1 SAMUELU 14 - Tuvalu Revised Bible

Ko te Mea Fakaofoofogia ne Fai ne Ionatana

1I te aso e tasi, ne fai atu a Ionatana ki te tamataene tela e pukepuke ne ia ana mea tau penei, “Taua ka olo ki te koga o te kau Filisitia.” Ka ko Ionatana e seki fakailoa ne ia tena mea ka fai ki tena tamana ko Saulo,

2tela e fakatu tena faleie i lalo o te lakau ko te pomekalanite i Mikilone, e se 'mao mai Kipea; e tusa mo te onoselau tagata o tena kautau.

3A te faitaulaga tela e pei ki te efota ko Aita, te tama tagata a te taina o Ikapoti ko Aitupa tela ko te tama tagata a Fineaso kae ko te mokopuna o Eli, te faitaulaga a te Aliki i Sailo. E se iloa ne te kau a Ionatana i a Ionatana ko oti ne fano.

4Kafai a Ionatana e fai ke fano a ia ki te koga e nofo ei a te kau Filisitia, e tau a ia o ulu atu i loto i te auala i va o mauga o Mekemase. E isi ne fatu lasi eiloa e lua i feitu takitasi o te auala i va o mauga kona: te fatu e tasi e igoa ko Posese, ka ko te sua fatu e igoa ko Senē.

5A te fatu e tasi e tu i te feitu ki matu o te auala i va o mauga kona, kae fakasaga ki Mekemase, ka ko te sua fatu e tu i te feitu ki saute, kae fakasaga ki Kepa.

6Muna a Ionatana ki te tamataene tena ne olo mo ia, “Vau i a taua ka olo atu ki te koga o te kau Filisitia fapaupau kona. Se taumate kaati ka fesoasoani mai te Aliki ki a taua; kafai eiloa e tonu e fesoasoani mai te Aliki, ko tena uiga e tuku mai eiloa ne ia te manumalo ki a tatou, faitalia te mutana o te kau a tatou.”

7Ne tali atu te tamataene penei, “So se mea e manako koe o fai, au e kau atu eiloa i a koe.”

8Muna a Ionatana, “Ko 'lei.” “Taua e olo ke matea mai taua ne te kau Filisitia.

9Kafai e fai mai ke fakatali taua ke oko mai latou ki a taua, kae ka tu eiloa taua i te koga ne tu ei taua.

10Kae kafai e fai mai ke olo atu taua ki a latou, taua e olo eiloa, me e tena te fakailoga me ko oti ne aumai ne te Aliki te manumalo ki a tatou.”

11Tena ne olo atu ei laua ke lavea laua ne te kau Filisitia, tela ne fai aka ei te kau Filisitia penei, “Kilo atu! Ko o'mai ki tua a nisi tino Epelu mai puga ne muni ei latou!”

12Tena ne kalaga mai ei latou ki a Ionatana mo te tamataene penei, “O'mai ki luga nei! E isi se fekau a matou e fia fai atu ki a koulua!”

Muna a Ionatana ki te tamataene penei, “Tautali mai i a au. Ko oti ne tuku mai ne te Aliki ki a Isalaelu te manumalo.”

13Ne kake aka Ionatana mai te auala i va o mauga, kae ne tautali atu i a ia a te tamataene tela ne olo mo ia. Ne taua atu a Ionatana ki te kau Filisitia kona, siga katoa ei te kau Filisitia kona ki lalo, kae vau te tamataene, tamate katoa ne ia.

14I te fepakiga tena, ne 'ta ne Ionatana mo te tamataene tena e tusa mo te tino lua tagata i te koga e tai maua te kuata eka i te lasi.

15Ne mataku katoa a tino Filisitia i te kogā fenua tena; a te kautau mo sotia i te koga e manava ei te kau Filisitia ko polepole fua i te mataku; ne galulu te laukele, tena, ne fakatau tele valevale ei a tino i te mataku.

Filisitia ko Takavale

16A te kau a Saulo kola e tu o onoono ki te fili i Kipea, i te laukele o Peniamina, ne matea ne latou te kau Filisitia ko fakatau tele valevale fua.

