IOPU 12 - Tuvalu Revised Bible

1-2E tonu, a koutou ko te leo o te fenua,

kafai e mate koutou,

E mate tasi atu eiloa koutou mo te poto.

3Au se tagata e lasi toku mafaufau, e pena foki eiloa mo koutou;

Au e se fatauva atu i a koutou, e iloa ne tino katoa otou muna katoa ne fai.

4Oku taugasoa e kata mai foki ki a au; e kata latou,

Kae tela la, au e amiotonu kae seai saku agasala;

Kae e isi se taimi ne tali mai ei te Atua ki aku talosaga.

5E seai ne fakalavelave e oko ki a koutou,

Kae o'mai faeloa koutou o fakalili au;

E ta ne koutou te tagata tela ko pili foki eiloa o paku ki lalo.

6A tino kaisoa mo tino se talitonu ki te Atua,

E ola i te manuia mo te filemu, kae tela la,

A te atua o latou ko te lotou malosi.

7Ke oko foki eiloa ki manu eva mo manu o te laukele,

E uke foki eiloa a mea e mafai o akoako mai ne latou ki a koe;

8Fesili atu ki manu o te laukele mo manu o te tai ke tuku mai olotou poto.

9E iloa ne latou katoa, me ko te Aliki ne faite ne ia latou.

10Ko te Atua e pule i te ola o ana mea ne faite;

A te ola o tagata katoa e i tena pulega.

11E pela mo tou laulaufaiva e fiafia o tami ki meakai,

E pena foki te fiafia o tou taliga o fakalogo ki muna.

12-13A toeaina e isi te poto i a latou,

kae ko te Atua e poto atu kae mana atu foki i a latou.

A toeaina e isi te atamai i a latou,

ka ko te Atua e atamai atu

Kae isi foki sena mana o fai a mea valevale.

14Kafai ne ofa ne te Atua se mea, ko oi te tino e mafai ne ia o toe faite?

Ko oi foki te tino e mafai ne ia o fakasao te tino ne pei ki te falepuipui ne te Atua?

15A te oge vai e mafua manafai e taofi ne te Atua a vaiua ke se tō;

A te lofiaga e mafua manafai e tuku mai ne te Atua a vai ke tafe mai.

16A te Atua e mafi kae manumalo faeloa;

A te tino loi mo te tino ne fakaloiloigina,

E i lalo katoa o tena pulega.

17E ave keatea ne ia a te poto o takitaki,

Kae fai ne ia a tino pule ke pela me ne vale.

18E tapale keatea ne ia a tupu mai olotou nofogaaliki,

Kae fakapagota ne ia latou;

19E fai ne ia a faitaulaga mo tino maluga ke malalo.

20E pono ne ia a gutu o tino kola e fakatuagagina,

Kae ave keatea ne ia a te poto o toeaina.

21E fakamasiasi ne ia a tino i tofi maluga,

Kae fakagata ne ia a te malosi o tino pule.

22E avatu ne ia a te mainaga ki koga kola e pouli pela mo te mate.

23E fai ne ia a malo ke malosi kae takutakua,

Ka oti ko fakatakavale kae ta fakapalele ne ia.

24E fai ne ia olotou takitaki ke valea,

Kae tuku ke tekateka sale fua kae se iloa o fai se mea;

25E oloolo sale latou i te pouliga, kae takasese e pela me ne tino kona.