LOMA 5 - Tuvalu Revised Bible

E Takuamiotonugina a te Tino i te Atua

1Tela la, ne takuamiotonugina tatou i te fakatuanaki, ko maua foki ne tatou te nofo 'lei mo te Atua i te tou Aliki ko Iesu Keliso.

2Ne aumai tatou ne ia i te fakatuanaki ki te alofa tauanoa o te Atua tela ko mautakitaki ei tatou, ka ko fiafia foki tatou i te tou fakamoemoega i te kau fakatasi o tatou i te 'malu o te Atua!

3Kae sili atu te tou fia'fia ki puapuaga o tatou, i te mea e iloa ne tatou me ko puapuaga e tupu mai ei te kufaki,

4ka ko te kufaki e fakatupu ne ia te iloa tonu, ka ko te iloa tonu e fakatupu ne ia te fakamoemoe.

5Ka ko te fakamoemoe e se fai ne ia ke 'mae o'tou loto, i te mea ko oti ne 'ligi mai ne te Atua ki loto o tatou a tona alofa, e alatu i te Agaga Tapu tela ne tuku mai ki a tatou.

6I te taimi ne se mafai ei ne tatou o fai se mea, ne mate tonu eiloa a Iesu i te taimi tena mo tino amio ma'sei.

7Se mea e faigata ke mate se tino mō se tino amiotonu. Kae kati la, e mafai ne se tino ke mate a ia mo se tino amiotonu.

8Ka ko te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mo tatou!

9Nei, ko takuamiotonugina tatou i tona toto, kae ka sili atu, i te mea ka fakaola ne ia tatou mai te kaitaua o te Atua.

10Kafai ne fai tatou mo fili o te Atua, ne fakalei tatou mo ia i te mate o tena Tama, kae sili eiloa nei; i a tatou ko fakalei mo ia, ka ola tatou i te ola o Keliso.

11E se gata fua i kona, ko fia'fia foki tatou ki te Atua i te tou Aliki ko Iesu Keliso, tela ne fakalei ne ia tatou mo te Atua.

Ko Atamu mo Keliso

12 Kene 3.6 Ne oko mai te agasala ki te lalolagi i te tagata e tokotasi, ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.

13Ne i te lalolagi te agasala ka koi tuai o tuku mai te Tulafono, kae se taku me se agasala, i te mea e seai se tulafono.

14Kae mai i te taimi o Atamu ki a Mose, ne pule te mate i luga i tino katoa; e aofia ei foki a latou kola e seki agasala i te ofa tulafono a Atamu ne fai, me ko ia ko te fakatusa o ia tela ka vau.

15Ka ko te meaalofa faivasaga a te Atua, e se pau mo te ofa tulafono a Atamu. I te mea kafai ne tokouke ne 'mate i te ofa tulafono a te tino e tokotasi, ka sili atu te maua ne latou te alofa tauanoa o te Atua, mo tena meaalofa faivasaga i te alofa tauanoa o te tino e tokotasi, ko Iesu Keliso; ko fakaasi mo te tokoukega.

16Ka ko te meaalofa faivasaga, e se pau mo te malosi o te agasala a te tino tena e tokotasi. Me i te fakamasinoga tela ne fai mō te ofa tulafono tena e tasi, ne aumai foki ne ia te fakasalaga, ka ko te alofa tauanoa tela ne fai mō agasala e uke, ne aumai ne ia te takuamiotonugina.

17Kafai ne pule te mate ona ko te ofa tulafono a te tino e tokotasi, ka silia atu te ola o latou kola ka maua ne latou te lasi o te alofa tauanoa mo te meaalofa faivasaga o te amiotonu, kola e pule i te olaga o te tino e alatu i te tino e tokotasi, ko Iesu Keliso.

18Tela la, ko fakasala a tino katoa ona ko te ofa tulafono a Atamu, kae ona ko te amiotonu a Keliso, ko fakasaoloto i ei tatou, kae maua ei foki a te ola ne tino katoa.

19Me ne tokouke ne fai mo tino agasala ona ko te se fakalogo o Atamu, kae ka tokouke ka amiotonu i te fakalogo o Iesu Keliso.

20Ne oko mai te tulafono o fakauke te ofa tulafono; kae kafai e tupu ake o uke te agasala, e fakalasi foki te alofa tauanoa o te Atua.

21E pela mo te agasala ne pule ona ko te mate, e pena foki te alofa tauanoa, e pule ona ko te amiotonu, e takitaki ei tatou ki te ola se gata mai i a Iesu Keliso te Aliki o tatou.