SALAMO 46 - Tuvalu Revised Bible

A te Atua ko i a Tatou

1A te Atua ko te lafiga mo te malosi o tatou,

E toka faeloa a ia o fesoasoani ki a tatou i taimi o puapuaga.

2Tela la, e se tau mo tatou o ma'taku,

Manafai e galulu te lalolagi, kae 'siga atu foki a mauga ki koga 'poko o te moana;

3Manafai foki e sou te tai mo te fakamataku,

Mo te gasue'sue foki o mauga i te malosi fakamataku.

4E isi se vaitafe e aumai ne ia te fiafia ki te fa'kai

Mo te faletapu o te Atua Sili i te Maluga.

5A te Atua e nofo i te fa'kai tena,

Kae ka se mafai eiloa o fakamaseigina;

Ka vau a ia o fesoasoani ki ei i te tafataeao 'malu eiloa.

6Ko ma'taku a fenua, mo malo foki ko pole'pole;

E kalaga mai te Atua, te lalolagi eiloa ko liu vai.

7A te Aliki Tafasili i te Malosi e fakatasi mo tatou;

A te Atua o Iakopo ko te tou lafiga.

8O'mai o 'kilo ki mea ne fai ne te Aliki.

'Kilo ki mea fakaofoofogia ne fai ne ia i te lalolagi.

9E fakagata ne ia a taua i te lalolagi katoa;

E fatifati ne ia a kausana, e fakamasei ne ia a tao,

Kae 'sunu ne ia a talita ki te afi.

10Ana muna, “Fakagata te otou faitaua, kae ke iloa ne koutou me i au ko te Atua,

E sili i fenua katoa, e sili foki i te lalolagi.”

11A te Aliki Tafasili i te Malosi e fakatasi mo tatou;

A te Atua o Iakopo ko te tou lafiga.