SALAMO 119 - Tuvalu Revised Bible

Ko te Tulafono a te Aliki

1Amutia latou kola e 'ma faeloa olotou olaga,

A latou e ola i te olaga pela eiloa mo tulafono a te Aliki.

2Amutia latou kola e tau'tali i ana fakatonuga,

A latou e faka'logo mo olotou loto katoatoa ki a ia.

3E se masani o fai ne latou ne mea 'se;

E sasale latou i auala o te Aliki.

4Te Aliki, ko oti ne tuku mai ne koe ki a matou au tulafono,

Kae ne fai mai koe ke faka'logo matou mo te fakamaoni ki ei.

5E fakamoemoe au me ka tausi fakamaoni ne au au fakatonuga!

6Kafai e fakalogo au ki au fakatonuga,

Ka se masiasi ei au.

7I taimi e akoako ei au ki au fakamasinoga tonu,

Ka 'viki ei au ki a koe mo toku loto 'ma.

8Au ka fakalogo ki au tulafono;

Sa tiaki mai ne koe au!

Ko te Fakalogo ki te Tulafono a te Aliki

9E mafai pefea ne te tino koi tuputupu ake o tausi tena olaga ke 'ma?

I te fakalogo ki au tulafono.

10Au e taumafai mo toku loto katoa o tavini atu ki a koe;

Tausi mai ke mo a au e se fakalogo ki au tulafono.

11Ko tausi ne au au tulafono i toku loto,

Ko te mea ke se agasala atu au ki a koe.

12Te Aliki, a koe e tavae ne au;

Akoako mai au ki ou ala.

13Ka folafola faeloa ne au mo te leo lasi au tulafono katoa kola ne tuku mai.

14E sili atu toku fiafia o tautali i au fakatonuga i lo te maua ne au a koloa e uke.

15E tauloto ne au au fakatonuga;

E sukesuke foki ne au au akoakoga.

16Au e fiafia i au tulafono;

Ka se puli foki i a au au fakatonuga.

Ko te Fiafia ki Tulafono a te Aliki

17Alofa mai ki a au, i au ko tau tavini,

Ko te mea ke ola au o fakalogo ki au akoakoga.

18Faka'pula aka oku mata, ko te mea ke iloa ne au te tonu mo te fakaofoofogina o au tulafono.

19E toetoe fua toku ola i te lalolagi nei;

Sa funagina au tulafono mai i a au.

20Ko fatifati toku loto i te manako malosi atu;

Kae fia iloa ne au au fakamasinoga i taimi katoa.

21Fakatonu malosi ne koe a tino fakamata'mata;

Fakamalaia atu latou kola e se tau'tali i au fakatonuga.

22Fakasao mai au mai i olotou fatufatuga mo olotou muna fakatauemu,

Me ko oti ne tausi ne au au tulafono.

23Ko maopoopo a tino pule o fai se togafiti masei ki a au,

Ka ko au e tauloto faeloa ki au akoakoga.

24Au fakatonuga e fakafiafia ei au, e fakatonutonu mai foki ne ia a au.

Ko te Loto Fatufatuaki o Fakalogo ki Tulafono a te Aliki

25Ko takato au mo te takavale i te pefu;

Toe fakaola mai au e pela eiloa mo tau feagaiga.

26Ne fakaasi atu ne au aku mea katoa ne fai, kae ne tali mai koe;

Akoako mai au ki ou ala.

27Akoako mai ke malamalama au i au tulafono,

Kae ka mafaufau 'loto au ki au akoakoga 'gali.

28Au ko takavale i te fanoanoa;

Fakamalosi ake au pela eiloa mo tau feagaiga.

29Tausi mai ke mo a ma fano au i te auala 'se;

Mai i tou lei, akoako mai au ki au tulafono.

30Ko oti ne tonu i a au ke fakalogo au ki a koe;

Ko oti au ne fakalogo ki au fakamasinoga.

