2 SAMUELU 11 - Tuvalu Revised Bible

Ko Tavita mo Patisepa

1 1NTupu 20.1 I te 'tau o te muakiga, i te tausaga mai tua ifo, i te taimi e masani sale o fai a taua, ne uga ei ne Tavita a Ioapo mo ana ofisa, mo te kautau a Isalaelu ke olo o taua; ne fakatakavale ne latou a tino Amoni kae puke aka foki mo te fa'kai o Lāpa. Ka ko Tavita ne nofo i Ielusalema.

2I te fakaafiafi o te aso e tasi, ne ala aka Tavita, fano ei ki te tuafale o te palesi. Ne sasale sāle eiloa a ia i luga i te tuafale, tena, te mea eiloa ko lavea ne ia te fafine e koukou, kae ko oko eiloa i te gali.

3Tena, ne uga ne ia se avefekau ke onoono aka me ko oi te fafine tena, kae iloa aka nei ne ia me ko Patisepa, te tama fafine a Eliamo, kae ko te avaga a Ulia te tagata Heti.

4Ne uga ne Tavita ana avefekau ke puke mai; tena ne aumai ne latou ki a ia kae ne 'moe eiloa mo ia. A Patisepa ko fatoā oti eiloa tena faka'maga i feitu fakatapuakiga o te masina tena, foki atu ei a ia ki tena kaiga.

5Fakamuli aka, ko iloa aka ne ia i a ia ko faitama, tena uga ei ne ia te fekau o fakailoa ki a Tavita.

6Tena, ne uga te fekau a Tavita ki a Ioapo ke avatu a te tagata Heti e igoa ki a Ulia. Tena, ne avatu eiloa ne Ioapo a Ulia ki a Tavita.

7I te okoatuga o Ulia, ne fesili atu a Tavita me e a Ioapo mo te kautau, kae e 'lei te fanofanoga o te taua me ikai.

8Tena, ne fai atu ei a ia ki a Ulia penei. “Foki ki tou fale o malolo malie.” Ne fano Ulia, kae ne ave ne Tavita se meaalofa ki tena fale.

9Ka ko Ulia e seki foki ki tena fale, kae ne moe fua mo sotia tausi o te tupu i te palesi.

10I te logoga o Tavita i a Ulia e seki fano ki tena fale, ne fesili atu ei a ia penei, “A koe na ne fakagalo fua ki se koga, tenei ko toe foki mai koe; ai a e seki foki ei koe ki tou fale?”

11Ne tali atu a Ulia, “A tagata Isalaelu mo tagata Iuta e galo nei i te taua, mo te Pusa o te Feagaiga e 'nofo mo latou; a toku pule ko Ioapo mo ana ofisa e ma'nava i se koga ateatea. E mafai pefea ne au o fanatu ki toku fale, o inu kae kai faka'lei, kae 'moe foki mo taku avaga? Au e tauto me e se mafai lele eiloa ne au o fai se vaega mea pena!”

12Tena ne fai atu ei Tavita ki a ia penei, “Nofo la i konei i te aso nei, kae taeao ko uga atu ei ne au a koe ke foki.” Tena ne nofo eiloa Ulia i Ielusalema i te aso tena mo te sua aso.

13Ne kami atu a ia ne Tavita ki tena 'kaiga i te afiafi, kae fainu ne ia ke kona. I te po tena, a Ulia seki fano foki eiloa ki tena fale; kae ne moe fua i luga i tena pulagiketi i te potu 'tu o sotia.

14I te tafataeao o te aso a taeao, ne tusi ne Tavita tena tusi ki a Ioapo kae ne tuku ke fano mo Ulia.

15Konei a muna a Tavita ne tusi: “A Ulia ke tuku i te laina tafa eiloa ki mua, te koga e matolu ei te taua; kafai ko fai te taua, ko tele koutou ki tua kae tuku ei a ia ke mate.”

16Tena la, i te taimi ne fakatamilo ei ne Ioapo a te fa'kai, kae ne uga ne ia a Ulia ki te koga e iloa ne ia e malosi ei te fili.

17Ne 'tele mai te fili mai loto i te fa'kai o taua ki te kau a Ioapo; e isi ne ofisa a Tavita ne 'mate, mo Ulia foki ne mate.

18Tena, ne ave ei te lipoti a Ioapo ki a Tavita, e tusa mo te fanofanoga o te taua,

19kae ne fakatonu atu ne ia te tino avefekau penei, “Kafai ko oti eiloa ne fakamatala ne koe ki te tupu a te fanofanoga o te taua,

20e iku a ia o kaitaua kae fesili atu penei,‘ai a ne olo ei koutou ke pili ki te fa'kai, o taua atu ki a latou? E se iloa ne koutou me ka sana ne latou a matasana ki a koutou mai te pui o te fa'kai?

21Fama 9.53 E se masaua ne koutou te matega o Apimeleko, te tama tagata a Kitiona? Ne mate i te fatu solo saito ne 'pei ifo ne te fafine mai i luga i te pui, i te fa'kai o Tepesa. ‘Ai a la ne olo eiloa koutou o fakapilipili ki te 'pui?’ Kafai e fesilisili atu pena a Tavita ki a koe, kae fai koe penei, ‘A tau ofisa ko Ulia ne mate foki. ’ ”

22Tena, ne fanatu te avefekau ki a Tavita, kae fai atu ki ei a te fekau a Ioapo.

23Muna a ia, “A omotou fili e ma'losi atu i a matou, kae ne o'mai ki tua mo te fa'kai o taua mai ki a matou i te koga ateatea, kae ne afuli ne matou, toe tele foki ei ki loto i te lotou fa'kai.

24Tena, ne sana mai olotou matasana mai te 'pui o te lotou fa'kai, tena ne 'mate ei a nisi o au ofisa; a tau ofisa ko Ulia ne mate foki.”

25Ne fai atu Tavita ki te avefekau mai i a Ioapo penei, “Fakamalosi atu te loto o Ioapo ke se fanoanoa, me e se mafai o iloa ne tatou a tino ka 'mate i te taua. Fai ki ei ke tai fakamalosi aka te lotou kautau, o taua ki te fa'kai ke na fakatakavale.”

26I te logoga o Patisepa i tena avaga ko oti ne mate, tena ne tagi fanoanoa ei a ia mō tena avaga.

27I te otiga o aso ne tagi fanoanoa ei a ia, ne uga te fekau a Tavita ki ei, ke fanatu ki te palesi; ne fai a ia mo avaga a Tavita. Ne faitama a ia tena, fanau ei ne ia se tama tagata. Ka ko te Aliki e se fiafia ki te mea a Tavita tena ne fai.