2 TUPU 6 - Tuvalu Revised Bible

Ko Toe Maua te Matā Takū

1I te aso e tasi, ne fakatagi atu a pelofeta kola e pule ne Elisaia, olotou muna, “A te koga tenei e nofo tatou i ei ko to foliki!

2Talia mai ke olo atu matou o kati mai ne lakau mai i te Iolitana mo faite se koga mo omotou nofo.”

Ne tali atu a Elisaia, “Ko 'lei.”

3E isi se tokotasi o latou ne finau atu ki a Elisaia ke fanatu i a latou, tena ne talia ne Elisaia,

4olo tasi katoa ei latou. I te oko atuga a latou ki te Iolitana, kamata eiloa te olotou galuega.

5E isi se tokotasi o latou ne kati ne ia te lakau e tasi, kae e poi eiloa i te mata o tena takū ko to ki loto i te vai. Ne kalaga atu a ia ki a Elisaia penei, “Tou malu, se a nei taku mea ka fai? A te mea nei se takū fua ne akai mai ne au kae e toe faka'foki!”

6Ne sili atu a Elisaia, “Ne to i fea?”

Ne fakasino atu ne te tagata tena te koga ne to i ei, tena ne kati mai ne Elisaia se potu lakau, pei atu ne ia ki loto i te vai, tena ne laga aka ei a te mata o te takū.

7Ne fakatonu atu a Elisaia ki te tagata tena penei, “Puke mai te matā takū mai i te vai,” tena ne punou ifo a te tagata tena o puke aka te matā takū.

Ko Takavale a te Kautau a Sulia

8A te tupu o Sulia i te taimi tenei e taua mo Isalaelu. Ne fai atu a te tupu tena ki ana ofisa, i te kautau a latou e ma'nava i te koga ko oti ne filifili ne ia.

9Ka ko Elisaia ne uga atu tena fekau ki te tupu o Isalaelu, o fakailoa atu ki ei ke sa olo o fakapilipili ki te koga tela, me i te kau Sulia kona e nofo mai i ei o alamati latou.

10Tena ne fakailoa atu ei ne te tupu o Isalaelu ki tagata kona e nofo i kona, tena ne faka'tu ei olotou tino leoleo. E tai uke foki eiloa taimi ne fai sale ei pena.

11A te tupu o Sulia ko oko eiloa i te kaitaua i te mea tena e tupu sale; ne kalaga atu a ia ki ana ofisa kae fesili atu ki a latou penei, “Ko oi te tino i a koutou e kau i te tupu o Isalaelu?”

12Ne tali mai te tino toko tasi mai i a latou penei, “Tou 'Malu, e seai. Ko te pelofeta ko Elisaia e fakaasi sale ne ia ki te tupu o Isalaelu a pati a koe e fai sale, ke oko foki eiloa ki au pati e fai funa i tou potu.”

13Ne fakatonu atu te tupu penei, “Olo o sala Elisaia o puke mai fakapagota.”

I tena logoga i a Elisaia tela e nofo i Totana,

14ne uga atu ne ia se kautau lasi eiloa a ia mo solofanua mo kaliota ki te fa'kai tena. Ne oko latou ki te fa'kai i te po, tena nikoi ei ne latou.

15I te tafataeao, ne pula aka te tavini a Elisaia o fano ki tua, matea ei ne ia a te kau Sulia mo olotou solofanua mo kaliota e nikoi i te fa'kai. Ne foki atu a ia ki a Elisaia kae fai atu penei, “Tou 'malu, tatou ko malaia! Se a nei te tou mea ka fai?”

16Ne tali mai Elisaia, “Sa mataku. E tokouke atu o'tou kau i lo te lotou kau.”

17Tena ne talo ei a ia, muna a ia, “Te Aliki, fakapula aka ona mata ke lavea ne ia!” Ne tali mai te Aliki ki te talo a Elisaia, tena la, i te kilo akega o te tavini a Elisaia, lavea ei ne ia a te feitu o te koga maluga e 'tu mai ei a solofanua mo kaliota afi e fakatamilo i a Elisaia.

18I te taimi ne taua mai ei a te kau Sulia, ko Elisaia eiloa ko talo atu penei, “Te Aliki, fakakivi aka a mata o tagata konei!” Ne tali mai te Aliki ki tena talo, tena ne fakakivi ei ne ia latou.

