SALAMO 4 - Tuvalu Revised Bible

Ko te 'Talo i te Afiafi mō se Fesoasoani

1Te Atua, toku lafiga,

Tali mai ki taku 'talo!

Au ne puapuagatia, kae ne fesoasoani mai koe.

A koe ke alofa mai kae tali mai ki taku 'talo.

2Ko afea e fakagata ei te otou faifai muna ki a au?

Ko afea e fakagata ei te otou fia'fia ki mea se aoga,

Kae tautali ki mea 'se?

3Ke masaua me ko oti ne filifilia ne te Aliki mō ia a tino amiotonu,

E fakalogo mai ma kalaga atu au ki a ia.

4 Efe 4.26 Ke ma'taku koutou ki te Aliki kae fakagata te otou fai agasala;

Ke mafaufau 'mafa koutou ki te mea nei,

Manafai e ta'kato koutou i otou moega.

5E 'tau mo koutou o tuku atu ki te Aliki te taulaga tonu,

Kae fakatuanaki mo te loto katoatoa ki a ia.

6E tokouke tino e talo penei, “Te Aliki,

Tuku mai te fakamanuiaga lasi ki a matou,

Kae kilo alofa mai foki ki a matou!”

7A te fiafia ne tuku mai ne koe ki a au, e sili atu i te fiafia

Ka maua ne latou kola e uke olotou saito mo uaina.

8Kafai e takato au ki lalo, e moe au mo te filemu;

Me ko koe eiloa te Aliki e tausi faka'lei mai ke sao au.