SALAMO 50 - Tuvalu Revised Bible

Ko te Tapuakiga Tonu

1A te Aliki, te Atua Tafasili i te Malosi, ko faipati mai;

Ko kalaga atu a ia ki te lalolagi katoa, mai te saegala ki te togala.

2Ko maina mai te Atua mai Siona,

Te fa'kai tafasili i te gali.

3Ko vau te tou Atua, kae se vau filemu;

A te afi 'ka ulaula e vau i ona mua,

Ka ko te afā lasi e fakatamilo i a ia.

4E kalaga a ia ki te lagi mo te lalolagi ke fai mo ana molimau,

Ke lavea ne latou te fakamasinoga ne ia o tena fenua.

5Ana muna, “Fakapotopoto mai ki a au oku tino fakamaoni,

Ko latou kola ne fai feagaiga mo au i te faiga o te taulaga.”

6Ko folafola mai ne te lagi i te Atua e amiotonu,

Ko ia eiloa te famasino.

7“Oku tino, fakalogologo mai i a au ka faipati atu;

Isalaelu, au ka taku tonu atu ki a koe,

i au ko te Atua, te otou Atua.

8E se fakatonu atu ne au koe i au taulaga,

Mo taulaga 'sunu foki kola e aumai sale ne koe ki a au.

9E se manako foki au ki pulumakau mai au lafu pulumakau,

io me ko kouti mai au lafu kouti,

10A manu katoa o te vao e a aku, e pena foki a pulumakau,

i luga i afe mo afe o mauga.

11A manu lele katoa e a aku, e pena foki mo mea ola katoa i te laukele.

12“Moi ne fiakai au, e se fakailoa atu eiloa ne au,

Me i te lalolagi mo mea katoa i ei e a aku.

13E a, au e kai ki kano o pulumakau tagata io me inu foki ki toto o kouti?

14Ke fai au tinoga fakafetai mo taulaga ki te Atua,

Ke tuku atu foki ki te Atua e o ia te Malosi Katoatoa a mea katoa ne folafola ne koe.

15Kalaga mai ki a au i taimi o puapuaga;

Ka fakasao ne au a koe, ko viki mai ei koe ki a au.”

16Ka ko te Atua, e faipati atu penei ki te tino amio masei:

“Se a te mea e soona takutaku ei fua ne koe aku fakatonuga?

Se a foki te mea e soona faipati fua ei tou gutu ki taku feagaiga?

17I a koe e ita ma fakatonu atu ne au a koe;

E 'teke foki ne koe aku fakatonuga.

18A koe e fakataugasoa ki so se tino kaisoa e lavea ne koe,

Kae fakatakaga foki koe ki tino mulilua.

19“E faigofie faeloa koe o faipati ki muna masei;

E vave foki koe o faipati ki te loi.

20E toka faeloa koe o 'moli ke fakamasino ou taina tonu eiloa,

Kae taumafai foki koe o salasala ne mea e 'se ei latou.

21Ko oti ne fai ne koe a mea katoa konei,

Kae seai eiloa saku muna ne fai atu,

Tena ko manatu ei koe pela i a taua e 'pau.

Kae nei, ka fakasala ne au koe, ko te mea ke iloa ne koe te tanuga.

22“Faka'logo mai ki te mea tenei, a koutou kola se saga mai ki a au,

i a koutou ma fakamalaia ne au,

Kae ka seai se tino e fakaola ne ia koutou.

23A te tinoga fakafetai, ko te taulaga tena e vikia ei au,

Kae ka fakaola eiloa ne au a tino katoa kola e faka'logo mai ki a au.”