KALATIA 5 - Tuvalu Revised Bible

Ke Tumau Koutou i te Saolotoga

1A te saolotoga tenei ko maua ne tatou, ne fakasaoloto ei tatou ne Keliso. Tumau la i ei, kae sa toetuku atu koutou ke toe fai mo pologa.

2Faka'logo mai, au ko Paulo ko fai atu penei: kafai e loto koutou ke pilitome, ko se aoga Keliso ki a koutou katoa.

3Ko toe fakamalosi atu ne au a te mea nei, kae toe fai atu foki au ki so se tino e fia pilitome: e 'tau mo ia o tausi a te Tulafono katoa.

4A koutou kola e fia takuamiotonugina i te Tulafono, ko tena uiga ko mavae keatea koutou mai i a Keliso. Ko 'to ki tua koutou mai i te alofa tauanoa o te Atua.

5Ka ko matou, a te motou fakamoemoega ke maua te amiotonu tela e fakatalitali ei matou mo te loto naunau; ko te galuega tena a te Agaga e alatu i te fakatuanaki.

6Me ko te pilitome io me ko te se pilitome, e se taulia a mea kona i a Keliso Iesu; kae na ko te fakatuanaki fua tela e galue i te alofa, e taulia.

7Ne fanofano 'lei eiloa koutou! Ka ko oi ne fakalavelave ne ia koutou, ke se faka'logo ki te mea tonu?

8A te fakakolekolega tenei, ne seki fai ne te Atua tela ne ana kalagagina koutou.

91Koli 5.6E pela mo muna o te faigamuna e tasi “Ne mo mea fua o te mea fakafete, kae fakafete ne ia te paluga katoa.”

10Ka ko au, koi talitonu eiloa ki a koutou i te Aliki, me e se talia eiloa ne koutou se isi talitonuga; ka ko te tino tela ne fakalavelave ne ia koutou e tusa eiloa me ko oi a ia, e fakasala eiloa ne te Atua.

11Ka ko au e oku taina, kafai e mau eiloa toku talai atu ki te pilitome, me se mea e 'tau; ai a la e fakasauagina ei au? Kafai la tena, ko tona uiga ko taku talaiga ki te sataulo o Iesu, e se toe fai mo fakalavelave ki a koutou.

12Au e manako ki a latou kola e fakalavelave ki a koutou, ke pena latou.

13Ka ko koutou e oku taina, ne kalagagina koutou ki te saolotoga; ke sa fai la ne koutou te saolotoga tenei mo mea e pule i ei te feitu faka te foitino, kae ke fai te alofa mo auala e fakatau tavini ei koutou.

14Levi 19.18Me i te Tulafono katoa ko akutu i te fakatonuga e tasi: “Alofa ki tou tuakoi, e pela eiloa mo koe ki a koe.”

15Kafai la e tumau eiloa koutou i te fai taua mo te finau, ko tona uiga e fakamasei koutou ne mea konei.

Ko te Agaga mo Lagona Faka te Foitino

16E fai atu au penei, ke takitaki te Agaga i otou olaga, kae ke se fiafia koutou ki lagona faka te foitino.

17Loma 7.15-23I te mea, e 'teke atu a manako o te foitino ki manako o te Agaga, e 'teke atu foki a manako o te Agaga ki manako faka te foitino: a mea konei e lua, e fai fili; ko tena uiga e se mafai ne koutou o fai a mea e loto koutou ki ei.

18Kafai e takitaki koutou ne te Agaga, ko se 'nofo koutou mai lalo o te Tulafono.

19E iloa 'lei faeloa a mea e fai ne te manako faka te foitino. Ko mea penei: sulaitetapu, amio masei, mo faiga masei;

20ifo ki tupua, fai vailakau, fai fili, fai taua, loto masei, loto ita, manatu fakapito, finau valea, mo te fia fakamavaevae;

21kaisano, 'kona, fiafiaga o te 'kona, mo nisi mea katoa penei. Ko polopoloki ne au koutou nei, pela foki mo aku polopolokiga mua; a tino e fai ne latou a mea konei, e se talia ne latou a te Atua ke fai mo olotou tupu.

22Ka ko fua o te Agaga, ko te alofa, te fiafia, te filemu, te kufaki, te mataalofa, te 'lei, te fakamaoni,

23te loto malalo, mo te loto pulea. E seai se tulafono mo mea konei.

24Ka ko tino kola ko ola i a Keliso Iesu, ko oti ne fakasataulo ne latou a te feitu faka te foitino mo ona manako, mo mea foki e fina ki ei.

25Ko ola tatou i te Agaga, tela la, e 'tau o fakatonutonu foki tatou ne te Agaga.

26E se 'tau mo tatou o fakamata'mata, faka'itaita te sua tino ki te sua tino.