IELEMIA 42 - Tuvalu Revised Bible

A te Fenua ko Fai ki a Ielemia ke Talo mo latou

1Tena la, ne o'mai ei a takitaki o kautau, fakatasi mo Ioananu te tama tagata a Kalia, mo Asalia te tama tagata a Hosaia, mo tino katoa o te fenua i olotou tulaga kesekese,

2kae fai mai ki a au penei, “Fakamolemole, ke talia mai eiloa ne koe a te motou fakamolemole! Talo atu ki te Aliki te tou Atua mo matou. Talo atu mo matou katoa konei koi toe. A matou muamua e se fakatau eiloa i te tokouke, kae nei, ko mutana fua matou konei e toe, e pela eiloa mo te mea e lavea ne koe.

3Talo atu ki te Aliki te tou Atua ke fakaasi mai te auala e tau o olo matou i ei, mo te mea e tau o fai ne matou.”

4Ne tali atu au penei, “Ko lei. Ka talo au ki te Aliki te tou Atua, e pela eiloa mo te otou fakamolemole, kae ka taku atu eiloa ne au so se mea tela e fakaasi mai ne Ia. E se funa eiloa ne au se mea.”

5Tena ne toe fai mai latou ki a au penei, “A te Aliki ke fai mo molimau, tela e tonu kae fakamaoni, ki a matou manafai e se fakalogo matou ki fakatonuga katoa kola e aumai ne Ia ki a matou e auala i a koe.

6Faitalia me e fiafia matou ki ei io me ikai, kae ka faka'logo eiloa matou ki te Aliki te motou Atua, ko Ia tena e manako matou ke talo koe ki ei. Ka solosolo lei te olaga o matou, manafai e faka'logo matou ki a Ia.”

Ko te Tali a te Aliki ki te Talo a Ielemia

7E sefulu aso mai tua ifo, kae faipati mai te Aliki ki a au;

8tena ne fakamaopoopo ei ne au a Ioananu mo takitaki o kautau kola ne o'mai mo ia, fakatasi mo nisi tino ake katoa.

9Ne fai atu au ki a latou, “A te Aliki, te Atua o Isalaelu, tela ne talo au ki ei mo koutou, ne fai mai penei,

10‘Kafai e fiafia koutou o nofo tumau i te fenua tenei, kae ka atiake ne au koutou kae se ta fakamasei; ka toki ne au koutou ke ola pela, me ne lakau, kae se unu keatea ne au koutou. Au ko oko eiloa i te fanoanoa i te fakamaseiga tela ne fakaoko mai ne au ki a koutou.

11Fakagata te otou mataku i te tupu o Papelonia. Au e fakatasi mo koutou, kae ka fakasao ne au koutou mai i tena malosi.

12Ona ko au se Atua alofa, tela la, ka fai ne au a ia ke alofa atu ki a koutou kae tuku atu koutou ke foki ki te otou fenua. Ko au, te Aliki, tena ne faipati atu.’

13-15“Ka ko koutou kona e toe i Iuta, e se tau mo koutou o 'teke ki te Aliki te otou Atua o ita o nofo i te fenua tenei. E se tau mo koutou o fai pena, ‘Ikai, a matou e olo o nofo i Aikupito, i kona e se toe fetaui ei matou mo ne taua, se toe lagona foki ne matou te kalaga o te taua, kae se toe fia'kai foki matou. ’Kafai e faipati koutou pena, kae ka fai mai te Aliki Malosi, te Atua o Isalaelu penei, ‘Kafai e finau loa koutou ke olo o nofo i Aikupito,

16kae ka oko atu ki a koutou a te taua tela e ma'taku koutou i ei, mo te fiakai tela e se manako koutou ki ei, kae ka mate eiloa koutou i kona i Aikupito.

17A tino katoa kola e manako eiloa o olo o nofo i Aikupito ka mate i te taua, io me ko te fiakai, io me i te famai. E seai eiloa se tino i a koutou e ola, e seai eiloa se tino i a koutou e sao mai i te mala tela ka fakaoko ne au ki a latou.’

18“A te Aliki, te Atua o Isalaelu, ne fai mai penei, ‘E pela eiloa mo toku kaitaua tela ne oko atu ki tino Ielusalema, ka pena foki o oko atu ki a koutou manafai e olo koutou ki Aikupito. A tino ka mataku ma kilo atu ki a koutou; ka takalialia a tino i a koutou, kae fakaaoga te otou igoa i olotou muna fakamalaia. Ka se toe lavea foki eiloa ne koutou a te koga tenei.”’

19Ne faipati atu eiloa au penei, “A te Aliki ko oti ne fai mai ki a koutou konei e toe i Iuta, ke se olo ki Aikupito. Tela la, au e fai atu ki a koutou i te taimi nei

20i te otou mea tena ka fai se mea se tonu. Ne fai mai koutou ki a au ke talo atu au ki te Aliki te tou Atua mo koutou, kae tauto mai koutou me e fai ne koutou a mea katoa kola e fakatonu mai ne ia.

21Kae nei, ko oti ne fai atu ne au ki a koutou, kae e teke ne koutou a mea katoa kola ne uga mai ei au ne te Aliki te tou Atua ke fai atu ki a koutou.

22Tela la, masaua te mea tenei: A koutou ka mate i te taua, io me i te fiakai, io me i famai, i te fenua tela e fia olo koutou o nofo i ei.”