TEUTELONOME 8 - Tuvalu Revised Bible

Ko te Fenua Gali

1“Tausi fakalei ki tulafono katoa konei ko oti ne avatu ne au ki a koutou i te aso nei, ko te mea ke ola koutou, ke tokouke otou fanau, kae ke maua foki ne koutou a te fenua tela ne tuku ne te Atua ki otou tupuga.

2Masaua te takiga a koutou ne te Aliki te otou Atua i te malaga loa a koutou i loto i te vao i tausaga e fasefulu konei ko teka; masaua foki a mea faigata ne aumai ne ia ki a koutou ke tofotofo ei koutou, ko te mea ke iloa tonu ne ia a mea e mafaufau koutou o fai, ke iloa foki ne ia me ko koutou e tausi ki ana fakatonuga me ikai.

3Mata 4.4; Luka 4.4 Ne fai ne ia koutou ke fiakai, kae oti aka, aumai foki ei ne ia te manai ke kai koutou i ei, te meakai tena e seki kai eiloa koutou io me ko otou tupuga ki ei. Ne fai ne ia te mea tena ke akoako ei koutou, ke iloa ne koutou me i te tagata e se tau o fakalagolago fua ki meakai ke ola a ia, kae ke fakalagolago foki ki muna katoa e fai mai ne te Aliki.

4I tausaga konei e fasefulu, a otou gatu e seki masei eiloa, mo otou vae foki e seki pala eiloa.

5Masaua i te Aliki te otou Atua e fakatonu kae fakasala ne ia koutou e pela mo te mea e fai ne te tamana ki ana tamaliki.

6Tela la, ke fai ne koutou te mea ne fakatonu atu ne te Aliki ki a koutou, kae tautali i ana tulafono, kae mataku ki a ia.

7Ko aumai nei koutou ne te Aliki te otou Atua ki te fenua laukele ola — se fenua e isi ne vaitafe mo vaipuna i ei, mo vai i lalo o te laukele kola e tafe ki loto i vanu mo mauga foliki;

8se laukele e fua mai i ei a saito mo kalite mo vine mo mati mo pomekalanite, mo olive mo hani.

9Ka seai se tino e fiakai io me e manako ki se mea i te fenua tena. A kaupapa i te fenua tena e maua i ei te fiti; mo te palasi e maua foki i mauga o te fenua tena.

10E maua katoa a mea katoa e fiakai koutou ki ei i te fenua tena, tela la, ka viki kae fakafetai koutou ki te Aliki te otou Atua e tusa eiloa mo te fenua laukele ola tena ne avatu ne ia mo koutou.

Sa Fulitua ki te Aliki

11 Hose 13.5,6 “Masaua ke sa puli i a koutou a te Aliki te otou Atua; masaua o tausi ana tulafono katoa konei ka avatu ne au ki a koutou i te aso nei.

12Kafai ko malie koutou i meakai e maua ne koutou, kae ko toka foki otou fale gali ne faite,

13kae ko uke foki otou pulumakau mo mamoe mo siliva mo aulo, mo nisi mea a koutou ko gasolo o uke,

14masaua la, ke mo a e maua ne koutou te loto fakamatamata kae fakapuli i otou loto a te Aliki te otou Atua tela ne fakasao ne ia koutou mai Aikupito, te fenua ne nofo pologa ei koutou.

15Ne takitaki ne ia koutou i te vao lasi kae fakamataku, tela e uke i ei a gata mo akalava poisini. Ne fai ne ia ke tafe mai te vai mai i loto i kaupapa ke inu ei koutou, me i te koga tena ne olo ei koutou se koga e seai ne vai i ei.

16Ne avatu ne ia te manai i kona ke kai koutou i ei, ko te meakai tena e seki kai eiloa ki ei otou tupuga. Ne fakaoko atu ne ia a mea faigata e uke ke tofotofo ei te otou fakatuanaki, ko te mea kafai e tumau koutou i te fakatuanaki kae ka fakamanuia ne ia koutou o avatu a mea gali e uke ma koutou.

17Tela la, ke mo a eiloa e manatu koutou pela i a koutou ko maumea ne fai eiloa ne koutou.

18Masaua me ko te Aliki te otou Atua ne fai ne ia koutou ke maumea. Ne fai ne ia te mea tena, me koi tumau eiloa tena fakamaoni i aso nei ki te feagaiga tela ne fai ne ia mo otou tupuga.

19Sa puli lele eiloa i a koutou a te Aliki te otou Atua, sa fulitua atu foki ki a ia o tapuaki kae tavini atu ki nisi atua. Kafai e se fakalogo mai koutou ki aku muna kona ne fai atu, ko koutou ka 'ta fakapalele.

20Kafai e se fakalogo koutou ki te Aliki, ko koutou ka 'ta fakapalele e pela eiloa mo malo kola e 'ta sale ne ia i te taimi e olo atu ei koutou ki mua.