ISAIA 3 - Tuvalu Revised Bible

Ko te Masei Valevale i Ielusalema

1I te taimi nei, a te Aliki Malosi ka ave keatea ne ia mai i Ielusalema mo Iuta a mea katoa, mo tino katoa kola e fakalagolago ki ei a tino o te fenua. Ka ave keatea ne ia olotou meakai mo vai,

2olotou sotia takutakua mo sotia, famasino, pelofeta, tino fakamatala mea tupu i aso fakamuli, mo tino maluga o te fa'kai,

3olotou takitaki o kautau mo takitaki o te fenua, tino o te malo mo tino fakataulaitu.

4Ka tuku atu ne te Aliki te fenua ke pule ne tamaliki tagata kola e seki matua olotou mafaufau.

5A tino katoa ka fakatau fai togafiti i a latou eiloa. A talavou ka se ava ki olotou takitaki, mo tino se aoga ka se fia fakaava ki tino e pule i a latou.

6Ka oko mai te taimi e fai atu ei a tino i se kaukaiga e tasi ki se tokotasi o latou penei, “Ko koe fua e isi ne gatu e pei koe i ei, tela la, vau ke fai koe mo takitaki o matou i te taimi tenei o fakalavelave.”

7Kae ka tali mai a ia penei, “Se ko au! E se mafai ne au o fesoasoani atu ki a koutou. E seai foki ne aku meakai io me ne gatu. Sa faigina au mo takitaki o koutou!”

8Ao, Ielusalema ko malaia! Iuta ko se aoga! A olotou muna katoa e fai, mo mea a latou e fai e teke atu ki te Aliki; a muna teke a latou ki te Atua ko lavea atu eiloa.

9A olotou uiga masei ka malaia eiloa latou i ei. A olotou agasala ko lavea atu eiloa, pela eiloa mo tino Sotoma. Ko malaia eiloa latou, ne fai foki eiloa ne latou.

10A tino amiotonu ka fiafia kae ka solosolo lei foki olotou olaga, kae ka fakaaoga foki eiloa ne latou mo te fiafia a fua o olotou galuega.

11Ka ko tino amio masei ka malaia; a mea kola ne fai ne latou ki nisi tino ka taui mai ki a latou.

12A tino fai tupe kaitalafu e fakapuapuaga ne latou oku tino, ka ko tino kola e fakagalue ne latou olotou tupe e fakatogafiti ne latou oku tino.

Toku fenua, koutou ko taki 'se ne otou takitaki, tela la, ko se iloa ne koutou te auala e tau o olo koutou i ei.

A te Aliki ko Fakamasino ne ia Tena Fenua

13A te Aliki ko toka o fakaasi mai tena mataupu; ko toka o fakamasino ne ia tena fenua.

14A te Aliki ka fakamasino ne ia a takitaki mo toeaina o tena fenua. Konei ana muna ne fai: “A koutou ne olo o fao malo a vine mai togavine, ka ko otou fale ko fonu i mea ne fao mai ne koutou mai i tino mativa.

15E seai lele eiloa se saolotoga o koutou o taumafai o tukipala oku tino, kae fao a mea a tino mativa. Ko au, te Aliki Tafasili i te Maluga tena ne faipati atu.”

Ko Muna Polopoloki ki Fafine o Ielusalema

16Muna a te Aliki, “Kiloke ki te fakamatamata o fafine o Ielusalema! E sasale mo olotou isu e fakatu ki luga, kae e faipati faeloa ki muna takolekole. E sasale fakaogaoga, ka ko malele i olotou fatugugu e tagitagi pela me ne pēle.

17Ka fakasala eiloa ne au latou, ka vele ne au olotou ulu ko te mea ke kila olotou ulu.”

18Ka oko mai te aso e ave keatea ei ne te Aliki mai i fafine o Ielusalema a mea katoa kola e fakamatamata sale ei latou — ko teuga i olotou fatugugu, i olotou ulu, i olotou ua,

19pela foki i olotou lima. Ka ave keatea foki ne ia olotou veli,

20mo olotou pulou, pela foki mo taulima fakataulaitu i olotou lima mo olotou taugasulu;

21mo mama i olotou matikao mo olotou isu;

22mo olotou gatu loa, mo gatu mo pausi tupe;

23mo olotou gatu āta, olotou solosolo lino, mo solosolo mo veli kola e sai ne latou i olotou ulu.

24Ka seai ne sausau o latou, tela la, ka manogi masei olotou foitino; ka seai ne fusi gali o latou, kae ka fusi fua ki lopu masei; ka seai ne olotou laulu gali me ka kati kila katoa; ka seai ne gatu gali o latou, na ko gatu masaesae fua; a te gali o latou ka fuli ki te masiasi!

25A tagata o te fa'kai, ke oko eiloa ki tagata mafi eiloa, ka mate i te taua.

26A mataloa o te fa'kai ka tagi fanoanoa, pela foki te fa'kai ka pela me se fafine tela e sagasaga fuafua i te laukele.