SALAMO 83 - Tuvalu Revised Bible

Ko te Talo mō te Takavalega o Fili o Isalaelu

1Te Atua, sa nofo 'mu; sa nofo faka'logo, sa filemu!

2Kiloke! Ko fai taua atu ou fili,

Ka ko latou kola e takalialia ki a koe, ko teke atu.

3Ko fai olotou togafiti 'funa ki ou tino;

Kae fai foki olotou pulepulega ma'sei,

Ki tino kola e puipui ne koe.

4Olotou muna, “O'mai ke fakamasei ne tatou te lotou fenua,

Ko te mea ke puli a Isalaelu ki te se gata mai.”

5Ko loto tasi latou i olotou fuafuaga,

Ke fai se kautau o 'teke atu ki a koe:

6A tino kona ne tino Etoma, Isamaeli,

Moapi, mo tino Hakala,

7E pena foki mo tino Kepola, Amoni, Amaleka,

Filisitia mo Tulo.

8A Asulia ko kau foki ki a latou,

Ko fai mo fesoasoani malosi o te fanauga a Lota.

9 Fama 7.1-23; Fama 4.6-22 Fai atu ki a latou a te mea ne fai ne koe ki tino Mitiana,

Mo Sesela, mo Iapino i te Vaitafe o Kisona.

10Ne fakatakavale ne koe a latou i Enetolo,

Ka ko olotou foitino ne pala i luga i te laukele.

11 Fama 7.25; Fama 8.12 A te mea tela ne fai ne koe ki a Olepa mo Sepa,

Ke fai foki pena ki olotou takitaki.

Fakatakavale ake olotou pule pela mo te mea ne fai ne koe ki a Sepa mo Salemuna,

12Kae fai ake olotou muna penei,

“Ka puke mo tatou te fenua o te Atua.”

13Toku Atua, fakasalalau atu latou pela me ne pefu,

E pela foki me ne mouku pakupaku e agina i te matagi.

14E pela mo te vao e 'ka i te afi,

E pela foki mo mauga e 'ka i te afi,

15Afuli atu latou keatea ki tou afā,

Kae fakamatakutaku latou ki tou matagi fakamataku.

16Te Aliki, fakamasiasi ake latou ke 'ma,

Ko te mea ke iloa ne latou tou 'mana.

17Ke fakatakavale ake latou, kae ke ma'taku ki te se gata mai;

Ke 'mate foki latou mo te masiasi.

18Ko te mea ke iloa ne latou me ko koe fua te Aliki e tokotasi,

Ko te pule tafasili i te lalolagi katoa.