SALAMO 17 - Tuvalu Revised Bible

Ko te Talo a te Tino 'Ma

1Te Aliki, fakalogo mai ki taku fakatagi mō se fai mea tonu;

Saga mai foki ki taku kalaga atu mō se fesoasoani!

Fakalogo mai ki taku talo mo toku loto katoatoa.

2Ke fai tau fakamasinoga mo te alofa ki a au,

Me e iloa ne koe te mea tonu.

3E iloa ne koe toku loto.

E asiasi mai koe ki au i te po.

Ko oti ne sukesuke faka'lei ne koe au,

Kae seki maua ne koe ne manatu masei i a au.

4Au e se faipati ki mea ma'sei e pela mo nisi tino;

Au ne fakalogo ki au fakatonuga,

Kae seki tau tali ki auala fakasaua.

5Au ne sasale faeloa i tou auala,

Kae seki piko eiloa keatea.

6Te Atua, au e talo atu ki a koe i a koe e tali mai ki a au;

Tela la, saga mai kae fakalogo mai ki aku muna.

7Fakaasi mai tou alofa gali kae fakasao mai matou;

Ko te pili o matou ki a koe e 'sao ei matou mai omotou fili.

8Puipui mai au e pela eiloa mo tau puipuiga ki ou mata;

Faka'muni aka au mai lalo ifo o ou kapakau,

9i taimi e faitaua mai ei oku fili ki a au.

A au ko nikoi ne fili fakamataku;

10E seai se alofa i a latou, kae masani o fai'pati fakamata'mata.

11Konei e fakatamilo ne latou a au,

O kilokilo ki se avanoaga e ta ei au.

12E pela latou me ne leona e fakatalitali ki a au ke saesae likiliki ne latou au.

13Te Aliki, vau o teke atu oku fili kae fakatakavale latou!

Fakasao mai au ki tau pelu mai tino ma'sei;

14Fakasao mai au mai i a latou kola e maumea i te olaga nei.

Fakasala atu latou ki mea faigata kola ne fakatoka ne koe mō latou;

Ke oko atu foki te fakasalaga ki olotou tama mo tama a olotou tama!

15Ka ko au e onoono atu faeloa ki a koe me i a au e amiotonu;

Kafai e ala ake au, ko tou fakatasi mai e faka'fonu ne ia au i te fiafia.