SALAMO 79 - Tuvalu Revised Bible

Ko te Talo mo te Fakasaoga o te Atufenua

1 2Tupu 25.8-10; 2NTupu 36.17-19; Iele 52.12-14 Te Atua, a tino pouliuli ko puke malo ne latou tou fenua.

Ne fakamasei ne latou tou Faletapu 'malu,

Kae tiaki ne latou a Ielusalema me ko masei valevale.

2Ne tiaki ne latou a foitino o ou tino ke kai ne manu eva,

Mo foitino o au tavini ke kai ne manu fe'kai o te vao.

3Ne fakamaligi ne latou a toto o ou tino pela me se vai;

Ka ko 'tafe atu ei te toto pela me se vai i Ielusalema katoa,

Kae seai se tino ne 'toe o tanu a tino 'mate.

4Ne fakaitaita mai a fenua pili ki a matou,

Ne kata fakatauemu mai foki a latou ki a matou.

5Te Aliki, koe na ka ita faeloa ki a matou ki te se gata mai?

Ka tumau eiloa tou ita pela me se afi?

6Fakasaga atu tou ita ki fenua kola se tapuaki ki a koe,

Mo tino foki kola e se 'talo atu ki a koe.

7Ko oti ne tamate ne latou ou tino

Kae fakamasei foki ne latou tou fenua.

8Sa fakasala mai ne koe matou ona ko agasala a omotou tupuga,

Kae alofa mai nei ki a matou; me ko seai se motou fakamoemoega.

9Te Atua, fakaola mai, kae fesoasoani mai ki a matou;

Fakasao kae fakamagalo mai omotou agasala,

Ona ko te 'malu o tou igoa.

10Ai a e fesili mai ei a fenua ki a matou penei,

“Tefea te otou Atua?”

Fai aka ke lavea ne matou, me ko fakasala ne koe a fenua;

Ona ko te fakamaligiga ne latou a toto o au tavini!

11Fakalogo ake ki te manava fita o pagota, kae mai tou mana lasi,

Fakasaoloto ake latou kola ko fakasala ki te mate.

12Te Aliki, taui atu fakafitu ki fenua,

E tusa mo olotou muna ma'sei ne fai atu ki a koe.

13Ka ko matou, ko ou tino, ko mamoe o tau lafu mamoe,

Ka fakafetai atu ki a koe ki te se gata mai,

Kae tavae atu foki ki a koe i taimi katoa.