ESEKIELU 40 - Tuvalu Revised Bible

17Ne ave au ne te tagata tena i te mataloa ke oko ki te potu fono. E tusa mo te tolusefulu a potu e piki ki te pui tafa ki tua, kae i mua o potu kona e isi se koga e fola ki fatu,

18tela e silia atu i feitu katoa o te potu fono. A te potu fono tafa ki tua tenei e tai tu i te malologa i lo te potu fono tafa ki loto.

19E isi se mataloa i te koga tai maluga, tela e fano ki te potu fono tafa ki loto. Ne fua ne te tagata tena te mao o te ava mataloa kona, e tusa mo te limasefulu mita.

20Tena, fua foki ei ne te tagata tena a te mataloa i te feitu ki matu tela e fano ki te potu fono tafa ki tua.

21A potu tiute e takitolu i feitu takitasi o te auala, a pui i te va o potu kona, mo te potu lasi, e pau katoa te fua pela mo potu i te mataloa ki te saegala. A te loa o te auala o te mataloa tena e tusa mo te luasefulu lima mita, ka ko te lauefa e sefululua mo te afa mita.

22A te potu lasi, famalama mo ata o lakau ko pama, e pela eiloa mo mea kola i te mataloa ki te saegala. I konei, e fitu a sitepu ki te mataloa, ka ko te potu lasi e tu i te mata kae fakasaga ki te potu fono.

23Mai i te mataloa ki matu tenei o fanatu ki te potu fono, e isi foki se mataloa tela e fano ki te potu fono tafa ki loto, e pela eiloa mo te mataloa i te feitu ki te saegala. Ne fua ne te tagata tena te va o te ava mataloa kona, e tusa mo te limasefulu mita.

24Fakamuli ifo, ne ave foki au ne te tagata tena ki te feitu ki saute, i kona ne lavea foki ne maua te sua mataloa. Ne fua ne ia, kae e pau eiloa mo nisi mataloa muamua.

25E isi ne fakamalama o potu i te mataloa tena, e pela eiloa mo mataloa muamua. A te loa o te auala o te mataloa tena e tusa mo te luasefulu lima mita, ka ko te lauefa e sefululua mo te afa mita.

26E fitu a sitepu ki luga i te mataloa tena, mo tena potu lasi e tu foki i te mata kae fakasaga ki te potu fono. E isi foki ne ata o lakau ko pama kola e koli i feitu ki loto o pui kola e fakasaga ki te auala.

27I konei foki, e isi se mataloa tela e fano ki te potu fono. Ne fua ne te tagata tenei a te mao ki te mataloa tenei, e tusa mo te limasefulu mita.

28Ne avatu au ne te tagata tena i loto i te mataloa i saute, oko atu ei ki te potu fono tafa ki loto. Ne fua ne ia a te mataloa tena, kae e pau eiloa mo mataloa i te pui tafa ki tua.

29-30A ona potu tiute, tena potu lasi, mo ona pui ki loto e pau katoa eiloa mo nisi mataloa. E isi foki ne fakamalama i potu o te mataloa tenei. A te loa e luasefulu lima mita, ka ko te lauefa e sefululua mo te afa mita.

31A tena potu lasi e fakasaga ki te sua potu fono, ka ko ata o lakau ko pama e koli i pui i feitu o te auala. E valu a sitepu ki luga i te mataloa tena.

32Ne ave au ne te tagata tena i loto i te mataloa ki te saegala, oko atu ei ki loto i te potu fono tafa ki loto. Ne fua ne ia te mataloa, e pau eiloa mo nisi mataloa.

33A ona potu tiute, tena potu lasi, mo ona pui ki loto e pau katoa te lasi mo potu pena i nisi mataloa. E isi ne fakamalama i kona, pela foki i te potu lasi. A te loa e luasefulu lima mita, ka ko te lauefa e sefululua mo te afā mita.

34A te potu lasi e fakasaga ki te potufono tafa ki tua. A ata o lakau ko pama e koli i pui i feitu o te auala. E valu a sitepu ki luga i te mataloa tena.

35Tena, ne ave foki au ne te tagata tena ki te mataloa ki matu. Ne fua ne ia, e pau eiloa mo nisi mataloa.

36E isi foki ne potu tiute i ei, mo te potu lasi, mo pui ne fakagaligali, mo fakamalama i feitu katoa. A te loa e luasefulu lima mita, ka ko te lauefa e sefululua mo te afā mita.

37A te potu lasi e fakasaga ki te potu fono tafa ki tua. A ata o lakau ko pama e koli i pui i feitu o te auala. E valu a sitepu ki luga i te mataloa tena.

38I te potu fono tafa ki tua, e isi se potu fakaopoopo tela e piki ki te mataloa ki loto, i te feitu ki matu. E matala ki loto i te potu lasi tela e fakasaga ki te potu fono, i kona ne fulu ei ne latou a foitino mate o manu vae fa kola e fai o sunu katoa mo fai a taulaga.

39I te potu lasi tenei, e fa taipola i ei, e taki lua i feitu takitasi o te potu. Kona a taipola e tamate saale ne latou i ei a manu vae fa ke fai mo taulaga; me e sunu katoa, io me fai mo taulaga mo agasala, io me ko taulaga o te toe togiga o te agasala.

40E isi foki ne taipola pena i tua o te potu, e taki lua i feitu takitasi o te auala o te mataloa ki matu.

41E tusa mo te valu te aofaki katoa o taipola kola e tamate i ei a manu mo taulaga: e fa i loto i te potu kae e fa i tua i te potu fono.

42A taipola e fa i te fakaosoga, kola e fakatoka i ei a taulaga ke sunu katoa, ne faite ki fatu. E taki limasefulu senitimita te maluga, ka ko koga i luga e taki fitusefulu lima senitimita te sikuea. A mea katoa kola e fakaaoga mo tamate saale ei a manu o te taulaga e teu i luga i taipola kona.

43E isi ne patini e taki fitusefulu lima milimita te lauefa e 'tele i kaugutu o te taipola. A kano manu katoa kola e fai o ofo mo fai te taulaga e tuku i luga i taipola.

44Tena, ne avatu foki ne ia au ki loto i te potu fono tafa ki loto. E lua potu e matala ki loto i te potu fono tafa ki loto, e tasi e fakasaga ki saute i tafa o te mataloa i matu, ka ko te sua potu e fakasaga ki matu i tafa o te mataloa ki saute.

45A te tagata tena ne fai mai i te potu tela e fakasaga ki saute ko te potu o faitaulaga kola e galue i te Faletapu,

46ka ko te potu tela e fakasaga ki matu ko te potu o faitaulaga kola e galue i te fata-fai-taulaga. A faitaulaga katoa ne tupu mai i a Satoka; ko latou fua kona i te matakaiga o Levi e saoloto o olo ki mua o te Aliki o tavini atu ki a ia.

47Ne fua ne te tagata tena a te potu fono tafa ki loto, e tusa mo te limasefulu mita te sikuea. A te Faletapu e tu i te feitu ki te togala, ka ko te fata-fai-taulaga e tu i ona mua.

48Tena ne ave ei ne ia au ki te fapaologa o te Faletapu. Ne fua ne ia a te mataloa tena: e tusa mo te lua mo te afā mita te poko kae e fitu mita te lauefa, mo pui i feitu e takitasi mo te afā mita te matolu.

49E isi ne sitepu e oloake ki te fapaologa tena, tela e tusa mo te sefulu mita te lauefa kae ono mita te poko. E lua a pou, e takitasi i feitu takitasi o te mataloa.