SALAMO 71 - Tuvalu Revised Bible

Ko te Talo a te Toeaina

1Te Aliki, au e vau ki a koe mō se puipuiga;

Sa fakatakavalegina au!

2Me i a koe e amiotonu, fesoasoani mai kae fakaola au.

Saga mai kae fakasao mai au!

3Ke fai koe mo lafiga e malu 'lei ei au,

Mo te olo malosi e puipui ei au;

Ko koe eiloa ko toku lafiga mo toku tausi.

4Toku Atua, fakasao au mai lima o tino amio ma'sei,

Mai te malosi o tino sāuā mo te amio se 'lei.

5Te Aliki, ko koe fua toku fakamoemoega,

Au ne fakatuanaki eiloa ki a koe mai taku folikiga.

6Au ne fakalagolago eiloa ki a koe i toku olaga katoa;

Ne puipui au ne koe talu taku fanau maiga.

Au ka viki faeloa ki a koe.

7A toku ola ko fai pela me se fakaakoakoga ki tino tokouke,

Me i a koe ko toku 'puluga malosi.

8Au e tavae ki a koe i aso katoa,

Kae folafola atu foki ne au a tou 'malu.

9Nei, ke se tiakina au ne koe i a au ko toeaina;

Sa tiakigina au manafai au ko vaivai.

10Ko ma'nako oku fili o tamate au;

Ko pulepule fakatasi latou o teke mai ki a au.

11Ko fai ake a latou penei,

“Ko tiakina a ia ne te Atua;

Tatou ka olo o puke a ia me ko seai se tino e fakasao ne ia a ia.”

12Te Atua, sa faka'mao mai i a au;

Toku Atua, vave mai o fesoasoani mai ki a au!

13A latou kola e o'mai o ta au, ke fakatakavale kae 'ta fakapalele.

Ke fakamasiasi kae fakamavale a latou kola e taumafai o fakapakia a au.

14Au e fakamoemoe faeloa ki a koe;

Kae ka 'viki atu faeloa ki a koe.

15E taku atu ne au tou aga 'lei;

E faipati foki au ki tau fakaolataga i te aso katoa,

E ui eiloa e se oko toku malamalama ki ei.

16Te Aliki Maluga, ka tavae atu au ki tou malosi;

Ka folafola atu ne au tou aga'lei.

17Te Atua, ko oti ne akoako ne koe au ka koi tamaliki,

Ke oko mai ki aso nei koi fakaasi atu eiloa ne au, au galuega fakaofoofogia.

18Te Atua, au nei ko matua, mo toku ulu foki ko sinā,

Sa tiakina mai au!

Fakatasi mai koe ki a au i taimi e folafola atu ei ne au

Tou mana mo tou malosi ki tupulaga katoa fakamuli.

19Te Atua, a tau amiotonu ko oko atu ki te lagi.

Ko oti ne fai ne koe mea fakaofoofogina;

E seai se tino e pau mo koe.

20Ko oti ne aumai ne koe a puapuaga mo mea faiga'ta ki a au,

Kae ne toe fakafoki mai ne koe toku malosi;

Ne toe avake ne koe au mai lalo i te tanuga.

21Ka ko fai ne koe au ke tai maluga atu i lo toku olaga mua;

Ka toe fakamafanafana mai au ne koe.

22Ka viki atu au ki a koe i te kitala;

Toku Atua, ko tou fakamaoni eiloa e viki atu ei au.

E ta ne au a pese ki taku kitala ki a koe,

Te Tasi Tapu o Isalaelu.

23Au e kalaga fiafia manafai e usu pese atu au ki a koe,

i toku agaga katoa e usu pese atu ei au,

Me ko oti ne fakasao ne koe au.

24E faipati ne au tau amiotonu i aso katoa,

Me i a latou kola ne taumafai o fakapuapuagatia au,

Ko oti ne fakatakavale kae fakamasiasi ne koe.