31Te Aliki, ko oti au ne tautali i au fakatonuga;

Sa fakamasiasigina au.

32Au ka fakalogo ki au fakatonuga mo te fiafia lasi,

Me ka tai lasi atu toku malamalama ka aumai ne koe.

Ko te 'Talo ke Malamalama i Tulafono

33Te Aliki, akoako mai ki a au a te uiga o au tulafono,

Kae ka fakalogo au ki ei i taimi katoa.

34Fakamaina mai tau tulafono ki a au, kae ka fakalogo au ki ei;

Ka tausi au ki ei mo toku loto katoa.

35Takitaki mai au i auala o au tulafono,

Mai i au tulafono ka maua ei ne au te fiafia.

36Tuku mai ki au te fiafia o fakalogo ki au tulafono,

i lo te manako ki koloa.

37Tausi mai au keatea mai te sagatonu atu ki mea kola e se aoga;

Alofa mai ki a au pela eiloa mo tau feagaiga.

38Tausi tau feagaiga ki a au, ko tau tavini,

Ko tau feagaiga tela ne fai ki a latou kola e fakalogo ki a koe.

39Fakasao mai au i pati se 'lei kola e mataku au i ei;

Ko oko eiloa i te fakaofoofogina o au fakamasinoga!

40Au e manako o fakalogo ki au fakatonuga;

Tuku mai foki ki au se ola fou, me i a koe e amiotonu.

Ko te Talitonu ki Tulafono a te Aliki

41Te Aliki, fakaasi mai te lasi o tou alofa ki a au,

Fakasao mai au e pela eiloa mo tau feagaiga.

42Ka mafai ei ne au o tali atu ki a latou kola e ita mai ki a au,

Me i a au e talitonu ki au muna.

43Fai ne koe au ke mafai o faipati ki te mea tonu i taimi katoa,

Me i toku fakamoemoega e i tau fakamasinoga.

44Au ka fakalogo ki au tulafono i taimi katoa

Ki te se gata mai, ki te se gata mai eiloa.

45Au ka ola i te olaga saoloto,

Me i a au e taumafai o fakalogo ki au akoakoga.

46Ka se ma au o folafola atu au fakatonuga ki tupu.

47Au e fiafia o fakalogo ki au tulafono,

Me i a au e fiafia malosi ki ei.

48Au e āva kae manako malosi ki au tulafono;

Ka mafaufau 'loto au ki au fakatonuga.

Ko te Loto Talitonu ki Tulafono a te Aliki

49E masaua ne koe tau feagaiga ki a au, tau tavini;

Ko maua ne au mai i ei se fakamoemoega.

50Au ne fakamafanafanagina mai oku puapuaga,

Ne maua ne au te ola mai i tau feagaiga.

51A tino fakamata'mata ne fakatauemu mai ki a au,

Kae ne seki tiaki ne au au tulafono.

52Te Aliki, e masaua ne au au fakatonuga ne tuku mai ki a au i taimi ko teka,

Kae e maua ne au a fakamafanafanaga mai i ei.

53Au e kaitaua, manafai

E lavea ne au a tino masei ko ofa au tulafono.

54I toku olaga toetoe i te lalolagi nei,

E fatu ne au a pese e uiga ki au fakatonuga.

55Te Aliki, e masaua ne au koe i te po,

Kae e mafaufau au ki au tulafono.

56E maua toku fiafiaga i te fakalogo ki au fakatonuga.

Ko te Tuku Katoatoa atu o te Loto ki Tulafono a te Aliki

57Te Aliki, ko koe eiloa e manako katoatoa au ki ei;

E tauto atu au me ka tausi ne au au tulafono.

58Au ko fakamolemole atu ki a koe mo toku loto katoa,

Alofa mai ki a au pela eiloa mo tau feagaiga!

