FAMASINO 15 - Tuvalu Revised Bible

1Fakamuli ifo, ne fanatu Samasoni o asi ki tena avaga i te taimi o te katiga o saito, kae ne avatu ne ia se tamā kouti ma tena avaga. Ne fai atu Samasoni ki te tamana o tena avaga penei, “Talia mai ke ulu atu au ki loto i te potu o taku avaga.”

Ne seki talia a ia ne te tamana o tena avaga ke ulu ki te potu o tena avaga.

2Muna a te tamana o tena avaga penei, “Au e leake eiloa nei i a koe e se fiafia ki taku tama fafine, tela ne tuku atu ei ne au ki tou taugasoa. Kae e lei me e isi se taina foliki o ia tela e sili atu i te gali. E mafai ne koe o avaga ki ei.”

3Muna a Samasoni, “I te taimi tenei, ka se agasala au i te mea tenei ka fai ne au ki tino Filisitia!”

4Tena, ne fano a ia o po mai e tolu selau alope, kae saisai ne ia a velo o alope taki lua, kae 'sulu atu mo lama ki saiga takitasi.

5Ne faka'ka ne ia a lama kona, kae tuku atu a alope ke tele atu ki fatoaga saito a te kau Filisitia. I te faiga tena ne 'sunu ei a saito kola ko oti ne kati, pela foki a saito i fatoaga, ke oko foki eiloa ki togā olive.

6Ne 'sala ne tino Filisitia te tino ne fai ne ia te mea tena, kae 'logo latou me ne fai ne Samasoni me ko kaitaua i te tamana o tena avaga ne fano o tuku tena avaga ma tena taugasoa. A te tamana o te avaga a Samasoni se tagata mai Timena. Tena, ne olo atu ei a tino Filisitia o 'sunu te fafine tena ke mate, 'sunu foki ne latou te fale o tena tamana.

7Ne fai atu Samasoni ki a latou, “Kona otou faiga! Au e tauto me ka taui atu eiloa ne au te mea masei a koutou tena ne fai!”

8Ne taua atu a ia ki a latou, kae tokouke eiloa ana tino ne tamate. Tena, ne fanatu a ia o nofo i te ana i te kaupapa i Etama.

Ko Fakatakavale ne Samasoni a Tino Filisitia

9Ne o'mai a tino Filisitia o fakamanava i Iuta, kae taua atu ki te fa'kai o Lei.

10Ne fesili atu tagata o Iuta ki tino Filisitia penei, “Ai a e taua mai ei koutou ki a matou?”

Ne tali mai latou, “A matou ne mai o puke fakapagota a Samasoni, o taui te mea ne fai ne ia ki a matou.”

11Tena la, e tusa mo te tolu afe tagata Iuta ne olo atu ki a Samasoni i te ana i te kaupapa i Etama, kae fai atu penei, “Samasoni, se iloa ne koe i tino Filisitia e pule nei i a tatou? Se a te mea tenei ko fai ne koe ki a matou?” Ne tali atu Samasoni penei, “A te mea ne fai ne au ki a latou ko te taui o te mea ne fai ne latou ki a au.”

12Ne fai mai latou penei, “A matou nei ne o'mai o saisai koe ke tuku atu koe ki tino Filisitia.”

Muna a Samasoni, “Tauto mai me e se tamate ne koutou a au.”

13Muna a latou, “Ko 'lei, a koe e saisai fua ne matou ko tuku atu ei koe ki tino Filisitia. A koe e se tamate ne matou.” Tena, ne saisai ei Samasoni ne tagata Iuta ki lopu fou e lua, avatu ei a ia keatea mai te ana.

14I te okoatuga o Samasoni ki Lei, ne tele mai a tino Filisitia ki a ia, o ka'laga ki a ia. I kona foki eiloa, ne oko ifo ei te mana o te Aliki tela ne maua ei ne ia te malosi, motumotu ei ne ia a lopu kola e saisai i ona lima, e pela eiloa me ne filo e paku i se afi.

15Ne maua ne ia i kona te kauvae o te asini tela ne fatoa mate atu. Ne puke ne ia te kauvae tena kae ta ne ia ki ei a tino Filisitia, tela e tusa mo te afe o tino ne mate.

16Tena ne usu ei te pese a Samasoni penei,

“Ne tamate ne au e toko afe tagata ki te kauvae o te asini;

E fakatafola ne au latou ki te kauvae o te asini.”

17I te otiga o te mea tena, pei keatea ei ne ia te kauvae o te asini. A te koga ne tupu ei te mea tena e fakaigoa ko Lamata Lehi.

18Ne fia inu Samasoni, tena ne talo ei a ia ki te Aliki penei, “Ne tuku mai ne koe te manumalo ki a au; e a, ka tiakina eiloa ne koe au ke mate i te fia inu, kae ke puke au ne tino Filisitia fapau'pau konei?”

19Tena, ne fakamafa ne te Aliki te laukele i Lei, kae puna mai ei te vai. Ne inu Samasoni ki ei, malosi ei tena foitino. Ne fakaigoa te vaipuna tena ko Hakole, kae tena eiloa koi tu mai i Lei.

20A Isalaelu ne pule ne Samasoni i tausaga e luasefulu, ka ko te malo o Filisitia i te taimi tena e pule i a latou.