ESEKIELU 17 - Tuvalu Revised Bible

Ko te Tala Fakatusa o te Aeto mo te Vine

1A te Aliki ne faipati mai ki a au,

2ana muna, “Te tagata ola, fakamatala atu se tala fakatusa ki te kau Isalaelu

3ke fakaasi atu ki a latou a muna konei a te Aliki Sili: E isi se aeto lasi eiloa kae gali ona fulu, mo ona kapakau e lasi kae e fola. Ne eva atu ki Mauga o Lepanona kae ne fati ne ia te taulu o te lakau ko te alasi,

4tela ne ave ne ia ki te fenua fai mea togi, kae tuku ne ia i te fa'kai e nofo i ei a tagata fai koloa.

5Oti aka, puke mai ei ne ia se tama lakau mai i te fenua o Isalaelu, kae toki ne ia i te laukele e ola te one i ei, kae e lasi te vai, tela e fai ne ia ke ola te lakau.

6Ne ola ake te lakau, kae ne foliga mai ki te vine tela e malālālo fua i lalo. A kaula e tupu ki luga o fakasaga ki te aeto, ka ko aka e olo eiloa ki te koga poko. A te vine tena e fonu i kaula mo lau.

7“E isi aka foki te sua aeto lasi mo kapakau lasi kae matolu ona fulu. A te vine i te taimi nei ko olo atu ona aka ki te aeto, mo ona lau ko fuli atu foki ki ei, mo te fakamoemoega ke aumai ne ia ne vai ke uke atu i lo vai i te fatoaga tela e ola i ei a te vine tena.

8Ka ko te vine tena ne toki i se laukele ola, se laukele e lasi te vai i ei, ko te mea ke ola ona lau kae fua mai one fuataga kae ke fai mo vine tafasili i te gali.

9“Tena la, ne fesili atu ei au, te Aliki Silia, penei: E mata e ola te vine tenei o tupu ake o lasi? E a, e se vau te aeto muamua o unu ona aka, fatifati ona kaula kae tiakina ke magemage? E mafai fua ne se tino se mafi io me se malo se malosi o unu keatea.

10E tonu me ne toki, kae mata e tupu ake o ola? E a, e se mage manafai ko agi mai ki ei a te matagi mai i te saegala? E a, e se mage i te koga tena e ola i ei?”

Ko Fakamatala te Tala Fakatusa

11Muna a te Aliki ki a au,

122Tupu 24.15-20; 2NTupu 36.10-13 “Fesili atu ki te kau loto teke kona me e iloa ne latou a te uiga o te tala fakatusa? Fai ki a latou, i te tupu o Papelonia ne vau ki Ielusalema kae ave ne ia te tupu mo ana ofisa ki Papelonia.

13Ne puke ne ia te kaiga e tokotasi o te tupu, fai ne ia te feagaiga mo ia tena, kae fai ne ia ke tauto ke fakamaoni eiloa a ia ki te feagaiga. Ne sai fakapagota ne ia a tagata maluga,

14ko te mea ke mo a te malo e toe fanake o takutakua kae ke onoono tonu foki ke tausi eiloa a te feagaiga tena.

15Ka ko te tupu o Iuta ne seki talia ne ia, uga ei ne ia ne tagata ki Aikupito ke puke mai ne solofanua mo se kautau lasi eiloa. E mata e taunu tena fakamoemoega? E mata e mafai o iku lei a tena mea tena e fai? E se mafai o tuku atu a ia ke fano se fakasala, manafai ne ofa ne ia a te feagaiga!

16Muna a te Aliki Sili, “E pela eiloa mo te iloa tonu i a au ko te Atua ola, e pena foki te iloa tonu i te tupu tenei e mate eiloa i Papelonia, me ne ofa ne ia a tena tautoga mo te feagaiga a laua mo te tupu o Papelonia, tela ne fakasopo ne ia a ia ke fai mo tupu.

17Ke oko foki eiloa ki te kautau malosi a te tupu o Aikupito, ka se mafai ne latou o fesoasoani ki a ia o taua ki te kau Papelonia — manafai ko faite a fakatuga one a te kau Papelonia kae keli a lua, ko te mea ke tamate ne latou a tino e tokouke.

18Ne ofa ne ia tena tautoga mo te feagaiga a ia ne fai. Ne fai ne ia a mea katoa kona, kae nei ka se mafai eiloa a ia o sao.”

19Muna a te Aliki Sili, “Au ko te Atua ola, ko fai tonu atu au me ka fakasala ne au a ia ona ko te ofaga ne ia o te feagaiga tela ne tauto a ia i toku igoa me e tausi eiloa ne ia.

20Ka fola ne au se tili a te tagata afuli manu ke lavelave a ia i ei. Ka ave ne au a ia ki Papelonia kae fakasala a ia i kona, me i a ia ne seki fakamaoni mai ki a au.

21A sotia lei eiloa a ia ka mate i te taua, ka ko tino kola e toe ka salalau i koga valevale. Ka iloa ei ne koe i a au, te Aliki, tena ne faipati atu.”

Ko te Tautoga a te Atua mo se Fakamoemoega Lei

22Konei a muna a te Aliki Sili:

“Ka puke ne au se taulu o se alasi maluga

Kae fati keatea ne au se somo fatoa tupu ake;

Ko toki ne au i se mauga maluga,

23I luga i te mauga maluga eiloa o Isalaelu.

Ka tupu ake ona kaula kae fua mai ona fuataga

Kae fai mo alasi tafasili i te gali.

A manu eva valevale ka nofo i kona o fakamalu i tena maluga.

24A lakau katoa i luga i te fenua,

Ka iloa ne latou i a au ko te Aliki.

E kati ki lalo ne au a lakau maluga

Kae fai a lakau malalo ke ola ake o maluga.

E fakamae ne au a lakau lau usiusi,

Kae fai ne au a lakau lau magemage ke lau usiusi.

Ko au, te Aliki, tena ne faipati atu. Ka fai eiloa ne au a mea kola ne fai atu ne au me e fai ne au.”