ISAIA 12 - Tuvalu Revised Bible

Ko te Pese Fakafetai

1Ka oko mai te aso e usu pese ei a tino penei,

“Te Aliki, e tavae ne au a koe!

A koe ne kaitaua ki a au,

Kae nei, ko fakamafanafana ne koe au kae ko se kaitaua mai foki koe ki a au.

2 Eso 15.2; Sala 118.14 Te Atua ko toku fakaolataga;

Au ka talitonu fakamaoni ki a ia, kae se mataku i se mea.

Ko te Aliki e aumai ne ia ki a au a te mana mo te malosi;

A ia ko toku fakaola.

3E pela mo te vai fou tela e aumai ne ia te fiafia ki tino fiainu,

E pena foki te Atua me ka aumai ne ia te fiafia ki tena fenua,

I te taimi e fakasao ei ne ia latou.”

4Ka oko mai foki te aso e usu ei a pese a tino penei,

“Fakafetai atu ki te Aliki! Kalaga atu ki a ia mo se fesoasoani!

Fakamatala atu ki malo a mea ne fai ne ia!

Fakaasi atu ki a latou i te Atua e takutakua!

5Usu pese atu ki te Aliki ona ko mea fakaofoofogina ne fai ne ia.

A te lalolagi katoa ke logo i te tala o mea ne fai ne te Atua.

6A tino katoa kola e nofo i Siona ke kalaga kae usu pese!

A te Atua tapu o Isalaelu e takutakua,

Kae e nofo fakatasi mo ona tino.”