2 KOLINITO 4 - Tuvalu Revised Bible

Ko Koloa Faka te Agaga i Loto i Fagu Kele

1Ko maua ne matou te galuega tenei i te alofa 'nau o te Atua, ko se loto vaivai foki matou.

2Ko oti ne tuku keatea ne matou amioga 'funa mo amioga fakalumaluma; e 'teke ne matou te amio takolekole mo te taku'se o te muna a te Atua; ka ko te motou galuega e fai i mua o te Atua, ko te fakaasi atu omotou uiga 'lei i te takutonu atu o te munatonu ki loto o tino katoa.

3Kafai e se maina 'lei te motou tala 'lei, e se maina fua ki a latou kola ko malaia.

4Ne se talitonu latou i te mea ko fakapouligina olotou loto ne te atua masei o te lalolagi nei, ko te mea ke se matea ne latou a te mainaga o te Tala 'Lei e uiga ki te 'malu o Keliso, tela ko te fakatusa tonu o te Atua.

5E se talai atu matou mo matou ake eiloa, kae e talai atu ne matou a Iesu Keliso ko te Aliki, ka ko matou ko otou tavini ona ko Keliso.

6Kene 1.3 A te Atua tela ne fai atu penei, “Ke 'pula mai te mainaga mai te pouliga,” ko te Atua foki eiloa tela ne fai ne ia ke 'pula te mainaga tenei i omotou loto, ke maua ei ne tatou a te poto e uiga ki te 'malu o te Atua, tela e 'pula i foliga o Keliso.

7Tela la, e ui eiloa me ko maua ne tatou te koloa faka te Agaga tenei, e pau tatou mo fagu kele i te ma'fa gofie. Ne fai ne te Atua penei o fakaasi i te mana e o ia, kae se e o tatou.

8E masani matou o fetaui sale mo puapuaga, kae se logofiofio matou. I nisi taimi e 'fonu matou i manatu fakalotoloto lua, kae se loto vaivai eiloa matou.

9E fakasauagina matou kae se 'mate, ne ta ki lalo, kae 'lei faeloa matou.

10I taimi katoa e ave sale faeloa ne matou i omotou foitino a te mate o Iesu, ko te mea ke matea 'lei tona olaga i omotou foitino.

11I te motou olaga katoa, e puapuagatia faeloa matou toe itiiti kae 'mate ona ko Iesu, ko te mea ke matea 'lei tona olaga i omotou foitino 'mate konei.

12Tela la, e se afaina eiloa te motou 'mate, kae ga'lue eiloa matou ko te mea ke maua ne koutou te ola se gata mai.

13 Sala 116.10 Muna a te Tusi, “Au e faipati ona ko au ko talitonu.” I te Agaga eiloa e tasi o te fakatuanaki, ne ala ei o fai'pati foki matou pena me i a matou ko tali'tonu.

14Me iloa tonu ne matou a te Atua, tela ne fakatu ne ia te Aliki ko Iesu mai tino 'mate; ka fakatu foki ne ia tatou mo Iesu, kae aumai foki ne ia tatou fakatasi ki ona mua.

15A mea katoa kola ne puapuagatia ei matou, ne fai mō te 'lei o koutou. Ia, e pena foki o maua ne tino e tokouke a te alofa tauanoa o te Atua, tela ka mafai ei o siki atu ne latou a 'talo fakafetai e uke, mō te vikiga o te Atua.

Ko te Ola i te Fakatuanaki

16E se mafai o loto vaivai matou. E tiga eiloa i te gasolosolo malie o vaivai omotou foitino, ka ko te motou malosi faka te Agaga e fakafou faeloa i aso takitasi.

17Ka ko te puapuaga se tumau tenei, e isi eiloa te faigata kae mama fua ki omotou manatu, kae ka aumai ne ia ki a matou te 'malu se gata mai, tela e sili atu tona taua i lo te puapuaga tenei.

18Tela la, ko fakamautakitaki omotou mafaufauga ki mea kola e se matea ki mata, kae se ki mea kola e matea ki mata. A mea kola e matea ki mata e se tumau, ka ko mea kola e se matea, e tumau eiloa ke oko ki te se gata mai.