2 NOFOAIGA TUPU 21 - Tuvalu Revised Bible

1Ne mate atu Iosefatu, kae ne tanu i tanuga o tupu i te Fa'kai o Tavita, kae ne sui a ia ne tena tama tagata ko Ieolamo o fai mo tupu.

Ko Ieolamo te Tupu o Iuta(2Tupu 8.17-24)

2A Ieolamo, te tama tagata a Iosefatu, te Tupu o Iuta, e tokoono ana taina: ko Asalia, Ieielu, Sakalia, Asaliau, Mikaeli, mo Sefatia.

3Ne avatu ne te lotou tamana a aulo, siliva mo nisi mea taua e uke ma latou, kae ne tuku atu ne ia ke pule i fa'kai fakaolo o Iuta. Ne fakasopo ne Iosefatu a Ieolamo ke sui i a ia, me ko ia ko te ulumatua.

4I te taimi ko mautakitaki ei te pule a Ieolamo i tena malo, ne tamate katoa ei ne ia ona taina, fakatasi mo nisi ofisa Isalaelu.

5A Ieolamo ne fai mo tupu, ka ko tolusefulu lua ei ona tausaga. Ne pule a ia i Ielusalema i tausaga e valu.

6Ne tautali a ia i amioga masei a te Tupu ko Aapo, mo nisi tupu o Isalaelu, me i a ia ne avaga ki te tama fafine a Aapo. Ne agasala a ia ki te Aliki,

71Tupu 11.36 ka ko te Aliki ne seki manako o ofa te lainā tupu o Tavita, me ko oti ne fai tena feagaiga ki a Tavita, i tupu o Isalaelu ka fakasolo i tino o tena gafa.

8 Kene 27.40 I te taimi o te nofoaiga a Ieolamo, ne 'teke te malo o Etoma ki Iuta, tena ne tu saoloto ei.

9Tena, ne olo atu a Ieolamo mo ana ofisa mo olotou kaliota o puke a Etoma. I kona, ne nikoi ei latou ne te kau Etoma, kae i te po, ne 'sao ei latou mai i te kau Etoma.

10A Etoma i te taimi tena, ko se nofo mai i lalo o te pulega a Iuta. I te taimi foki tena, ne 'teke foki te fa'kai o Lipina, me i a Ieolamo ko tiaki ne ia a te Aliki, te Atua o ona tupuga.

11Ne faite foki ne ia a koga tapuaki fapaupau i fenua malugaluga o Iuta, kae taki ne ia a tino Iuta mo Ielusalema ke agasala ki te Aliki.

12Ne avatu ne te pelofeta ko Elia se tusi ki a Ieolamo, e penei a muna o te tusi: “A koe ko fakamalaia ne te Atua o tou tupuga ko Tavita, me i a koe e seki tautali ki auala o tou tamana ko Iosefatu, io me ko auala o tou tupuna ko Asa.

13A koe ne tautali fua ki auala o tupu o Isalaelu, kae ne taki ne koe a tino Iuta mo Ielusalema ke se fakamaoni ki te Atua, e pela mo Aapo mo tupu ne sui i a ia, kola ne taki ne latou Isalaelu ke se fakamaoni ki te Atua. Ne tamate foki ne koe ou taina, ne tagata e lei atu i a koe.

14Tela la, ka fakasala ne te Aliki a ou tino, au tamaliki, mo au avaga, kae ofa foki au mea katoa.

15Ka ko koe, ka puapuaga kae mae, me ka maua ne koe te masaki ki ou gakau, tela ka gasolosolo faeloa o masei i aso takitasi.”

16E isi ne tino Filisitia mo tino Alapi e nofo pili ki koga e nofo ei a nisi tino Sutana, pili ki te tafatai. Ne uga ne te Aliki a latou ke olo o taua ki a Ieolamo.

17Ne puke ne latou a Iuta, fao a mea taua i te palesi o te tupu, kae ave fakapagota ne latou a avaga katoa a te tupu mo ana tama tagata katoa, ko Asaia fua, te toekimuli, e seki ave.

18I te otiga o mea katoa kona, ne aumai ei ne te Aliki se masaki tigaina ki te tupu, se masaki o te gakau.

19E tai maua eiloa te lua tausaga ne masaki ei te tupu, kae ko oko eiloa i te tigaina i aso takitasi. Ne mate eiloa a ia i tena masaki tena, ne mate mo te tigaina. Ne seki ai se afi ne fakaka ne ana ofisa, i te taimi ne tagi fanoa'noa ei latou ki a ia, e pela mo te mea ne fai ne latou ki ona tupuga.

20A Ieolamo ne fai mo tupu ka ko tolusefulu lua ei ona tausaga. Ne pule a ia i Ielusalema i tausaga e valu. E seai eiloa se tino ne fanoanoa i tena matega. Ne tanu ne latou a ia i te Fa'kai o Tavita, kae seki tanu i tanuga o tupu.