59Ko oti ne mafaufau au ki taku amio,

Ka ko au e tauto atu i a au ka tautali ki au fakatonuga.

60Au e vave o fakalogo ki au tulafono.

61Ko oti ne fakatoka ne tino ma'sei se malei mo oku,

Kae e se puli eiloa i au au tulafono.

62I te valuapo, au e ala o tavae koe ona ko au fakamasinoga tonu.

63Au se taugasoa o tino katoa kola e tavini atu ki a koe,

Mo latou katoa foki kola e fakalogo ki au tulafono.

64Te Aliki, a te lalolagi ko fonu i tou alofa tumau;

Akoako mai a au ki au tulafono!

Ko te Aoga o Tulafono a te Aliki

65Te Aliki, ko oti ne tausi ne koe tau feagaiga,

A koe e atafai mai ki a au, i au ko tau tavini.

66Tuku mai ki a au te poto mo te iloa,

Me i a au e talitonu ki au tulafono.

67Au e masani o fai mea 'se ka koi tuai au o fakasala ne koe,

Kae nei ko fakalogo au ki au muna.

68Ko oko eiloa i tou lei mo tou mata alofa,

Akoako mai au ki au fakatonuga.

69A tino fakamata'mata ne fai tala loi e uiga ki a au,

Ka ko au e fakalogo ki au tulafono mo toku loto katoa.

70A tino konei e seai se poto i a latou

Ka ko au e fiafia faeloa i au tulafono.

71A taku fakasalaga se mea lei ki a au,

Me ne fai ne ia ke tauloto ne au au tulafono.

72A tau tulafono tela ne tuku mai ne koe,

E silia atu tena aoga ki a au i lo tupe katoa i te lalolagi.

Ko te 'Tonu o Tulafono a te Aliki

73Ne faite ne koe au kae tausi fakalei au ne koe;

Tuku mai ki a au te malamalama ko te mea ke tauloto ne au au tulafono.

74A latou kola e ava ki a koe;

Ka fia'fia manafai e lavea ne latou a au.

Me i a au e talitonu ki tau feagaiga.

75Te Aliki, e iloa ne au i au fakamasinoga e tonu,

Kae ne fakasala ne koe a au me i a koe e fakamaoni.

76Fakamafanafana mai au ki tou alofa tumau,

E pela mo tau feagaiga ki a au, tau tavini.

77Alofa mai ki au, ko te mea ke ola au,

i a au e fiafia ki au tulafono.

78Ke fakamasiasi ne koe a tino fakamatamata, me taku faka'se ne latou au;

Kae pela mo au, ka mafaufau 'loto au ki au fakatonuga.

79Ke o'mai ki au a latou kola e ma'taku ki a koe,

Mo latou katoa kola e iloa ne latou au fakatonuga.

80Ke katoatoa toku fakalogo ki au tulafono,

Ko te mea ke sao au mai te masiasi o te takavale.

Ko te 'Talo ke Maua se Fakasaoga

81Te Aliki, au ko fiu i te fakataliga ki a koe ke fakasao au;

Au e talitonu faeloa ki tau muna.

82Oku mata ko 'mae i te kilokilo atu ki mea ne tauto mai ei koe,

Tela fesili ei au penei,

“Ko afea e fesoasoani mai ei koe ki a au?”

83Au ko se aoga e pela me se fagu uaina ko 'pei keatea,

Ka ko au e seki puli eiloa i au au fakatonuga.

84Se a foki te leva o te taimi e fakatali ei au?

Ka fakasala ne koe afea a latou kola ne fakasaua mai ki a au?

85A tino fakamata'mata kola e se faka'logo ki au tulafono,

Ko oti ne keli ne latou a lua mo malei au.

86E 'tonu katoatoa au tulafono, fesoasoani mai ki au,

i a au ko fakasauagina ne tino ki olotou loi!

87Toe itiiti ko taunu toku tamatega ne latou,

Kae ne seki tiaki eiloa ne au au fakatonuga.

