1Ne fanake a Mose mai i kogā koga laugatasi o Moapi, o fano ki luga i te Mauga o Nepo, ki te ulu o te Mauga o Peseka, i te feitu ki te saegala o Ieliko. I kona, ne fakaasi atu ei ne te Aliki ki a ia a te fenua katoa: ko te kogā laukele o Kileata tela e oko atu eiloa ki te fa'kai o Tanu i matu;
2ko te koga laukele o Nafatali; ko koga laukele o Efalaima mo Manase; ko te koga laukele o Iuta tela e oko ki te Tai Metitilani i te togala;
3te feitu ki saute o Iuta; mo te koga laugatasi tela e vau mai Soala ki Ieliko, te fa'kai o lakau ko pama.
4Kene 12.7; Kene 26.3; Kene 28.13 Muna a te Aliki ki a Mose, “Tena te fenua ne tauto ei au ki a Apelaamo, Isaako mo Iakopo ke tuku atu ki tino o olotou gafa. Ko tuku atu ne au ke kilo ou mata ki ei, kae ka se oko atu koe ki ei.”
5Tena la, ne mate atu te tavini a te Atua ko Mose, i te fenua o Moapi, e pela eiloa mo muna a te Aliki.
6Ne tanu a ia ne te Aliki i te vanu e tasi i Moapi, tela e luta mo te fa'kai o Petepeolo, kae i aso nei, e seai se tino e iloa tonu ne ia te koga ne tanu ei a Mose.
7A Mose ne mate ka ko tusa mo te selau luasefulu tausaga o tena olaga; a ia koi malosi eiloa, mo ona mata koi lei foki eiloa.
8A tino Isalaelu ne tagi fanoanoa i aso e tolusefulu, i te kogā koga laugatasi o Moapi, i te mate o Mose.
9Ne fakafonu a Iosua te tama tagata a Nuno i te poto, me i a ia ne fili ne Mose ke sui i a ia. Ne fakalogo eiloa a tino Isalaelu ki a Iosua, kae tausi eiloa ki fakatonuga kola ne aumai ne te Aliki e auala i a Mose.
10 Eso 33.11 E seai eiloa se pelofeta i Isalaelu e pau mo Mose; ne fakafesagai fakalei eiloa mo te Aliki kae faipati.
11E seai eiloa se pelofeta kai fai ne ia a vavega pela mo vavega kola ne fai ne Mose ki te tupu o Aikupito, mo ana ofisa mo te lotou fenua katoa, i te fakatonuga a te Aliki.
12E seai foki se pelofeta kai fai ne ia a mea fakamataku kola ne fai ne Mose i mua o tino Isalaelu katoa.
Who We AreWhat We EelieveWhat We Do
2025 by iamachristian.org,Inc All rights reserved.
