SALAMO 66 - Tuvalu Revised Bible

Ko te Pese Tavae mo te Fakafetai

1Ke ka'laga mo te fiafia tino katoa ki te Atua!

2Ke usu pese atu koutou ki te 'malu o tena igoa;

Tuku atu ki a ia te vikiga!

3Fai atu koutou penei ki te Atua,

“Ko oko eiloa i te fakaofoofogia o au galuega ne fai!

Ko te malosi o tou 'mana ko ifo ei ou fili i ou mua i te ma'taku.

4E tapuaki atu ki a koe a tino katoa i te lalolagi;

E usu pese tavae ki a koe,

E usu pese tavae ki tou igoa.”

5O'mai o onoono ki mea ne fai ne te Atua,

Ko ana galuega fakaofoofogina ki tino.

6 Eso 14.21; Iosu 3.14-17 Ne fai ne ia te tai ke 'masa;

Ne sasale i ei 'tou tupuga ki te sua feitu;

i kona ne fia'fia ei tatou i ana mea ne fai.

7Ko tena malosi eiloa e pule ei a ia ki te se gata mai,

Kae tausi faka'lei ne ia a malo ke seai se tino e tu mai o 'teke ki a ia!

8Koutou malo katoa, tavae atu ki te tou Atua;

Ke lagona ona tavaega mai i a koutou.

9Ne tausi ne ia tatou ke ola kae ne seki tiaki ne ia tatou ke pakū.

10Te Atua, ko oti ne tofotofo ne koe matou;

Ne tofotofo ne koe matou, e pela mo te siliva e faka'ma ki te afi.

11Ne tuku atu ne koe matou ke 'to ki loto i te malei,

Ne fakaeke foki ne koe amoga 'mafa ki omotou tua.

12Ne tuku mai ne koe omotou fili ke lakalaka matou;

Ne sasale matou i loto i te afi mo te vai, kae nei,

Ko aumai ne koe matou ki te koga e malu 'lei ei matou.

13E avatu ne au a taulaga 'sunu ki tou fale;

E avatu ne au ki a koe a mea ne tauto atu ei au.

14Ka avatu ne au ki a koe a mea kola ne faipati au ki ei,

i te taimi e puapuagatia ei au.

15Ka ofo atu ne au a mamoe ke 'sunu i luga o te fata-fai-taulaga;

Ka ofo atu ne au a pulumakau ta'gata mo kouti ke fai mo taulaga,

Ka ko te manogi ka oko atu ki luga i te vanimonimo.

16O'mai o fakalogo'logo, a koutou katoa kola e ava ki te Atua,

Me ka taku atu ne au ki a koutou a mea ko oti ne fai ne ia mo oku.

17Ne fakatagi atu au ki a ia mō se fesoasoani;

Ne tavae atu au ki a ia i pese.

18Moi se taku tonu ne au aku agasala, Penei e se saga mai te Aliki ki a au.

19Ka ko te Atua ne saga tonu mai eiloa ki a au;

Ne fakalogo mai eiloa ki taku 'talo.

20Au e 'viki fakafetai ki te Atua me ne seki fakaseaoga ne ia taku 'talo,

Ne seki 'fuli foki eiloa tena alofa tumau mai i a au.