1Taina, ko te feitu e uiga ki meaalofa faka te Agaga, au e loto ke iloa ne koutou te mea tonu e uiga mo mea kona.
2E iloa ne koutou i te taimi koi pouliuli ei koutou, ne pulegina koutou ne tupua 'mate, kola e takitaki 'se ki a koutou.
3Tela la, e 'tau o iloa ne koutou me seai se tino e takitaki ne te Agaga o te Atua e mafai o muna ake penei, “Ke malaia Iesu!” E seai foki se tino e mafai ne ia o fai ake pela, “A Iesu ko te Aliki” seiloga ko takitaki a ia ne te Agaga Tapu.
4 Loma 12.6-8 E uke vaega meaalofa faka te Agaga, ka ko te Agaga eiloa e tasi ne aumai ne ia.
5E uke vaega auala e tavini atu ei ka ko te Aliki eiloa e tasi e tavini atu tatou ki ei.
6E uke vaega galuega, ka ko te Atua eiloa e tasi ne aumai ne ia te malosi mo fai a galuega kona.
7Ko oti ne tuku mai ki tino takitokotasi a fakaasiga o te Agaga mō te 'lei o tino katoa.
8Ko te isi tino, ko tuku atu ne te Agaga ki a ia a te poto o tauloto kae akoako atu, ki te sua tino ko te poto o fai manatu fesoasoani 'lei.
9Ki te isi tino ko te fakatuanaki mai i te Agaga eiloa e tasi, kae ki te isi tino ko te mana o fakalei a masaki.
10Ko te isi tino ko te poto e fai ei ne ia a vavega, ko te isi tino ko te poto o 'valo fakapelofeta, ko te sua tino ko te poto o fakavasega ne ia a meaalofa mai te Agaga mo meaalofa e seki aumai mai te Agaga. Ko te sua tino e maua ne ia te meaalofa mai te Agaga ko te mafai o faipati ki 'gana kesekese kola e se iloa ne ia o faipati ki ei. Ko te isi tino ko te poto o fakamatala a 'gana kona.
11Ka ko te Agaga eiloa e tasi e fai katoa ne ia mea konei; e avatu ne ia a meaalofa kesekese ki tino takitokotasi e pela eiloa mo tona loto.
Ko te Foitino e Tasi mo ona Vaega Kesekese12 Loma 12.4,5 A Keliso e tasi tona foitino, kae e uke ona vaega kesekese.
13E pena foki tatou, ko tino Iutaia me ko tino Eleni, ko pologa me ko tino saoloto; ko oti tatou ne papatiso i te foitino e tasi ne te Agaga e tasi, ko oti foki ne tuku mai ki a tatou a te Agaga e tasi ke inu tatou ki ei.
14I te mea a te foitino e seki fakafua ake i se vaega e tasi, kae i vaega e uke.
15Kafai e fai mai penei te vae, “Au e se ko te lima, e se se vaega foki o te foitino,” e se mafai eiloa o se taku a ia pela se se vaega o te foitino.
16Kae kafai foki e fai mai te taliga, “Au se ko te mata, e se se vaega foki o te foitino,” e se mafai eiloa o se taku a ia pela se se vaega o te foitino.
17Kafai a te foitino katoa ne mata katoa, ka lagona la ne ia pefea a mea? Kae kafai se taliga fua, ka 'sogi ne ia pefea a mea?
18Kae tenei la, ne fakasoa ne te Atua a mea takitasi o te foitino, e pela eiloa mo tena loto.
19E seai se foitino manafai e tasi eiloa te vaega o te foitino!
20Kae tenei, e uke a vaega, kae tasi eiloa te foitino.
21Tela la, a te mata e se mafai o fai atu ki te lima, “Au se manako ki a koe!” Io, me ko te ulu e fai atu ki te vae, “Au se manako ki a koe!”
22E se mafai o ola tatou manafai e seai ne vaega vaivai o te foitino,
23ka ko vaega o te foitino kola e manatu tatou me se 'malu, e faka'malu malosi ne tatou, ka ko vaega kola e manatu māmā tatou ki ei, e tausi fakalei tatou ki ei,
24ka ko vaega gali o te tou foitino, e seai ne tausiga e fai ki ei. Ko te Atua eiloa ne tuku fakatasi ne ia o'tou foitino, ko te mea ke lasi te 'malu o vaega kola e se faka'malu tatou ki ei.
25Tela la, e seai se mavaevaega o te foitino, kae e fakatau fesoasoani katoa a vaega kesekese o te foitino, ko te sua vaega ki te sua vaega.
26Kafai e isi se mea o te foitino ko 'mae, ka 'mae a vaega katoa; kafai e isi se vaega ko malosi 'lei, e malosi fakatasi a vaega katoa.
27Nei, a koutou katoa ko te foitino o Keliso, ka ko koutou taki tokotasi ko ona vaega kesekese.
28Efe 4.11Ka ko te Atua ko oti ne tuku ne ia mea katoa i te Ekalesia i olotou tulaga tonu. Ne tofia muamua ne ia i te Ekalesia ko apositolo, i te lua ko pelofeta, i te tolu ko faiakoga, soko atu ei mo tino fai vavega, ko tufuga fakalei masaki, ko tino fesoasoani, tino pule; mo tino e 'poto o faipati ki 'gana kesekese kola e se iloa ne latou e alatu i te mana o te Agaga Tapu.
29E se ne apositolo katoa latou. E se ne pelofeta katoa latou. E se ne faiakoga katoa latou. E se fai vavega katoa latou.
30E se ne tino faka'lei masaki katoa latou. E se maua ne latou katoa te meaalofa mai te Agaga ko te mafai o faipati ki 'gana kesekese kola e se iloa ne latou. E se iloa ne latou katoa o fakamatala a 'gana kesekese kona.
31Tela la, ke tuku otou loto ki meaalofa e sili atu te lotou aoga.
Kae ka fakaasi atu ne au ki a koutou a te auala e tafasili atu i te gali.
Who We AreWhat We EelieveWhat We Do
2025 by iamachristian.org,Inc All rights reserved.
