MATAIO 7 - Tuvalu Revised Bible

Ko te Fakamasino atu ki Nisi Tino(Luka 6.37,38,41-42)

1“Sa fakamasino atu ki nisi tino, ko te mea ke mo a e fakamasino koutou ne te Atua.

2Male 4.24 Me ko te fakamasinoga e fakamasino atu ei koutou, e fakamasinogina ei koutou; ko te fua foki e fua atu ne koutou, e toe fua mai ki a koutou.

3Se a te mea e kilo atu ei koe ki te potu lakau i te mata o tou taina, kae se iloa ne koe a te potu lakau i tou mata?

4E mafai pefea o fai atu koe ki te sua tino, ‘Fakamolemole, ke seu ne au a te potu lakau i tou mata,’ kae kiloke, e iai foki te potu lakau i tou mata?

5A koe se tino loi. Seu muamua keatea te potu lakau i tou mata, ko kite 'lei ei koe, fatoa seu ei ne koe keatea a te potu lakau i te mata o te sua tino.

6“Sa avatu ne koutou te mea tapu ki kuli; sa pei foki a penina a koutou ki mua o puaka, i te mea ma lakalaka ki olotou vae, kae ma'fuli mai ko koutou eiloa ko saesae.”

Akai, Salasala, Tukituki(Luka 11.9-13)

7“Akai atu, kae ka tuku mai ki a koutou; salasala atu, kae ka maua ne koutou; tukituki atu, kae ka 'tala mai ki a koutou.

8So se tino e akai atu, e tuku mai ki a ia; a ia tela e salasala atu, e maua ne ia; a ia foki tela e tukituki atu, e 'tala mai ki a ia.

9Ko oi se tino i a koutou e mafai o tuku atu se fatu ki tena tama manafai e akai mai ki se falaoa?

10Io, me akai mai ki se ika, kae tuku atu ki a ia se gata?

11Tela la, kafai koutou e ma'sei, kae e iloa ne koutou o tuku atu a mea 'lei ki otou tama'liki; e a, e se sili atu la te otou Tamana i te lagi, i te fia tuku atu o mea 'lei ki tino kola e akai atu ki a ia?

12 Luka 6.31 “E pela mo te mea e ma'nako koutou ke fai atu ne nisi tino ki a koutou, ke fai foki eiloa ne koutou pena ki a latou, me tenei te uiga o te Tulafono a Mose mo akoakoga a pelofeta.”

Ko te Mataloa Mataliki(Luka 13.24)

13“Ulu atu koutou ki te mataloa mataliki; me i te mataloa mataefa e faigofie ei te auala e tau atu ki te malaia, e tokouke foki latou kola e olo atu i ei.

14Ka ko te mataloa mataliki e faigata te auala e tau atu ki te ola, e timomo foki a tino e maua ne latou.”

Ko te Lakau mo Ona Fuaga(Luka 6.43-44)

15“Ke fakaeteete koutou i pelofeta 'loi kola e o'mai ki a koutou i amioga fakamamoe, ka ko olotou loto ko fekai eiloa e pela mo ne luko.

16E iloa ne koutou a latou i olotou fua. E a, e mafai o tau mai a vine mai lakau makai'kai io me ko mati mai lakau talatala?

17Tela la, a te lakau 'lei e fua mai ei fuaga 'lei, ka ko te lakau masei, e fua mai ei a fuaga ma'sei.

18A te lakau 'lei e se mafai o fua mai ei ne fuaga ma'sei, io me ko te lakau masei ke fua mai ei ne fuaga 'lei.

19Mata 3.10; Luka 3.9Ko lakau katoa kola e se fua mai ei ne fuaga 'lei, e tua kae 'pei ki te afi.

20Mata 12.33 Ia, e iloa ne koutou a pelofeta 'loi i olotou fua.”

E Se Iloa ne Au Koutou(Luka 13.25-27)

21“E se 'sao ki te Malo o te lagi a latou katoa kola e fai mai ki a au, ‘Te Aliki, te Aliki,’ na ko ia fua tela e fai ne ia te loto o toku Tamana tela i te lagi.

22Kafai e oko mai te Aso tena, e tokouke e fai mai ki a au penei, ‘Te Aliki, te Aliki! Ko tou igoa ne folafola atu ei ne matou a te Muna a te Atua. Ko tou igoa foki ne tuli ei ne matou a temoni, kae fai foki i ei ne matou a vavega!’

23Sala 6.8 Tela, taku tonu atu ei ne au ki a latou, ‘E se iloa ne au koutou; olo keatea mai i a au, tino amio ma'sei!”’

Ko Tufuga Fai Fale e Tokolua(Luka 6.47-49)

24“So se tino e fakalogo ki aku muna kae fai ne ia, e fakatusa ne au ki se tino poto tela ne faite tena fale i luga i te kaupapa;

25Ne to a te vaiua, ne oko mai foki a te lofiaga, ne agi foki mo te matagi kae poko ki te fale, kae ne se siga eiloa, me ne fakavae i luga i te papa.

26“So se tino foki e fakalogo ki aku muna kae se fai ne ia, e fakatusa ki te tino valea ne fakatu tena fale i te one;

27ne tō a te vaiua, ne oko mai foki a te lofiaga, ne agi foki mo te matagi kae poko ki te fale, kae ne siga me ne fakavae i luga i te one!”

Ko te Pule a Iesu

28 Male 1.22; Luka 4.32 I te otiga o pati a Iesu, ne ofo masei a te vaitino i ana akoakoga,

29me ne akoako atu e pela mo se tino e i a ia te pule, kae e se pela mo olotou faiakoga o te Tulafono.