88Alofa mai ki a au i tou alofa tumau,

Ko te mea ke fakalogo au ki au tulafono.

Ko te Fakatuanaki ki Tulafono a te Aliki

89Te Aliki, a tau muna ka tumau ki te se gata mai;

E tumau i te lagi.

90A tou fakamaoni e tumau i taimi katoa;

Ko oti ne fakatu ne koe te lalolagi i tena tulaga,

Kae ka tumau eiloa i ei.

91I tau fakatonuga ko tumau ei a mea katoa ki te aso nei,

Me i mea katoa kona ko au tavini.

92Moi se fai a tulafono mo fakavae o toku fiafia,

Penei la, ko leva ne mate au i oku puapuaga.

93Ka se tiaki eiloa ne au au fakatonuga,

Me ola au i ei.

94Au e o koe, fakaola mai au!

Ko oti ne taumafai au o fakalogo ki au fakatonuga.

95A tino masei ko fakatalitali o tamate au,

Ka ko au e mafaufau 'loto ki au tulafono.

96Ko oti ne iloa ne au i mea katoa e isi ne lotou gataga;

Ka ko au fakatonuga fua e lei katoatoa.

Ko te Fiafia ki Tulafono a te Aliki

97Au ko oko eiloa i te fiafia ki au tulafono!

E mafaufau au ki ei i te aso katoa.

98Au tulafono e mau i a au i taimi katoa,

E fai ne latou au ke poto atu i oku fili.

99E sili atu a te mea e iloa ne au i lo oku faiakoga katoa,

Me e maua oku mafaufauga mai i au fakatonuga.

100E poto atu au i lo toeaina,

Me i a au e fakalogo ki au fakatonuga.

101Ne seki fai ne au a amio masei katoa,

Me i a au e manako o fakalogo ki tau muna.

102Ne seki tiaki ne au au fakatonuga,

Me i a koe ko toku faiakoga.

103Ko oko eiloa te suamalie o au tulafono,

E suamalie atu i te hani.

104Ne maua ne au te poto mai i au tulafono,

Tena te mea ko takalialia ei au ki amioga masei katoa.

Ko te Mainaga Mai Tulafono a te Aliki

105A tau muna se moli e takitaki ne ia au,

Se mainaga foki ki toku auala.

106Ka tausi ne au taku feagaiga 'malu,

Ke fakalogo au ki fakatonuga 'tonu.

107Toku Aliki, ko oko eiloa i te uke o oku puapuaga,

Tausi au ke ola pela eiloa mo tau feagaiga ko oti ne fai.

108Te Aliki talia mai taku 'talo fakafetai;

Kae akoako mai ki a au au fakatonuga.

109Au e toka o tuku atu toku ola;

E seki puli i au au tulafono.

110A tino masei ko 'tao se malei mo oku,

Ka ko au ne fakalogo faeloa ki au fakatonuga.

111Au tulafono ko aku koloa tumau,

Ko te fiafiaga o toku loto.

112Ko oti ne tonu i a au ke fakalogo au ki au tulafono,

Ke oko ki te aso e mate ei au.

Ko te Fakasaoga e Maua i Tulafono a te Aliki

113Au e takalialia ki a latou kola e se fakamaoni atu ki a koe,

Kae fiafia au ki au tulafono.

114A koe ko toku lafiga mo toku puipuiga;

Au e fakamoemoe ki tau feagaiga.

115A koutou tino agasala, olo keatea mai i a au.

Au ka fakalogo ki tulafono a toku Atua.

116E pela mo tau feagaiga, tuku mai ki a au te malosi ke ola au;

Sa fakatukakigina au mai toku fakamoemoega!

117Puke mai ki a au ko au ke sao,

Kae ka saga atu au ki au tulafono i taimi katoa.

118E tiaki ne koe latou kola e se fakalogo ki au tulafono;

Ka se aoga olotou togafiti loi.