17Tena ne fai atu ei a Saulo ki tena kau penei, “Lau aka a sotia me ko oi te tino e galo.” Ne lau ne latou, kae maua aka nei ko Ionatana mo te tamataene tela e pukepuke sale i ana mea tau.

18Tena ne fai atu ei a Saulo ki a Aita te faitaulaga penei, “Aumai te efota ki konei.” I te aso tena, a Aita e pei ki te efota i mua o tino Isalaelu katoa.

19I te taimi ne faipati ei a Saulo ki te faitaulaga, ka ko te kau Filisitia ko gasolo eiloa o se iloa o fai se mea, i loto eiloa i te lotou koga, tena ne fai atu ei a Saulo ki te faitaulaga penei, “Ko seai se taimi e faipati atu ei koe ki te Aliki!”

20Tena ne olo atu a Saulo mo tena kau o taua ki te kau Filisitia kola ko fakatau taua eiloa i a latou, me ko numi valevale olotou mafaufau.

21E isi ne tino Epelu ne kau i te kau Filisitia, ko 'fuli mai o kau i a Saulo mo Ionatana.

22A nisi tino Epelu, kola ne muni i mauga foliki o Efalaima, ko logo i te kau Filisitia ko tele valevale, tena ne kau atu foki latou o taua atu ki tino Filisitia,

23taua atu eiloa ke oko ki Petavene kae silia atu foki mo Petavene. Tela la, ko te Aliki ne fakasao ne ia Isalaelu i te aso tena.

Ko Mea ne Tupu i te Otiga o te Taua

24A tino Isalaelu ko vaivai eiloa i te fiakai i te aso tena, me i a Saulo ne tauto penei: “Ke malaia so se tino e kai ki ne meakai i te aso nei, kae koi tuai ei o fakasala ne au oku fili.” Tela la, e seai eiloa se tino ne kai i te aso tena.

25Ne oko latou ki te toga vao, maua ei ne latou a hani i koga katoa i kona.

26A te vao ko fonu eiloa i te hani, kae e seai eiloa se tino ne kai ki ei me e mataku katoa i te fakamalaiaga a Saulo ne fai.

27Ka ko Ionatana e seki lagona ne ia te fakamalaiaga a Saulo ne fai, tena ne soka atu ei tena lakau tela e pukepuke i ona lima ki te koga e tuku ei hani, kai ei ne ia ne mu hani. Tena, tai pela aka eiloa tena foitino.

28Kae e tokotasi te tagata ne faipati aka penei, “A matou ko vaivai katoa i te fiakai, i tou tamana ne tauto penei, ‘So se tino e kai ki ne meakai i te aso nei e malaia.”’

29Ne tali atu Ionatana, “Ko oko eiloa i te se 'lei o te mea ne fai ne toku tamana ki 'tou tino! Kilo mai la i a au ko malosi faka eiloa i taku kaiga ki mu hani!

30Moi ne kai a otou tino ki meakai ne puke mai ne latou mai te fili, e penei e sili atu te malosi o latou. Moi ne fai pena e penei e tokouke atu olotou tino Filisitia e 'ta!”

31I te aso tena, ne fakatakavale ne Isalaelu a te kau Filisitia, i te taua a latou mai Mekemase ke oko eiloa ki Aitialona. I te taimi tena, a tino Isalaelu ko oko eiloa i te vaivai i te fia 'kai,

32tena ne tele atu ei latou ki mea kola ko oti ne puke ne latou mai te fili, ne puke ne latou a mamoe mo pulumakau, 'ta ne latou i kona, kae 'kai a kano manu mo toto eiloa koi isi i ai.

33

34Ne toe fai atu sua fakatonuga a ia penei, “Olo o fai atu ki tino ke aumai olotou pulumakau mo mamoe ki konei. Ka 'ta ne latou i konei, kae kai foki i konei; e se tau mo latou o kai a kano manu mo toto i ei, me e agasala ei latou ki te Aliki.” Tena, i te po tena, ne o'mai katoa latou mo olotou pulumakau, 'ta ei i kona.

