2 TUPU 7 - Tuvalu Revised Bible

1Ne tali atu Elisaia, “Fakalogo mai ki muna a te Aliki! I te taimi penei ma taeao, ka mafai ne koe o togi i Samalia se tolu kilokalame o te saito tafasili i te 'lei io me se ono kilokalame o te kalite i te tupe siliva e tasi.”

2Muna a te ofisa a te tupu ki a Elisaia penei, “E se mafai lele eiloa o taunu tau muna tena ne fai, faitalia foki eiloa manafai e faka'to ifo nei eiloa ne te Atua te vaiua!”

Ne tali atu a Elisaia, “Ka lavea ne koe te fakataunuga o aku muna kona ne fai, kae ka se kai lele eiloa koe ise meakai i meakai kona.”

Ko Foki atu te Kautau Sulia

3E tokofa tagata lepela kola e nofo i tua o te fa'kai ne fai aka olotou muna penei, “Ai a ka nofo fua ei tatou konei ke mate tatou?

4E seai se aoga e olo ei tatou ki te fa'kai me i a tatou e mate fua i te fia'kai i ei; kafai e nofo tatou i konei, tatou e mate foki. Kae e 'lei ke olo tatou ki te koga e 'nofo ei a te kautau a Sulia. Kafai e tamate ne latou tatou, e 'lei faeloa i a tatou foki la ne tino e tau o mate. Kae e manuia tatou manafai e fakasao tatou ne latou.”

5Tena la, i te afiafi, ko kamata o pouli, ne olo atu ei latou kona ki te koga e nofo ei a te kau Sulia, kae i te oko atuga a latou, e seai eiloa se tino i te koga tena.

6A te Aliki ko oti ne fai ne ia a te kau Sulia ke lagona ne latou se gulu o se kautau lasi e fanatu ki te koga e nofo ei latou, mo solofanua mo kaliota; tena la, ne mafau'fau te kau Sulia i te tupu o Isalaelu ne togi ne ia a te tupu o Aikupito mo te tupu o tino Heti ke olo atu mo olotou kau o taua ki a latou.

7Tena la, i te afiafi tena, a tino Sulia ne tele ke ola latou, kae tiakina olotou faleie, solofanua, mo asini mo mea katoa a latou.

8I te oko atuga o te tokofa tagata lepela kona ki te mata o te koga e nofo ei te kau Sulia, ne ulu atu latou ki loto i te faleie, kai aka kae inu i kona, puke aka foki ne latou a siliva mo aulo mo gatu, ave ei ne latou o funa i se koga. Ne foki mai latou, toe ulu atu ki loto i te sua faleie, toe fai foki ne latou a mea kola ne fai ne latou i te faleie muamua.

9Ne toe fai aka olotou muna i a latou eiloa penei, “E se tau o fai ne tatou a te mea tenei! A te mea tenei se tala fakafiafia, e tau o na fakailoa atu ne tatou. Kafai e fakatali tatou ke taeao ko fakailoa atu ei ne tatou, kaati e iku eiloa tatou o fakasala. Tatou ka olo o fakailoa ki ofisa a te tupu!”

10Tena ne tiakina ei ne latou a te koga tena ne nofo ei te kau Sulia, kae foki atu ki Samalia. Ne ka'laga atu latou ki sotia leoleo o te mataloa penei, “A matou ne olo ki te koga ne nofo ei a te kau Sulia kae seai eiloa se tino ne lavea ne matou i ei, seai foki ne leo e lagona atu, a solofanua mo asini e mau mai eiloa i koga ne sai i ei, mo faleie, kola eiloa e tu mai.”

11Ne fakasalalau atu ne leoleo kona a te tala tena, tena ne lipoti atu ei ki te palesi.

12I te taimi koi po faeloa, ka ko te tupu ne pula aka mai tena moega kae fai atu ki ana ofisa penei, “E iloa ne au a te togafiti a te kau Sulia! E iloa ne latou i te oge meakai tenei e poko i konei, tena la, ko tiaki ei te koga ne nofo ei latou o olo o muni i te vao. I te lotou mafaufau me ka tiiaki ne tatou a te fa'kai tenei o olo o sala meakai, tena ko mai ei latou o puke fakapagota tatou, kae puke mo te fa'kai.”

13Ne faipati aka mo tena ofisa e tokotasi penei, “A tino i te fa'kai tenei ko se aoga, ko pela eiloa me ne tino ko leva ne mate. Tela la, e lei ke uga ne tatou ne tino ke olo i solofanua e lima konei e toe, ke iloa tonu ne tatou me se a te mea ko tupu.”

14Ne fili aka ne latou a tagata, tuku atu ei ne te tupu e lua kaliota ke olo i ei, mo te fakatonuga ke onoono faka'lei me se a te mea ko tupu ki te kautau a Sulia.

15Ne oko atu eiloa latou kona ki te Iolitana, kae i te auala, ne lavea ne latou a gatu mo nisi mea kola ne tiakina ne te kau Sulia i te taimi ne tele ei latou. Tena ne foki atu ei latou o fakailoa ki te tupu.

16Ne olo atu a tino Samalia o puke mai a mea i te koga ne nofo ei te kautau a Sulia. Tela la, a te tolu kilokalame o te saito tafasili i te 'lei io me ko te ono kilokalame o kalite ko tusa fua mo te siliva e tasi te togi, ko taunu ei a muna a te Aliki ne fai.

17A te ofisa a te tupu tela e oloolo sale mo ia ko oti ne fai ne ia ke pule i te tausiga o te mataloa o te fa'kai. Ne mate a te ofisa tena me ne lakalaka ne tino, e pela eiloa mo muna a Elisaia i te taimi ne fanatu ei a te tupu ki a ia.

18A Elisaia ne fai ko ia ki te tupu me i te taimi penei i te aso a taeao, a te tolu kilokalame o te saito tafasili i te lei io me ko te ono kilokalame o te kalite ka togi i Samalia ki te siliva e tasi,

19ka ko te ofisa tena ne tali aka penei, “E se mafai o tupu se mea pena, vagana foki eiloa manafai e faka'to nei eiloa ne te Aliki se vaiua!” A Elisaia ne tali ki te ofisa penei, “Ka lavea ne koe ki ou mata a te mea tena manafai ko taunu, kae ka se tami eiloa tou gutu ki se meakai.”

20Tena eiloa te mea ne tupu ki te ofisa tena; ne lakalaka a ia ne tino i te mataloa o te fa'kai.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help