IELEMIA 9 - Tuvalu Revised Bible

1Aku muna eiloa i toku ulu se vaikeli e fonu i te vai

Mo oku mata se punavai o loimata,

Ko te mea ke mafai ne au o tagi i ao mo po ona ko te tamatega o oku tino.

2Aku muna eiloa ke isi se koga mo oku nofo i te toafa,

Ko te mea ke galo atu au keatea mai oku tino.

A latou ne tino se fakamaoni katoa,

Ne tino masei katoa.

3E toka faeloa o faipati ki muna loi;

A te se fakamaoni ko pule ne ia a te fenua,

Ko se pule te mea tonu.

Muna a te Aliki,

“A oku tino ko fai soko faeloa ne latou a amioga masei,

Kae ko se taku eiloa ne latou a au ko te lotou Atua.”

4A tino katoa ko tau o nofo fakaeteete i olotou taugasoa,

Kae ko seai eiloa se tino e talitonu ki tena taina;

Me i tautaina ko fakatau fai togafiti katoa e pela mo Iakopo;

A tino katoa ko fakatau amio masei ki olotou taugasoa.

5-6Ko fakatau 'taki se ne latou olotou taugasoa,

Kae ko seai eiloa se tino e faipati ki te mea tonu;

Ne fakaakoako ne latou olotou laulaufaiva ke poto i te loi

Kae se mafai o tiaki olotou uiga masei.

E se manava eiloa te fai ne latou o amioga fakasaua,

Pela foki amioga fakaloiloi.

Muna a te Aliki i tena fenua ko teke ki a ia.

7Ona ko te mea tena, ko ala ei o fai mai a te Aliki Malosi penei,

“Ka faka'ma ne au oku tino e pela me se fiti,

Kae tofotofo foki latou.

A toku fenua ko oti ne fai ne latou a amioga masei —

Se a foki la te mea ka fai ne au ki a latou?

8A olotou laulaufaiva ko pela me ne matasana fakamataku;

E faipati faeloa latou ki te loi.

A tino katoa e faipati faka'lei sale fua ki lotou tuakoi,

Kae tela la, e fakatoka ne latou ne togafiti e malei ei latou.

9E a, e se fakasala ne au latou ona ko mea konei e fai ne latou?

E a, e se taui atu ne au ki se malo penei,

E tusa mo olotou uiga ma'sei?

Ko au, te Aliki, tena ne faipati atu.”

10Ne fai atu au penei, “Au ka tagi fanoanoa ona ko mauga,

Pela foki a malae moukua,

Me ko seai ne vai i ei,

Kae ko seai foki ne tino e olo sale i ei.

Ko se lagona atu a leo o pulumakau;

A manu eva mo manu vao ko 'sola kae ko galo atu.”

11Muna a te Aliki, “Ka ofa ne au a Ielusalema ke maofa valevale,

Ke fai mo koga e nofo ei a manu vao ko tiakolo;

A fa'kai o Iuta ka liu toafa,

Te koga e seai ne tino e nofo i ei.”

12Ne fesili atu au penei, “Te Aliki, ai a ko masei valevale ei a te fenua, kae ko malō faka eiloa pela me se toafa, ko ala ei o seai ne tino fai malaga e ui sale i loto i ei? Ko oi te tino e lava tena poto o malamalama i te mea tenei? Ko oi te tino ne fakamalamalama ne koe ki ei, ko te mea ke mafai o fakaasi atu ne ia ki nisi tino?”

13Ne tali mai te Aliki, “Ne tupu te mea tenei ona ko oku tino ne tiakina ne latou aku akoakoga kola ne tuku atu ki a latou. E seki faka'logo mai ki a au, seki fai foki ne latou a mea ne fai atu ne au ki a latou.

14Ne tumau eiloa te loto makeke o latou, kae ne tapuaki atu eiloa ki tupua o Paala, e pela eiloa mo te mea ne akoako atu ne olotou tamana ki a latou.

15Tela la, fakalogo mai ki te mea ka fai ne au, te Aliki Malosi, te Atua o Isalaelu: ka tuku atu ne au ki oku tino a lakau kona ke kai ne latou, mo meainu poisini ke inu ki ei.

16Ka fakasalalau ne au latou ki malo fakaatea kola e seki iloa eiloa ne latou, seki iloa foki ne olotou tupuga. Ka uga mai ne au a kautau ke ta fakapalele eiloa latou.”

Ielusalema ko kalaga ki se Fesoasoani

17Muna a te Aliki Malosi,

“Mafaufau ki te mea tenei ko tupu!

Kalaga atu ki tino tagi fanoanoa ke o'mai,

Ki fafine kola e usu ne latou a pese o te mate.”

18Muna a tino o te fenua penei,

“Fai ki ei ke usu fakavave mai se pese mate mo matou,

Ke fonu omotou mata i loimata,

Ke 'siu foki omotou fifi mata i te tagiga.”

19Fakalogo aka ki te leo o te tagi i Siona,

“Matou ko masei valevale!

Matou ko masiasi!

Ko tau o tiaki ne matou a te motou fenua;

A omotou fale ko maofa valevale.”

20Ne fai atu au penei,

“Fakalogo ki te Aliki, koutou fafine,

Kae saga tonu atu ki ana muna.

Akoako atu otou tama fafine ke iloa o 'tagi fanoanoa,

Pela foki otou taugasoa ke iloa o usu a pese o te mate.

21A te mate ko ulu mai fua i omotou fakamalama

Kae ulu mai ki loto i omotou palesi;

Ko 'ta ne ia a tamaliki i auala

Pela foki a tamataene i te maketi.

22A foitino mate ko salalau valevale,

Pela me ne fakatuga kaiao i fatoaga,

Pela me ne saito kola ko oti ne kati kae ne tiaki ne te kau kati saito,

Ko saito kola ko seai ne tino e tae aka ne latou.

Tena te mea ne fai mai ne te Aliki ke fai atu ne au.”

23Muna a te Aliki,

“A tagata poto e se tau o fakamatamata i te lotou poto,

Pena foki tagata 'mafi e se tau o fakamatamata i olotou mafi,

A tagata maumea foki e se tau o fakamatamata i te lotou maumea.

24 1Koli 1.31; 2Koli 10.17 Kafai se tino e fia fakamatamata, E tau o fakamatamata me e iloa ne ia a au,

Kae malamalama foki i oku uiga,

Me i toku alofa e tumau, kae e fai foki ne

Au a te mea tonu mo te fakamasinoga tonu

Kona a mea e fiafia au ki ei.

Ko au, te Aliki, tena ne faipati atu.”

25-26Muna a te Aliki, “E oko mai eiloa te taimi e fakasala ei ne au a tino Aikupito, tino Iuta, tino Etoma, tino Amoni, tino Moapi, mo tino o te toafa kola e kati mutu olotou ulu. A tino katoa konei ne pilitome, kae e seki tausi fakalei eiloa ki te feagaiga tela e 'tau o tausi ne latou. E seai eiloa ne tino i konei, io me ko tino Isalaelu kai tausi ki taku feagaiga.”