FAMASINO 21 - Tuvalu Revised Bible

Ko te 'Salaga o ne Avaga ma Tagata Peniamina

1I te taimi ne maopoopo ei a te kau Isalaelu i Mesepa, ne fai te tautoga a latou ki te Aliki penei: “E seai eiloa se tino Peniamina e talia ke avaga mo omotou tama fafine.”

2Tena la, i te taimi tenei, ne olo atu a tino Isalaelu ki Peteli o sagasaga i kona i mua o te Aliki. Ne tagi paka'laga latou mo te fanoa'noa kae fai atu ki te Aliki penei:

3“Te Aliki te Atua o Isalaelu, ai a ne tupu ei te mea tenei? Ai a ka galo atu ei te matakaiga o Peniamina mai i Isalaelu?”

4I te tafataeao o te sua aso, ne faite ne tino Isalaelu se fata-fai-taulaga ki te Aliki i kona, ofo atu ei ne latou olotou taulaga fakafetai, kae 'sunu katoa ne latou nisi taulaga.

5Ne fesili aka latou penei, “E a, e isi se potukau mai matakaiga katoa o Isalaelu e seki fakatasi atu ki te maopoopoga i mua o te Aliki i Mesepa?” E isi se tautoga a latou ne fai me i so se tino e seki fanatu ki Mesepa e tau o tamate.

6Ne fanoa'noa Isalaelu i te taina o latou ko Peniamina, tela ne fai aka ei latou penei, “i te aso tenei, ko galo te matakaiga e tasi o Isalaelu.

7Se a te faiga e mafai ei ne tatou o sala mai ne avaga ma tino Peniamina konei koi toe? Ko oti foki la tatou ne tauto ki te Aliki me e se toe talia a o'tou tama fafine ke avaga ki tino Peniamina.”

8I te fesilisili salega a latou me e isi se potukau i matakaiga o Isalaelu e seki oko atu ki te maopoopoga i Mesepa, kae ne maua aka nei, me e seai eiloa se tino mai i Iapese i Kiliata ne oko atu.

9I te taimi ne fai ei te laulauga o te kautau, ne iloa ei me e seai eiloa se tino Iapese ne oko atu.

10Tena ne uga atu ei ne tino Isalaelu e sefulu lua afe tagata toa eiloa o latou mo te fakatonuga ke tamate katoa a tino i te fa'kai o Iapese, fakatasi mo fafine mo tamaliki.

11Ke tamate katoa a tagata mo fafine kola ko oti ne iloa tagata.”

12Mai i tino ne maua ne latou i te fa'kai o Iapese, e faselau taupou, tena ne avatu ei ne latou ki te koga e nofo ei tino Isalaelu i Sailo, i te fenua o Kanana.

13Ne avatu te fekau a Isalaelu ki tagata Peniamina kola e nofo i te kaupapa o Limoni ke fakagata te taua.

14Tena, ne foki mai a tagata Peniamina kona, kae tuku atu ne tino Isalaelu a tamafine mai Iapese kola e seki tamate ne latou, ki tagata Peniamina kona. A te fakalavelave, e se lava tagata kona i fafine kona.

15Ne fanoa'noa a tino Isalaelu ona ko tino Peniamina, me ko oti ne ave keatea ne te Aliki te matakaiga e tasi o Isalaelu.

16Ne fai aka a pati a takitaki o te maopoopoga penei, “Ko seai ne fafine i te matakaiga o Peniamina. Se a te faiga e sala atu ei ne tatou ne avaga ma tagata kona koi toe mai?

17E se tau mo Isalaelu o tiakina atu tena matakaiga e tasi, mai te sefulu lua matakaiga. E tau nei o sala ne tatou se auala e toe fakaola aka ei te matakaiga o Peniamina.

18A te fakalavelave, e se mafai ne tatou o tuku atu a tou tama fafine ke avaga mo latou, me ko oti ne fakamalaia ne tatou so se tino i a tatou e tuku atu sena tama fafine ke avaga mo se tagata Peniamina.”

19Ne mafaufau aka latou penei, “A te kaiga fiafia a te Aliki i te tausaga, tela e fai i Sailo ko pili mai.” A Sailo e tu i te feitu ki matu o Peteli, kae ki te feitu ki saute o Lepona, kae e tu ki te feitu ki te saegala o te auala i te va o Peteli mo Sekema.

20Ne fai atu a tino Isalaelu ki tino Peniamina penei, “Olo o muni i togā vine

21kae onoono faka'lei. Kafai ko 'mai a tamafine Sailo o saka i te taimi o te kaiga fiafia, ko koutou eiloa ko o'mai ki tua mai togā vine. Ka fai malō ne koutou a tamafine kona ke avaga koutou, ave eiloa ne koutou ki te laukele o Peniamina.

22Kafai e o'mai olotou tamana io me ko tuagaene o latou o ita atu ki a koutou, penei, ‘Fakamolemole tuku ei ke tausi ne matou, ke fai mo omotou avaga, me e seki fao ne matou mai a koutou i se taua. A koutou e se agasala i te ofa feagaiga, me e seki tuku mai ne koutou ki a matou.’ ”

23Tena, ne fai eiloa ne tagata Peniamina te mea tena. Ne tofu latou mo te avaga mai fafine kona ne saka i Sailo, ave eiloa ne latou. Tena, olo atu ei latou ki te lotou laufenua, o toe faite te lotou fa'kai, nofo eiloa i kona.

24I te taimi foki tena ne fakatau foki atu ei a tino Isalaelu ki olotou matakaiga mo kaiga pela foki ki olotou manafa.

25 Fama 17.6 I te taimi tena, e seki ai se tupu i Isalaelu, tela la, a tino e pule eiloa i olotou mea e fai.