GALUEGA 23 - Tuvalu Revised Bible

1A Paulo ne pula'toka atu eiloa ki te Fono, ana muna, “Oku taina! E lagona 'lei eiloa ne au ki toku loto i toku olaga i mua o te Atua e 'ma katoatoa, ke oko mai ki te aso nei.”

2A Anania te Faitaulaga Pule, ne fakatonu atu ki tino ne 'tu pili ki a Paulo, ke 'pa ake a te gutu o Paulo.

3Mata 23.27,28Ne fai atu a Paulo ki ei penei: “A koe te pa vali kena, ka 'pa tou gutu ne te Atua. A koe e sagasaga mai i kona o fakamasino mai au e tusa mo te Tulafono, kae tena e ofa mai ne koe te Tulafono, i tou fakatonu atu ki tino kona ke 'pa mai au!”

4Ka ko tagata kola ne 'tu pili ki a Paulo, ne fai'pati atu penei: “A koe ko fai muna se 'tau ki te Faitaulaga Pule a te Atua.”

5Eso 22.28Ne tali atu a Paulo penei: “Oku taina, e se iloa ne au i a ia se Faitaulaga Pule, me ne muna mai te Tusi, ‘E se 'tau mo koe o fai muna masei ki te aliki o tou fenua.”’

6 Galu 26.5; Fili 3.5 I te laveaga ne Paulo i nisi tino o latou ne Satukaio, ka ko nisi tino ne Falesaio, kalaga atu ei a ia ki te Fono, “Oku taina! Au nei se Falesaio, ko te tama a te Falesaio. Ko fakamasinogina au ona ko au e taofi ki te toe'tu o tino 'mate!”

7I te palelega eiloa o ana muna konei, ko Falesaio eiloa mo Satukaio ko kamata ake o fakakinau, vaelua ei te Fono.

8Mata 22.23; Male 12.18; Luka 20.27Me ko Satukaio e taofi me se toe'tu a tino 'mate, kae seai foki ne agelu io me ne agaga, ka ko Falesaio e talitonu ki mea kona e tolu.

9Ko na gasolo ake ei o lasi te ua o nisi faiakoga o te Tulafono kola ne Falesaio, ne 'tu ki luga kae finau malosi penei: “E se iloa ne matou se mea e 'se i ei a te tagata nei! Kati se agaga io me se agelu ne faipati eiloa ki a ia!”

10Ne gasolo ake eiloa o malosi a te finauga, tena ne mataku ei te pule i a Paulo mana saesae ne latou. Tela, uga atu ei ana sotia ke olo ki lalo o ave a Paulo ki te olo.

11I te poifoga, vau ei te Aliki ki a Paulo, kae fai mai: “Fakamakeke! Ko oti ne molimau koe ki a au i Ielusalema nei, ke fai foki ne koe pena i Loma.”

Ko Pulepulega Masei ke Tamate a Paulo

12I te taeaoakega, fono ei a te kau Iutaia ki se tonu. Ne tauto mate i a latou ka se 'kai, se inu, seiloga ko oti ne tamate ne latou Paulo.

13A latou kola ne filifili fakatasi ki te mea nei, e silia atu i te tinofa.

14Olo ei latou o fai'pati atu ki te kau faitaulaga pule mo toeaina penei: “Ko oti matou katoa ne tauto mate ke se 'kai ke oti ne tamate ne matou Paulo.

15Tela la, avatu se fekau a koutou mo te Fono ki te pule o te kautau, ke aumai a Paulo ki a koutou, kae fakaloiloi pela i a koutou, e fia maua ne fakamatalaga e tai tonu atu e uiga ki a ia. Ka ko toka matou o tamate a ia, kae seki oko mai ki konei.”

16Kae ne lagona ne te tuatina o Paulo aofaga masei konei, fanatu ei o ulu ki loto i te olo, kae taku atu a te mea tena ki a Paulo.

