1 SAMUELU 18 - Tuvalu Revised Bible

1Ko oti nei te sautalaga a Saulo mo Tavita, ka ko Ionatana, te tama tagata a Saulo, ko oko eiloa i te fiafia ki a Tavita, tela la, ko oko eiloa i tena alofa ki a Tavita, e pela eiloa mo tena alofa ki a ia eiloa.

2Tena, ne taofi ei ne Saulo a Tavita mai te aso tena, seki toetuku atu ne ia ke toe foki atu ki tena tamana.

3Ne tauto Ionatana ke taugasoa laua mo Tavita ke oko eiloa ki te se gata mai, me i a ia e fiafia malosi eiloa ki a Tavita.

4Ne tapale ne ia te gatu loa e pei ei a ia, tuku atu ei ne ia mo Tavita, pela foki tena gatu tau, mo tena pelu mo tena kausana mo tena fusi.

5Ne iku manuia faeloa a Tavita i tiute katoa kola ne uga atu ei a ia ne Saulo ke fano o fai, tela la, ne fakamasiki aka ei a ia ne Saulo ke fai mo ofisa i tena kautau. Ne loto fiafia katoa a ofisa a Saulo ki te faiga tena, pena foki tena kau katoa.

Saulo ko Lotomasei ki a Tavita

6I te fokimaiga o Tavita i te fakatakavalega o Koliata, mo sotia foki ko foki atu ki olotou fale, ne o'mai a fafine mai fa'kai fo'liki katoa o Isalaelu o fakafetaui atu ki a Saulo. E usuusu mai olotou pese fiafia, kae saka'saka mai, kae tata mai samupelini mo kitala.

71Samu 21.11; 29.5 I olotou fiafiaga, ne usu ne fafine olotou pese penei, “Ne tamate ne Saulo e taki toko afe, ka ko Tavita i taki sefulu afe.”

8Ne seki fiafia Saulo ki te vaega pese tena, tena ne kaitaua ei a ia. Muna a ia, “E fai mai latou i a Tavita e 'ta ne ia te fili i taki sefulu afe, ka ko au i taki afe fua. E iku eiloa o fai ne latou a Tavita mo tupu e sui i a au!”

9Tena ne nofo ei a ia mo te loto masei ki a Tavita mai te taimi tena.

10I te aso e tasi, ne vau te agaga masei mai te Atua o ulu ki a Saulo, tena ne sāua ei a ia i tena fale e pela me se tagata fakavalevale. I te taimi tena, a Tavita e tata te kitala, e pela eiloa mo tena masani i aso takitasi, ka ko Saulo e isi se tao e pukepuke i ona lima.

11Ne mafaufau aka Saulo penei, “Ka velo ne au a ia ke 'mau tasi mo te 'pui,” tena ne velo atu ei ne ia Tavita ki te 'tao e fakalua taimi; kae ne fakaseke faeloa ne Tavita.

12A Saulo ko mataku ki a Tavita, i te Aliki e fakatasi ki a Tavita, kae ko se fakatasi ki a ia.

13Tena, ne uga atu ei ne ia a Tavita ke fano, kae tuku atu ne ia ke takitaki i te toko afe tagata. Ne 'taki sale ne Tavita tena kau ki te taua,

14kae e manuia faeloa i ana mea katoa e fai, me i te Aliki e fakatasi faeloa ki a ia.

15Ne lavea ne Saulo te fanofano lei o mea e fai ne Tavita, tela ko na gasolo eiloa a ia o mataku i a Tavita.

16Ka ko tino katoa i Isalaelu mo Iuta, e fiafia katoa ki a Tavita me se takitaki e manuia faeloa i ana mea e fai.

Tavita ko Avaga ki te Tama Fafine a Saulo

17Muna a Saulo ki a Tavita, “Tenei taku tama fafine matua ko Melapa. Ka tuku atu ne au ke avaga mo koe, manafai e tavini mai koe ki a au o fai mo sotia toa kae fakamaoni, kae o fano sale o taua i te taua a te Aliki.” Ne mafaufau Saulo me i te faiga tena, e iku Tavita o mate i te kau Filisitia, tena ko se fi'ta ei a ia o taumafai o tamate.

18Ne tali atu Tavita, “Ko oi au, kae ko oi foki oku kaiga, ke avaga atu au ki te tama fafine a te tupu?”

19Kae i te oko atuga ki te taimi ko tau ei o avatu Melapa ki a Tavita, ne seki ave ki a Tavita kae ne ave fua ki te tagata e igoa ko Atilielu mai Meola.

20Ne fiafai a Tavita mo Mekala, te tama fafine a Saulo, tena ne fiafia ei a Saulo i te taimi ne logo ei.

21Ne mafaufau aka a ia penei, “Ka tuku ne au a Mekala ki a Tavita; ka fai ne au a Mekala ke malei ei a Tavita, tena ka tamate ei a ia ne tino Filisitia.” Tela la, ko te lua o taimi tenei ko toe fai atu a Saulo ki a Tavita penei, “A koe ka avaga mo taku tama fafine.”

22Ne fakatonu atu a Saulo ki ana ofisa ke faipati atu ki a Tavita, kae ke fai atu ki a ia penei, “A te tupu e fiafia ki a koe pela foki ana ofisa katoa; tenei te taimi 'lei ke na avaga atu koe ki tena tama fafine.”

23Tena, ne fakailoa atu ei ne latou ki a Tavita te mea tena, kae tali mai mo Tavita penei, “Se tulaga tafasili i te maluga manafai e avaga atu koe ki se tama fafine a se tupu, ko to maluga te tulaga tenei ki a au, i a au se tino mativa fua kae seai se aoga.”

24Ne fakailoa atu ne ofisa ki a Saulo a muna a Tavita,

25tena ne fakatonu atu ei a Saulo ki a latou ke fai atu ki a Tavita te fekau tenei: “A te mea e manako ki ei te tupu mai i a koe, e togi ei te fafine, ko muā pakili o tagata Filisitia e tokoselau kola ko oti ne mate, e taui atu ei olotou mea ne fai.” Tena te fuafuaga a Saulo ne fai, ko Tavita ke tamate ne te kau Filisitia.

26Ne fai atu ne ofisa a Saulo te fekau tena, tena ne fiafia ei Tavita i a ia ka avaga ki te tama fafine a te tupu. Kae koi tuai o oko ki te aso o te fakaipoipoga,

27ne olo atu a Tavita mo tena potukau, tamate ei ne latou e luaselau tagata Filisitia. Tena, ne avatu ne ia olotou muā pakili ki te tupu, ko ia ke avaga mo te tama fafine a te tupu. Tena, ne tuku atu eiloa ne Saulo tena tama fafine ko Mekala ke avaga mo Tavita.

28Ne iloa faka'lei aka ne Saulo, i te Aliki e fakatasi eiloa ki a Tavita, mo tena tama fafine foki ko Mekala e alofa eiloa ki a Tavita.

29Tena, ne gasolo aka eiloa a ia o mataku i a Tavita, kae ne fai fili eiloa ki ei i aso o tena olaga.

30A te kau Filisitia e mai sale eiloa o taua, kae i taua katoa a latou, ko Tavita eiloa e sili atu tena manumalo i nisi ofisa aka a Saulo. Tena la, a Tavita ko gasolo eiloa o takutakua malosi.