ESOTO 33 - Tuvalu Revised Bible

Ko te Fakatonuga ke Tiaki te Mauga o Sinai

1 Kene 12.7; Kene 26.3; Kene 28.13 Ne fai mai te Aliki ki a Mose penei, “Tiakina te koga tenei, ko koe, fakatasi mo tino kola ne aumai ne koe mai Aikupito, kae olo nei ki te fenua tela ne tauto au ke tuku ki a Apelaamo, Isaako mo Iakopo mo olotou fanau.

2Ka uga atu ne au se agelu ke takitaki ne ia koutou, kae ka afuli ne au keatea a tino Kanana, tino Amoli, tino Heti, tino Pelise, tino Hivi, mo tino Iepuse.

3Ka olo koutou ki se fenua maumea kae laukele ola. Ka ko au e se fanatu i a koutou, i te mea ma ta koutou ne au i te auala, i a koutou ne tino loto makeke.”

4I te taimi ne logo ei a tino i te mea tenei, ne oko ifo ki olotou loto te fanoanoa, tela ko se toe fakamau ei ne olotou teuga fakagaligali.

5Ne toe fakatonu atu a te Aliki ki a Mose ke faipati atu ki te fenua penei, “A koutou ko tino loto makeke kae moi fai ne olo tasi tatou, e penei e ta fakapalele katoa koutou ne au. Ave nei keatea a otou teuga fakagaligali, kae ka mafaufau au me se a te mea ka fai ki a koutou.”

6Tena te mea ne seki fakaaoga eiloa ei ne tino Isalaelu a teuga fakagaligali, i te tiakinaga ne latou a te Mauga o Sinai.

Ko te Faleie o te Aliki

7So se taimi e fakamanava ei te malaga a tino Isalaelu, ke fakatu olotou faleie, a Mose e ave ne ia te Faleie tapu o te Aliki o fakatu i se koga e mao malie atu mai faleie o tino. Ne fakaigoa me ko te Faleie o te Aliki, kae so se tino e fia faipati ki te Aliki e 'tau mo ia o fano ki tua mai te lisi o faleie o te fenua, ko ulu atu ei ki te Faleie o te Aliki.

8So se taimi foki e fano ei a Mose ki kona, a tino ka tu i mataloa o olotou faleie ke lavea tonu ne latou a te uluga o Mose ki te Faleie o te Aliki.

9Kafai ko ulu a Mose ki loto, a te pou kaumana ka fanaifo o tu i te mataloa o te Faleie, ka ko te Aliki ka faipati mai i te kaumana ki a Mose.

10I te taimi foki eiloa e matea ei ne tino i te pou kaumana ko tu i te mataloa o te Faleie, tena foki te taimi e ifo katoa ei latou ki lalo.

11A te Aliki ka faipati mo Mose, e pela me se tino e faipati mo sona taugasoa. Ka oti ko foki mai ei a Mose ki te lisi o faleie o te fenua, ka ko Iosua te tama tagata a Nuno tela e fesoasoani ki a ia, e nofo eiloa i te Faleie.

Ko Tauto te Aliki me ka Fakatasi a ia ki ona Tino

12Ne fai atu a Mose penei ki te Aliki, “E tonu me ko oti ne fai mai koe ki a au, me ka takitaki ne au a tino konei ki te fenua tena, kae seki fai mai ne koe ki a au a te tino tela ka olo tasi maua. Ko oti foki ne fai mai koe, me e iloa tonu ne koe a au, kae fiafia foki a koe ki a au.

13Kafai koe e fai pena, taku mai nei ki a au, au fuafuaga, ko te mea ke tavini au o fakafiafia atu faeloa ki a koe. Ke masaua foki ne koe me ko oti ne filifili ne koe te malo tenei ke fai mo malo o koe.”

14Ne tali mai te Aliki penei, “A taua ka olo tasi, kae ka tuku atu ne au a te manumalo ki a koe.”

15Ne tali atu a Mose penei, “Kafai se olo tasi tatou, mo a eiloa koe e fai mai ke tiakina ne matou a te koga tenei.

16Ka iloa pefea ne tino a tou fiafia mai ki a au mo ou tino, manafai e se olo tasi tatou? A tou fakatasi mai ki a matou, e fai mo mea e kese ei matou mai so se fenua i te lalolagi.”

17Ne fai mai te Aliki ki a Mose, “Ka fai ne au a mea konei ne fakamolemole mai ei koe, i a au e fiafia ki a koe kae iloa lei foki ne au a koe.”

18Ne toe fakatagi atu a Mose penei, “Te Aliki, fakamolemole fakaasi tonu mai aka te mainaga o koe ke matea ne au.”

19 Loma 9.15 Ne tali mai te Aliki penei, “Ka fakaasi atu ne au ki ou mua a toku agalei katoa, ka ko toku igoa ka taku atu ne au ki a koe. Ko au ko te Aliki tela e alofa kae kaimalie ki tino kola ne filifili ne au.

20Ka se fakaasi atu ne au oku mata ke lavea ne koe, me e seai se tino e lavea ne ia au kae ola,

21kae tenei te kaupapa i oku tafa e mafai ei koe o tu i ei.

22Kafai ko gasolo o fano te mainaga o toku malu, ko fakagalo ei ne au a koe ki se mafaga o te kaupapa kae pono ki toku lima, ke oko eiloa ki te taimi tela e seke ei au keatea.

23I kona foki ka tapale keatea a toku lima, ko te mea ke matea ne koe a toku tua kae se ko oku mata.”