17Kalaga atu ei Paulo ki te sua ofisa kae fai atu: “Avatu te tamataene tenei ki te pule; me e isi se mea e fia taku atu ne ia ki ei.”

18Puke atu ei te ofisa o faka'taki atu a ia ki te pule kae fai atu, “A te pagota ko Paulo ne kalaga mai ki a au, kae fai mai ke aumai a te tamataene tenei ki a koe, me e isi sena fekau e fia taku atu ki a koe.”

19Puke atu ei a te pule ki tena lima, fakapela atu ei laua keatea, kae fesili atu ki a ia, “Se a tau fekau e fia taku mai?”

20Ne tali atu a ia: “A tino Iutaia ko oti ne tonu i a latou ke fakamolemole atu ki a koe ma taeao, ke aumai a Paulo ki te Fono ke fakaloiloi pela i a latou e fia maua ne fakamatalaga e tai tonu atu e uiga mo ia.

21Sa fakalogo ki ei, i te mea e tinofa tupu tagata kola e 'muni, kae fakatalitali ki a ia. Ko oti ne tauto latou ke se 'kai, se inu, seiloga ko oti ne tamate ne latou a Paulo. Ko toka latou o fai te mea tena, kae faka'tali fua nei ki sau tonu.”

22Muna a te pule, “Sa taku ki se tino me ko oti ne fakaasi mai ne koe ki a au a te mea tenei.” Tela, uga atu ei ne ia te tamataene ke fano.

Ko 'Moli atu a Paulo ki a Filiki te Kovana

23I te taimi tena, ne kalaga atu a te pule ki ana ofisa e tokolua, kae fai atu ki ei penei: “Fakatoka se lualau sotia, ke olo ki Kaisaleia, fakatasi mo te tino fitu sotia e 'sopo i luga i solofanua, mo se lualau foki o sotia e tofu mo tao. Fakatoka faka'lei ke olo i te itula e iva ma po nei.

24Fakatoka foki ne solofanua mo sopo Paulo, ko te mea ke oko 'lei a ia ki a Filiki te kovana.”

25I te taimi tena, ne tusi a te tusi ne te pule e penei:

26“Au ko Kalaotia Lusia, ko tusi atu au ki tou 'malu te kovana Filiki: Talofa.

27A te tagata tenei, ne puke malo ne tino Iutaia, kae ne fai o tamate ne latou. Ne iloa ake ne au i a ia se tino o te malo Loma, tela olo atu ei matou mo aku sotia o fakasao a ia.

28Ne fia iloa ne au me se a te pogai ne 'moli ei ne latou a Paulo ki te fono, tela puke atu ei au ki a ia o avatu ki te lotou Fono.

29Ne iloa ake ne au me seai se mea e 'tau ei o mate a ia, io me pei ki te fale puipui; i te mea a te 'moliga o ia ki te fono, se feitu eiloa tau te tulafono faka-Iutaia.

30I taku iloaga i tino Iutaia e alamati ki a ia, ne manatu ei au pela ke uga atu ki a koe. Ne fai atu au ki tino ne 'moli ne latou a Paulo, ke avatu ki a koe te lotou tagi.”

31Ne fai eiloa ne sotia a te fakatonuga tela ne fai atu ki a latou. Ne ave ne latou a Paulo ki Anipateli i te po.

32I te taeaoakega, 'foki ei sotia kola e sasale ki te olo, kae tuku a sotia kola e 'sopo i luga i solofanua ke olo atu mo ia.

33Ne oko atu latou ki Kaisaleia, tuku atu ei te tusi ki te kovana, tuku atu foki ne latou a Paulo ki a ia.

34Ne faitau a te kovana i te tusi kae fesili atu ki a Paulo me ko oi tona fenua. I te iloaga ne ia me ko Kilikia,

35fai atu ei, “Ka fakalogologo au ki au fakamatalaga, manafai e oko mai a tino kola ne 'moli ne latou koe.” Tela, fai ei tena fakatonuga, ke leoleo faka'lei a Paulo i te fale o te tupu ko Helota.