35Ne faite ne Saulo se fata-fai-taulaga ki te Aliki, ko tena fata-fai-taulaga muamua eiloa ne faite.

36Muna a Saulo ki tena kau, “Tatou ka olo o taua ki te kau Filisitia i te po, taua atu eiloa ki a latou ke oko ki te vaveao, kae tamate katoa latou.”

Ne tali atu tena kau, “E pule eiloa koe i te mea e fakatau ifo koe e tau o fai.”

Kae ne fai atu te faitaulaga penei, “Fakatali ke fesili aka mua tatou ki te Atua.”

37Tena ne fesili atu ei a Saulo ki te Atua penei, “E a, e tau o taua atu au ki te kau Filisitia? Ea, e tuku mai ne koe te manumalo ki a matou?” Ka ko te Atua e seki tali mai i te aso tena.

38Tena ne fai atu ei a Saulo ki takitaki o te fenua i te aso tena, “O'mai o sala aka me se a te agasala ne fai ne te tou fenua i te aso tenei.

39Au e tauto i te igoa o te Aliki ola, tela e aumai ne ia te manumalo ki Isalaelu, me i te tino ne fai ne ia te agasala e tamate, faitalia manafai ko taku tama ko Ionatana.” Kae e seai eiloa se tino ne faipati.

40Tena ne fai atu ei a Saulo ki a latou penei, “Mai katoa koutou kona o tu i konei, ka ko maua mo Ionatana e tu i te koga tela.”

Ne tali atu a tino penei, “Fai te mea e fakatau ifo koe e 'lei.”

41 tali mai ki a au i te Tumema ” A te tali e fakaasi mai, me ko Saulo mo Ionatana; tena la, ko 'sao ei te fenua.

42Ne fai atu Saulo, “Fakailoa mai me ko au me ko Ionatana.” Ne fakaasi mai, ko Ionatana.

43Tena ne fesili atu ei a Saulo ki a Ionatana penei, “Se a te mea tenei ko fai ne koe?”

Ne tali atu Ionatana, “Au ne kai ki mu hani. Tenei au, au ko toka o mate.”

44Muna a Saulo ki a ia, “Ke tamate au ne te Atua manafai e se ave koe o tamate!”

45Ka ko tino Isalaelu ne fai atu ki a Saulo penei, “E a, e tamate eiloa Ionatana, te tino ne aumai ne ia te manumalo ki Isalaelu? Ikai! Matou e tauto i te igoa o te Aliki ola, me e seai eiloa se laulu o tena ulu e fakapakia. A te mea ne fai ne ia i te aso nei ne fai mo te fesoasoani mai o te Atua.” Tena, ne fakasao ei ne te vaitino a Ionatana mai te mate.

46Oti aka mea kona, seki toe fanatu a Saulo o afuli te kau Filisitia, kae ne foki atu ei latou ki te lotou laukele.

Ko te Nofoaiga a Saulo mo tena Kaiga

47I te faiga o Saulo mo tupu o Isalaelu, ne taua atu a ia ki ona fili katoa i koga katoa: ko tino Moapi, tino Amoni, mo tino Etoma, ko tupu o Sopa, mo tino Filisitia. So se koga e taua ei a ia, e manumalo eiloa a ia.

48Ne taua a ia mo te loto toa, kae ne fakatakavale foki ne ia a tino Amaleka. Ne fakasao faeloa ne ia Isalaelu mai fili katoa kola e o'mai o taua ki a latou.

49A tama tagata a Saulo, ko Ionatana, Isivi, mo Malekisua. A tena tama fafine matua ko Melapa, ka ko te tama fafine foliki ko Mekala.

50A tena avaga ko Ainoama, te tama fafine a Aimaasu; a te takitaki o tena kautau ko tena faitaina ko Apinelu, te tama a te taina o tena tamana ko Nelu.

51A te tamana o Saulo ko Kiso mo te tamana o Apinelu ko Nelu, ko tama a Apielu.

52I aso ne ola ei a Saulo, e taua fakamalosi faeloa a ia ki tino Filisitia. Tela la, kafai e maua ne ia se tagata malosi kae toa, e faulu eiloa ne ia tena igoa ke kau i tena kautau.