ESEKIELU 39 - Tuvalu Revised Bible

Ko Takavale a Koka

1A te Aliki Sili ne faipati mai penei, “Te tagata ola, muna 'toka atu a Koka, te takitaki pule o malo o Meseko mo Tupalu, kae fai ki ei i a au ko tena fili.

2Ka fuli atu ne au a ia ki se auala fou, kae taki atu a ia ki matu ke oko atu a ia ki mauga o Isalaelu.

3Tena la, ko kini ei ne au tena kausana ke to keatea mai i tena lima fakamaui, mo ana matasana ke to keatea mai i tena lima fakaatamai.

4A Koka mo tena kautau mo malo kola e kau mo ia ka mate i luga i mauga o Isalaelu, kae ka tuku atu ne au olotou foitino ke kai ne manu eva mo manu vao katoa.

5Ka mate latou i tua o fa'kai. Ko au, te Aliki Sili, tena ne faipati atu.

6Ka fakaka ne au te afi i te fenua o Makoku, pela foki i laukele pili ki te tai i koga e nofo filemu ei a tino, tena la, ka iloa ei ne tino katoa i a au ko te Aliki.

7Ka onoono tonu au ke iloa ne tino Isalaelu a toku igoa tapu, kae ka se toe talia ne au ke fakamasiasigina toku igoa. Tena la, ka iloa ei ne malo i a au, te Aliki, ko te Atua Tapu o Isalaelu.”

8Muna a te Aliki Sili penei, “A te aso tela ne faipatigina ne au e oko mai eiloa.

9A tino kola e nofo i fa'kai o Isalaelu ka olo ki tua mo olotou fa'kai o tae a meatau kola ne tiakina ne sotia, ke fai mo fafie. Ka fakaka olotou afi ki talita, kausana, matasana, tao, mo pago, kae e lava foki eiloa mo tausaga e fitu.

10Ka se toe olo latou o tae fafie i tua o te fa'kai, io me kati ki lalo a lakau o te vao, me ko fakaaoga ne latou a meatau kona ne tiakina o fakaka ki ei olotou afi. Ka ta kae fao ne latou a mea a tino kola ne o'mai o ta latou kae fao olotou mea.” Ko te Aliki Sili tena ne faipati atu.

Ko Tanu a Koka

11Muna a te Aliki, “Kafai ko taunu a mea katoa kona, ko tuku atu ei ne au ki a Koka se laukele tanu tino mate mo ia i Isalaelu, i te Vanu o Tino Fai Malaga, i te feitu ki te saegala o te Tai Mate. A Koka mo tena kautau ka tanu i kona, kae ka fakaigoa a te vanu tena ko ‘Te Vanu o te Kautau a Koka.’

12E tusa mo te fitu masina e tanu ei ne tino Isalaelu a foitino kona, kae toe fai te fenua ke ma.

13A tino katoa i te fenua ka fakatau fesoasoani o tanu a latou kona, kae ka fakaaloalogina latou i te aso o toku manumalo ona ko te mea tena. Ko au, te Aliki Sili, tena ne faipati atu.

14Kafai ko oti te fitu masina, ka fili ne tagata ke olo i loto i te fenua ke olo o sala foitino mate kola koi toe i luga o te laukele ke tanu ne latou, ko te mea ke fai ne latou a te fenua ke ma.

15I te taimi ne olo sale ei latou i loto i te fenua, i taimi katoa e maua ei ne latou se ivi o se tino, ko fai ei ne latou se fakailoga i tafa o te ivi tena, ko te mea ke o'mai a te kau keli tanuga o tanu a te ivi tena i te Vanu o te Kautau a Koka.

16(Ka isi se fa'kai pili ki te koga tena ka fakaigoa ki te kautau tena.) Tena la, ka toe ma foki ei a te fenua.”

17 Faka 19.17,18 Muna a te Aliki Sili ki a au, “Te tagata ola, kalaga atu ki manu eva katoa mo manu katoa o te vao ke o'mai mai i koga katoa o kai te taulaga tenei e fakatoka ne au ma latou. Se 'kaiga lasi eiloa i luga i te mauga o Isalaelu, i kona e 'kai ei latou ki meafasi kae inu ki toto.

18Ka 'kai latou ki foitino o sotia kae inu ki toto o pule o te lalolagi, a latou katoa kona e tamate pela me ne mamoe tagata io me ne tama mamoe, io me ne kouti, io me ne pulumakau tagata putaputa.

19Kafai e tamate ne au a tino konei pela me ne taulaga, a manu eva mo manu vae fa e tau o 'kai ne latou a gako katoa kola e mafai o 'kai ne latou, kae inu ki toto ke oko ki te taimi e 'kona ei latou.

20I taku taipola, ka 'kai ne latou a solofanua mo tino e sopo i ei ki te mea e mafai ne latou, pena foki a sotia mo tagata o te taua. Ko au, te Aliki Sili, tena ne faipati atu.”

Ko te Toe Fakafouga o Isalaelu

21Muna a te Aliki, “Ka fakaasi ne au ke lavea ne malo a toku malu, kae fakaasi ki a latou a te fakaaogaga o toku mana o fakataunu saale ei aku ikuga lei kola e fai saale.

22Ka iloa ei ne tino Isalaelu mai i te taimi tena i a au ko te Aliki te lotou Atua.

23Ka iloa foki ne malo i a Isalaelu ne ave i te tafeaga ona ko agasala a latou ki a au. Ne fulitua au ki a latou, kae tuku atu latou ke fakatakavale kae ta ne olotou fili i taua.

24Ne tuku atu eiloa ne au te fakasalaga e tau ki a latou, ona ko te lotou lailai i feitu fakatapuakiga, mo olotou amioga masei, kae ne fulitua atu eiloa au ki a latou.”

25Muna a te Aliki Sili penei, “Kae nei, au ka alofa ki te gafa o Iakopo, kola ko tino Isalaelu, kae toe fai latou ke maumea. Ka puipui ne au toku igoa tapu.

26Kafai ko toe nofo latou mo te filemu i te lotou fenua tonu, kae ko seai se tino ke fanatu o fakamatakutaku latou, tena ka mafai ei o puli i a latou a te fakamasiasiga o latou i te fulituamaiga ki a au.

27Ka fakafoki mai ne au a oku tino mai i fenua kola e nofo ei olotou fili, ko te mea ke fakaasi atu ei ki malo e uke i a au e 'malu.

28Tena la, ka iloa ei ne toku fenua i a au ko te Aliki te lotou Atua. Ka iloa ne latou a te mea tena, me ne uga ne au latou ki te tafeaga, kae nei, ko toe fakamaopoopo mai ne au latou kae fakafoki mai ki te lotou fenua tonu, e seki ai eiloa se tino ne tiakina kae seki aumai.

29Ka ligi atu toku agaga ki tino Isalaelu kae ka se toe fulitua atu eiloa au ki a latou. Ko au, te Aliki Sili, tena ne faipati atu.”

KO TE FAKAASIGA O TE FALETAPU I ASO FAKAMULI(40.1—48.35)