ne tali atu tamafine penei, “Ao, tena i te fa'kai. Tena eiloa e fanatu i o lua mua. Kafai e tai fakavave koulua, e iku o maua ne koulua. I te taimi eiloa e oko atu ei koulua ki te fa'kai, maua atu foki eiloa ne koulua. Ne oko atu a ia tena ki te fa'kai i te aso nei, me i tino ka olo o ofo te taulaga a latou i te fata-fai-taulaga i luga i te mauga foliki. A tino kola ne kami atu e faka'tali eiloa ke oko atu a ia ko kai ei, me tau o fakamanuia mua ne ia te taulaga. Kafai e na olo nei koulua, e maua eiloa ne koulua kae siki fano ki luga i te mauga foliki o kai.”

14Tena ne olo atu ei a Saulo mo tena tavini ki te fa'kai, kae i te uluatuga a laua ki te fa'kai, lavea ei ne laua a Samuelu ko vau mai te fa'kai, tonu mai eiloa ki a laua, i tena auala ki te koga tapuaki.

15I te aso anafi, a te Aliki ne faipati ki a Samuelu penei,

16“Taeao, i te taimi penei, ka uga mai ne au se tagata mai te matakaiga o Peniamina. Fauu ne koe te tagata tena ke fai mo tupu o toku fenua ko Isalaelu, kae ka fakasao ne ia latou mai tino Filisitia. Ko oti ne lavea ne au te puapuaga o toku fenua, kae ko oti foki ne lagona ne au olotou tagi mo se fesoasoani.”

17I te laveaga ne Samuelu a Saulo, ko te Aliki eiloa ko faipati atu ki a ia, “Tenei te tagata ne fai atu ei au ki a koe. Ka takitaki ne ia toku fenua.”

18Tena, ne fanatu a Saulo ki a Samuelu, tela ko pili ki te mataloa o te fa'kai, kae fesili atu penei, “Taku mai me tefea te koga e nofo ei te pelofeta?”

19Ne tali atu Samuelu, “Au ko te pelofeta. Olo atu i oku mua ki te koga tapuaki. A tatou e kai fakatasi i te aso nei. I te tafataeao taeao, ko tali ei ne au a lua fesili katoa, ko olo ei koulua i te lua auala.

20A asini kola ne galo ko tolu aso ne teka, ko oti ne maua. Ko koe te tagata tenei e manako malosi ki ei a tino Isalaelu, ko koe mo te kaiga o tou tamana.”

21Ne tali atu Saulo, “Au nei se tino fua o te matakaiga o Peniamina, te 'toe matakaiga foliki eiloa o Isalaelu, ka ko toku kaiga ko te toe kaiga tafa eiloa ki lalo i te matakaiga o Peniamina. Ai a e faipati mai ei ne koe a mea kona ki a au?”

22Tena, ne taki atu ne Samuelu a Saulo mo tena tavini ki loto i te potu lasi, kae fakanofo laua i te nofoga sili i te taipola tela e 'nofo mai i ei e tinotolu tino ne kami.

23Muna a Samuelu ki te tino kuka, “Aumai te meafasi tela ne tuku atu ne au ke tuku fakaatea.”

24Tena ne aumai ei ne te kuka a te meafasi o te vae tela ne fili fakalei, tuku atu ei ne ia i mua o Saulo. Muna a Samuelu, “Kiloke, tena te meafasi ne tausi ma koe. Puke o kai, me ne tausi eiloa ne au ke kai koe i ei i te taimi tenei, fakatasi mo tino kona ne kami.”

Tena, ne 'kai eiloa a Saulo mo Samuelu i te aso tena.

25I te oloifoga o tino mai te koga tapuaki o olo ki te fa'kai, ne fakatoka ne latou te moega o Saulo i te potu i luga,

26Tena, ne moe eiloa a ia i kona.Saulo ko Fauu ne Samuelu ke Fai Mo Tupu

I te tafataeao, ne kalaga atu a Samuelu ki a Saulo i te tuafale penei, “Tu mai ki luga, ke na olo atu koulua i te lua malaga.” Ne pula aka Saulo, olo atu ei mo Samuelu ki te auala.

27I te okoatuga o laua ki te gataga o te fa'kai, ne fai atu Samuelu ki a Saulo penei, “Fai atu ki tau tavini ke mua.” Tena ne mua ei te tavini, kae fai atu mo Samuelu, “Fakatali mai i ne nai minute ke fakaasi atu ne au te mea ne fakailoa mai ne te Atua.”