1 TESALONIA 5 - Tuvalu Revised Bible

Ke Toka Koutou mō te Toe Foki Mai o te Aliki

1Taina, e se 'tau o tusi atu ki a koutou a taimi mo aso e 'tupu ei a mea konei.

2Mata 24.43; Luka 12.39; 2Pete 3.10Me e iloa 'lei eiloa ne koutou i te Aso o te Aliki e vau e pela mo se tino kaisoa i te po.

3Kafai e fai ake pela tino, “Ko tokagamalie a mea katoa mo te manuia,” ko te mea eiloa ko oko mai te fakamaseigina ki ei! E se mafai o 'sao me oko mai eiloa. E fakatusa eiloa tena 'mae ki te fafine ka fanau.

4Taina, a koutou nei e se 'nofo i te pouliga, ka ko te mainaga. Tela la, ke se puketu atu koutou ne te Aso e pela mo se tino kaisoa.

5A koutou katoa ko tino o te mainaga, ko tino foki o te ao. A tatou e se ne tino o te po io me ko te pouliga.

6Tela la, e se 'tau mo tatou o 'moe e pela mo nisi tino; e 'tau mo tatou o matala kae toka.

7Ko te po e 'moe ei a tino, ko te po foki e ko'na ei a tino.

8Isa 59.17; Efe 6.13-17Ka ko tatou ne tino o te ao; tela la, e 'tau mo tatou o toka. E 'tau foki mo tatou o fakapei ki otou foitino a te fakatuanaki mo te alofa ke fai mo otou ufifatafata, ka ko te tou fakamoemoega mo te fakaolataga ke fai mo puloutau.

9Ne seki filifili tatou ne te Atua ke puapuagatia i tena fakasalaga, ka ke maua ne tatou a te fakaolataga e alatu i te tou Aliki ko Iesu Keliso,

10tela ne mate mō tatou, ko te mea ke ola fakatasi tatou mo ia, faitalia me koi ola tatou io me ko 'mate i te taimi e oko mai ei, kae ola fakatasi eiloa tatou mo ia.

11Ona ko te feitu tenei, ke fakamalosi atu te sua tino ki te sua tino, ke fesoasoani foki te sua tino ki te sua tino, e pela eiloa mo te mea e fai ne koutou i aso nei.

Ko Akoakoga mo Alofaaga Fakapalele

12Taina, a matou e fakamolemole atu ki a koutou, ke ava koutou ki te kau faigaluega a te Ekalesia, ko latou kona ne filifilia ne te Aliki o takitaki kae fakatonu ki a koutou.

13Atafai ki ei i te agaga o te ava lasi mo te alofa, ona ko te galuega e fai ne latou. Ke 'nofo filemu koutou.

14Taina, e tauanau atu matou o fakatonu a tino e ta'fao valea, o fakaloto malosi atu a tino matama'taku, o fesoasoani ki tino vaivai, kae ke loto kufaki foki ki tino katoa.

15Ke mo a foki e taui atu ne se tino te masei ki te masei, kae ke fai mo otou fakamoemoega i taimi katoa a te fai mea 'lei o te sua tino ki te sua tino, pela foki ki tino katoa.

16Ke loto fia'fia faeloa koutou,

17kae 'talo foki i taimi katoa,

18ke loto fakafetai foki koutou ki mea katoa. Tenei te mea e manako ki ei te Atua mai i a koutou, i te otou olaga i a Keliso Iesu.

19Sa 'teke ne koutou a galuega a te Agaga Tapu i loto i a koutou.

20Sa taumafai o taku fakaseaoga ne koutou a muna fakapelofeta.

21E 'tau o iloa ne koutou te kesekesega o te masei mo te 'lei, kae puke mautakitaki ki te mea 'lei,

22kae 'teke ki mea ma'sei katoa.

23A te Atua tela e aumai ne ia a te filemu, ke faka'ma katoatoa ne ia koutou mō ia, ke tausi foki ne ia otou agaga katoa, loto mo foitino mai mea ma'sei, i te taimi e foki mai ei a te Aliki ko Iesu Keliso.

24A ia tela e kalaga atu ki a koutou, ko ia eiloa tena e fai ne ia, me fakamaoni eiloa a ia!

25Taina, ke 'talo foki koutou mō matou.

26Fakatalofa ki taina katoa i te sogi tapu.

27Ko fakatagi atu au i te pule a te Aliki, ke faitau ne koutou a te tusi tenei ki taina katoa.

28Ke i a koutou a te alofa tauanoa o te tou Aliki ko Iesu Keliso.