2 NOFOAIGA TUPU 2 - Tuvalu Revised Bible

Ko Fakatokatokaga mō te Faitega o te Faletapu(1Tupu 5.1-18)

1Ne mafaufau te Tupu ko Solomona ke faite ne ia a te Faletapu mo fai tapuakiga ki te Aliki, pela foki mo se palesi mo ia eiloa.

2E fitusefulu afe tagata ne tuku ne ia ke galue i te talimaiga o mea mō te galuega, kae e valusefulu afe tagata ke kati ne latou a fatu i koga e fai ei a fatu. E tusa mo te tolu afe onoselau tagata e takitaki ne latou te galuega.

3Ne ave te fekau a Solomona ki te Tupu o Tulo ko Hilamo penei: “Ke fai mea togi taua, e pela mo koe ne fai mea togi mo toku tamana ko Tavita, i te taimi ne togi atu ei ne koe a alasi ki a ia mo faite tena palesi.

4Au nei e taumafai o faite se faletapu mo fakaaloalo ei te Aliki toku Atua. A te koga tena se koga e tapu, se koga e tapuaki atu ei au mo toku fenua ki te Aliki, o sunu mea manogi, se koga e ofo ei ne matou a falaoa tapu ki a ia i taimi katoa, se koga e ofo atu ei ne matou a taulaga sunu i taeao mo afiafi katoa, e pela foki i Sapati takitasi, mo Kaiga o Masina Tu, mo nisi aso tapu e fakaaloalo ei matou ki te Aliki te motou Atua. Ne fakatonu ne ia a te fenua o Isalaelu ke fai faeloa ne latou te mea tena ki te se gata mai.

5Au e mafaufau ke faite se faletapu tafasili i te gali, me i te motou Atua e sili atu i atua katoa.

61Tupu 8.27; 2NTupu 6.18 A te tonuga eiloa, e seai eiloa se tino e maua ne ia o faite se faletapu mō te Atua, me i te Atua e se ofi i se koga, ke oko foki eiloa ki te lasi o te lagi e se ofi foki i ei a te Atua. E mafai la pefea ne au o faite se faletapu ke silia atu i te koga e sunu ei mea manogi ki te Atua?

7Tuku mai se tagata e poto i te faiga o ata fakagaligali, i te faiga o galuega ki aulo, siliva, palasi, mo fiti, mo te faitega o laugatu lanu moana, lanu kulakula, mo te lanu kula. Ka galue fakatasi a ia mo tufuga o Iuta mo Ielusalema, kola ne filifili ne toku tamana ko Tavita.

8E iloa ne au i otou tagata tua lakau ne tagata poto i te galuega tena, tela la, aumai ne alasi mo pelosi mo iunipa mai i Lepanona. Au ko toka o avatu ne tagata mai i konei, ke fesoasoani atu ki tau kau

9i te fakatokaga o ne laupapa e uke, me i te faletapu tenei, e faite ne au ke lasi kae gali.

10Ka avatu ne au ma au tino galue, e lua afe tani o saito, e lua afe tani o kalite, e faselau afe lita o te uaina, kae e faselau afe lita o te sinu olive.”

11Ne aumai ne te Tupu ko Hilamo a te tusi ki a Solomona, te tali ki te fekau a Solomona. E penei a muna o te tusi, “Ona ko te Aliki e alofa ki tena fenua, tena te mea ne fai ei ne ia a koe mo tupu o latou.

12Tavae atu te Aliki te Atua o Isalaelu, ko ia ne faite ne ia a te lagi mo te lalolagi! Ne aumai ne ia ki a Tavita se tama tagata e poto kae fonu i te atamai mo te apo, kae tenei ko mafaufau o faite se faletapu mō te Aliki, mo se palesi mo ia eiloa.

13Ka avatu ne au te tufuga tafasili i te poto, ko Hulamo.

14A tena matua se tino i te matakaiga o Tanu, ka ko tena tamana se tagata Tulo. E poto a ia i te faitega o mea ki aulo, siliva, palasi, fiti, fatu mo lakau. E mafai foki ne ia o fai a mea ki laugatu lanu moana, lanu kulakula, mo te kula, pela foki a laugatu lino. E mafai ne ia o lomi a vaega mea fakagaligali, kae e mafai foki ne ia o fai so se ata e fakasino atu ki a ia. Ke galue fakatasi a ia mo au tufuga, pela foki latou kola ne galue mō tou tamana, te Tupu ko Tavita.

15Tela la, na aumai nei te saito, mo kalite, mo uaina mo sinu olive tela ne tauto koe ke aumai.

16Ka 'kati ne matou a alasi, ki te uke e manako koe ki ei, i mauga o Lepanona, ko saisai ne matou fakatasi, ko fakata'pea atu ei i te tai ke oko ki Iopa. Mai i kona, ko puke ei ne koutou o ave ki Ielusalema.”

Ko Kamata te Faitega o te Faletapu(1Tupu 6.1-38)

17Ne lau ne te Tupu ko Solomona te aofaki o tino fakaatea kola e nofo i te fenua o Isalaelu, e pela eiloa mo te mea tela ne fai ne tena tamana ko Tavita. E tusa mo te 153,600 tino fakaatea e nofo tumau i luga i te fenua.

18E 70,000 o latou ne tuku ne ia ke galue i te aumaiga o mea e faite ei te Faletapu, kae e 80,000 ke kati mai a fatu mai i mauga. E 3,600 ne fili ke fai mo takitaki, o onoono faka'lei ke fai te galuega.