SALAMO 58 - Tuvalu Revised Bible

Te 'Talo ki te Atua ke Fakasala a Tino Amio Ma'sei

1A koutou tino pule, e a, e fai ne koutou te ikuga 'tau?

E a, e fakamasino ne koutou a tino katoa mo te tonu?

2Ikai! E mafaufau faeloa koutou ki mea ma'sei ke fai ne koutou,

Kae ofa ne koutou a tulafono, kae faka'tupu fakalavelave i te fenua.

3A tino amio ma'sei e fai faeloa mea 'se i olotou olaga katoa;

E fai'pati faeloa ki te loi talu te lotou fanaumaiga.

4E fonu latou i te poisini e pela mo gata;

Ka ko 'pono foki olotou taliga e pela mo se gata taliga tuli,

5Tela la, e se lagona ne ia te leo o te tino tela e fakalatalata ne ia te gata,

Se lagona foki ne ia te 'lau a tino fai vailakau.

6Te Atua, fatifati ake a nifo o leona fe'kai konei!

7Ke 'galo atu latou e pela mo te 'tafe atu o te vai keatea;

Ke pala'pala latou e pela mo mouku i te auala.

8Ke pela latou mo sipō e liu 'pela,

E pela foki mo se pepe e fanau mai kae mate,

E se matea eiloa ne ia te mainaga.

9A koi tuai o iloa ne latou te mainaga,

Ka ko kati latou ki lalo pela me se vao ne vele,

Ka agina latou keatea i te kaitaua o te Atua,

Ko 'galo atu ei latou a koi ola eiloa.

10Ka fiafia a tino amiotonu manafai e matea ne latou a tino agasala ko fakasalagina;

Ka sasale latou i loto i toto o tino amio masei.

11Ka fai ake ei a tino penei, “E tonu e maua ne tino amiotonu te taui 'lei;

E tonu e isi te Atua tela e fakamasino ne ia te lalolagi!”