119E fai ne koe a tino masei katoa ke pela me ne kaiga,

Ka ko au e fiafia ki au fakatonuga.

120Au ko mataku ona ko koe;

Au ko fonu i te mataku ona ko au fakamasinoga.

Ko te Fakalogo ki Tulafono a te Aliki

121Ko oti ne fai ne au te mea tonu mo te 'lei;

Sa tiakina mai au ki oku fili!

122Tauto mai i a koe ka fesoasoani mai ki a au, tau tavini;

Sa tuku ne koe tino fakamatamata

Ke fakatupu fakalavelave mai ki a au!

123Oku mata ko 'mae i te 'pulaga ke oko mai tau fakaolataga,

Ko te fakaolataga tela ne fai feagaiga mai ei koe.

124Ke fai fakalei au ne koe ki tou alofa tumau,

Kae akoako mai au ki au fakatonuga.

125Au ko tau tavini, tuku mai te poto ki a au,

Ke iloa ne au au akoakoga.

126Te Aliki, ko oko ki tou taimi o fai se mea,

Me i tino ko se fakalogo ki tau tulafono!

127E sili atu toku fiafia ki au fakatonuga i lo aulo,

Mo aulo tafasili foki i te 'lei.

128Kae ko au ka tautali i au fakatonuga katoa;

kae ita i auala se 'tonu katoa.

Ko te Fakalogo ki Tulafono a te Aliki

129Ko oko eiloa i te gali o au akoakoga;

Au e fakalogo ki ei mo toku loto katoa.

130A te fakamatalaga o au akoakoga e maua mai ei te mainaga,

E aumai ne ia te poto ki a latou kola e seai se atamai.

131Ko pusi toku manava, kae fakamaga toku gutu,

Ona ko toku finafinau ki au fakatonuga.

132Saga mai kae alofa mai ki a au,

E pela mo tou saga tonu ki a latou kola e a'lofa atu ki a koe.

133Tausi au ke mo a ma takavale e pela eiloa mo tau feagaiga;

Sa fakatakavalegina au i te masei.

134Fakasao mai au i a latou kola e fakasaua mai,

Ko te mea ke fakalogo au ki au fakatonuga.

135Fakamanuia mai au i toku nofo tasi mo koe,

Kae akoako mai au ki au tulafono.

136E ma'ligi oku loimata e pela me se vaitafe,

Ona ko tino kola e se faka'logo ki au tulafono.

Ko te 'Tonu o Tulafono a te Aliki

137Te Aliki, a koe e amiotonu,

E 'tonu foki au tulafono.

138Au tulafono kola ko oti ne tuku mai ne koe,

E lei katoatoa kae 'tonu.

139A toku ita e 'ka mo se afi i loto i a au,

Me i oku fili e seki 'saga atu ki au fakatonuga.

140A tau feagaiga ko oko eiloa i te tonu!

Ko oko eiloa toku fiafia ki ei!

141Au ko se taulia ka ko fakatauemugina,

Kae se tiaki ne au au akoakoga.

142A tau amiotonu ka tumau ki te se gata mai,

Au tulafono e tonu faeloa i taimi katoa.

143Au ko 'fonu i puapuaga mo te manava'se,

Ka ko au tulafono e fakafiafia ei au.

144Au fakatonuga e tonu faeloa ki te se gata mai;

Tuku mai te malamalama i au tulafono, ke ola ei au.

Te Talo mo se Fakasaoga

145Au e kalaga atu ki a koe mo toku loto katoa,

Te Aliki, tali mai ko fakalogo ei au ki au fakatonuga!

146Au e kalaga ki a koe;

Fakasao mai au kae ka tausi ne au au tulafono.

147Ka koi tuai o sae te la, au e kalaga ki a koe ke maua se fesoasoani;

Au e fakamoemoe i tau feagaiga e taunu eiloa.