19Tena, ne fanatu a Elisaia ki te kau Sulia, kae fai atu penei, “A koutou na e o'mai i te auala 'se; e se tenei te fa'kai e sala koutou ki ei. Tau'tali mai ke taki ne au koutou ki te tagata tela e sala ne koutou.” Tena, ne taki atu ei ne ia latou ki Samalia.

20I te ulu atuga a latou ki loto i te fa'kai, ne talo Elisaia penei, “Te Aliki, fakapula aka olotou mata.” Ne tali mai te Aliki ki te talo a Elisaia, tena ne fakapula ei ne ia a mata o te kau Sulia, kae lavea aka nei ne latou i latou ko i loto te fa'kai o Samalia.

21I te laveaga ne te tupu o Isalaelu a te kau Sulia, ne sili atu ei a ia ki a Elisaia penei, “Tou 'malu, e a, e talia ne koe ke tamate ne au te kau kona? E a, ka tamate ne au?”

22Ne tali mai a Elisaia, “ikai. A sotia foki kola ne puke fakapagota i te taua ke mo a e tamate. Tuku atu ne meakai mo mea inu ke kai latou, ko tuku atu ei ke foki ki te lotou tupu.”

23Tena ne fakatoka ei ne te tupu o Isalaelu se 'kaiga lasi ki a latou, kae i te otiga ne kai kae inu, uga atu ei ne ia latou ke foki ki te lotou tupu i Sulia. Mai te taimi tena, ne fakagata ei te faitaua sale o te kau Sulia ki fa'kai o Isalaelu.

Ko te Taumafaiga o Puke Samalia

24I se taimi fakamuli ifo, ne fanatu a Peniata, te tupu o Sulia mo tena kautau katoa o nikoi a te fa'kai o Samalia ke taumafai o puke.

25Tena la, ona ko te kautau a Sulia e nofo fakatamilo faeloa i tua o te fa'kai, tela ko oko eiloa i te maua gata o te meakai i loto i te fa'kai. A te ulu o te asini e tusa mo te valusefulu siliva, ka ko te luaselau kalame o fekau o lupe e lima tupe siliva.

26I te taimi e tasi, ne sasale atu te tupu o Isalaelu i luga i te 'pui o te fa'kai, kae kalaga aka mo te fafine penei, “Tou 'Malu, fesoasoani mai ki a au!”

27Ne tali atu te tupu, “Kafai e se fesoasoani atu a te Aliki ki a koe, se a foki la te fesoasoani ka mafai ne au o tuku atu ki a koe? E isi nei ne aku saito io me ne uaina?

28Se a tou fakalavelave?”

Ne tali mai te fafine, “I te aso e tasi, ne fai mai a te fafine tenei ke kai ne maua taku tama, ka oti ko kai ei foki ne maua tena tama i te sua aso.

29Teu 28.57; Tagi 4.10 Tena, ne tunu aka ei ne maua taku tama, kai ei ne maua. I te sua aso, ne fai atu au ki ei me ko tena tama ka kai ne maua, kae tela la, ko oti ei ne funa tena tama!”

30I te lagonaga ne te tupu a te mea tena, ne saesae ona gatu i te fanoanoa; a tino kola e tu pili ki te 'pui e lavea ne latou a te tupu e pei ki gatu lautaga, mai lalo o ana gatu tonu.

31Ne kalaga aka a ia penei, “A te Atua ke tamate ne ia a au manafai e se kati ne au te ua o Elisaia i te aso eiloa tenei!”

32Tena, ne uga atu ei ne ia tena avefekau ke puke mai a Elisaia.

I te taimi tena, a Elisaia e nofo i tena fale mo nisi toeaina ne olo atu o asi ki a ia. Kae koituai o oko atu a avefekau a te tupu, ne fai aka a Elisaia ki toeaina kola penei, “A te tagata tatino tela, ko uga mai ne ia se tino ke vau o tamate a au! Kafai e oko mai a ia, pono te mataloa, kae sa talia a ia ke vau ki loto. A te tupu tena fua e vau mai tua o tena avefekau.”

33E seki motu atu tena pati tena, kae oko atu mo te tupu, muna a ia, “Ko te Aliki ne aumai ne ia a te fakalavelave tenei ki luga i a tatou! Ai a ka fakatali leva fua ei au ki a ia ke fai mai ne ia se mea?”