148Au e moe alaala faeloa i te po katoa.

E mafaufau 'loto au ki au fakatonuga.

149Te Aliki, fakalogo mai ki a au e tusa mo tou alofa tumau;

Fakaasi mai tou alofa 'nau,

Kae tausi mai toku ola!

150Ko gasolo o pili mai oku fili sauā,

Ko latou kona e se tausi lele ki au tulafono.

151Te Aliki, a koe e pili faeloa ki a au,

Au fakatonuga katoa e 'tonu.

152Au ko leva ne akoako ki au fakatonuga;

Ne fai ne koe au fakatonuga ke tumau ki te se gata mai.

Ko te Fakatagi mo se Fesoasoani

153Kilo mai ki oku puapuaga kae fakasao mai au i ei,

Me ne seki tiaki ne au au tulafono.

154Tausi toku talitonuga kae fakasaoloto ake au;

Fakasao mai au pela eiloa mo tau feagaiga.

155Ka seai se tino agasala e fakaola,

Me se faka'logo latou ki au tulafono.

156Te Aliki, e lasi tou alofa;

Fakaasi mai tou alofa 'nau kae fakasao mai au!

157E tokouke oku fili mo tino fakasaua ki a au,

Kae se tiaki eiloa ne au te fakalogo ki au tulafono.

158Au ko oko eiloa i te takalialia ma kilokilo ki a latou kola e gutu 'loi,

Me e se faka'logo ki au fakatonuga.

159Te Aliki, ko lavea ne koe toku fiafia ki au fakatonuga.

A tou alofa e se mafai o fuli, tela la, fakasao mai au!

160A te kano tonu o au tulafono ko te fai mea tonu,

Au fakamasinoga tonu katoa e tumau.

Ko te Loto ki Tulafono a te Aliki

161Au ne ta tauanoa fua ne tagata ma'losi,

Ka ko au e fakaava eiloa ki au tulafono.

162Ko oko eiloa toku fiafia ki au folafolaga,

E fiafia pela eiloa mo te fiafia o se tino ko maua se koloa tāua.

163Au e ita kae takalialia ki tala loi katoa,

Ka ko au e alofa ki au tulafono.

164E fakafitu o fakafetai atu au ki a koe i aso takitasi,

E tusa mo au fakamasinoga 'tonu.

165A latou kola e fiafia ki au tulafono e sao 'lei,

Kae ka seai eiloa se mea e tatō latou i ei.

166Te Aliki, e fakatalitali atu au ke fakasao mai au,

Kae fai loa ne au mea kola e fakatonu mai koe ki ei.

167Au e fakalogo ki au akoakoga;

E fiafia au ki ei mo toku loto katoa.

168Au e fakalogo ki au fakatonuga mo au akoakoga;

E lavea ne koe mea katoa kola e fai ne au.

Ko te 'Talo mō se Fesoasoani

169Te Aliki, taku tagi mō se fesoasoani ke oko atu ki a koe!

Tuku mai te loto matala ki a au, e pela eiloa mo tau tautoga.

170Fakalogo mai ki taku 'talo,

Kae fakasao mai au e tusa mo tau feagaiga!

171Au ka viki faeloa ki a koe,

i au e akoako ne koe ki au tulafono.

172Au ka usu pese e uiga ki au tulafono, Me i au fakatonuga e 'tonu.

173Ke toka koe o fesoasoani mai ki au i taimi katoa,

Me i au e tautali i au fakatonuga.

174Te Aliki, ko oko eiloa toku manako ki tou fesoasoani!

E maua toku fiafia mai au tulafono.

175Tuku mai te ola, ko te mea ke viki atu au ki a koe;

Ko au fakatonuga ke fesoasoani mai ki a au.

176Au e takasese pela me se mamoe ko galo;

Tela la, vau o sala ake au, tau tavini me seki tiakina eiloa ne au au tulafono.