FAMASINO 9 - Tuvalu Revised Bible

Ko Apimeleko

1A Apimeleko, te tama tagata a Kitiona ne fanatu ki te fa'kai foliki o Sekema, te koga e nofo ei a kaiga katoa o tena matua, kae fai atu ki a latou

2ke fesili atu ki tagata o Sekema penei, “A koutou e ma'nako ke pule koutou ne te tinofitu tamaliki a Kitiona, io me se tino fua e tokotasi? Masaua i a Apimeleko ko te kano mo te toto tonu o koutou.”

3Ne fai'pati a kaiga o te matua o Apimeleko ki tagata Sekema e uiga ki te mea tena, tena ne iku aka i tagata o Sekema i a latou e tau'tali i a Apimeleko me se kaiga o latou.

4Ne tuku atu ne latou ki a ia e fitusefulu siliva mai te faletapu o Paala o te Feagaiga, tena ne fakaaoga ne ia te tupu tena o togi ki ei se potukau masei ke kau mo ia.

5Ne fanatu a ia ki te fale o tena tamana i Ofala, tena ne tamate ei ne ia ona taina kola e tinofitu, ko tama tagata a Kitiona, i luga i te fatu e tasi. Ka ko Iotama, te toekimuli a Kitiona ne muni, tela la, e seki tamate.

6Tena, ne olo atu ei a tagata Sekema katoa, mo tagata Petemilo ki te lakau ko te oka i Sekema, te koga ne fai ei ne latou a Apimeleko mo tupu.

7I te logoga o Iotama i te mea tena, ne fanatu ei a ia o tu i luga i te Mauga o Kelisima kae ka'laga atu ki a latou penei, “Faka'logo mai ki a au, koutou tagata o Sekema, kae ka faka'logo atu foki te Atua ki a koutou!

8I te aso e tasi, ne maopoopo fakatasi a lakau o fili se tupu mō latou. Ne fai atu latou ki te olive, ‘A koe ko te motou tupu.’

9Kae ne tali mai te olive, ‘Kafai ko tau au o pule i a koutou, ko tau la mo au o se toe avatu toku sinu, tela e fai mo mea e fakaaloalogina ei a atua mo tagata.’

10Tena ne fai atu ei a lakau ki te mati penei, ‘Vau ke fai koe mo tupu o matou.’

11Kae ne tali mai te mati penei, ‘Kafai ko tau au o fai mo pule o koutou, ko se toe tau la mo au o toe fua mai oku fuaga magalo.’

12Tena, ne toe fai atu a lakau ki te vine, ‘Vau ke fai koe mo omotou tupu.’

13Kae ne tali atu te vine penei, ‘Kafai ko tau au o pule i a koutou, ko tau la mo au o se toetuku mai toku uaina, tela e fakafiafia ei a atua mo tagata.’

14Tena, ne toe fai atu a lakau ki te lakau talatala penei, ‘Vau ke fai koe mo omotou tupu.’

15Ne tali atu te lakau talatala penei, ‘Kafai e manako eiloa koutou ke fai au mo otou tupu, o'mai la o faka'malu i toku malūga. Kafai e se mai koutou, ko te afi ka oso atu mai oku kaula talatala o sunu katoa a alasi o Lepanona.’

16Muna a Iotama, “i te faiga ne koutou a Apimeleko mo tupu, mata ne fai ne koutou mo otou loto tonu? E a, mata ne fakaava koutou ki a Kitiona, o fai faka'lei tena kaiga, e tusa mo ana mea ne fai mō koutou?

17Masaua i toku tamana ne taua mo koutou. Ne tuku tena ola o fakasao koutou mai tino Mitiana.

18Kae i te aso nei, koutou ko olo o ta a te kaiga o toku tamana. Ne tamate ne koutou ana tama tagata e tinofitu i luga i te fatu e tasi. Kae nei ko fai ne koutou a Apimeleko, te tama a tena tavini fafine, mo tupu o koutou i Sekema, me e kaiga mo koutou.

19Kae nei, kafai te mea ne fai ne koutou ki a Kitiona mo tena kaiga i te aso nei, ne fai mō otou loto tonu, taumafai la ke fiafia koutou ki a Apimeleko, kae ke fiafia foki a ia ki a koutou.

20Kae kafai e seki fai ne koutou mo otou loto tonu, ke vau la te afi mai i a Apimeleko o sunu a tagata o Sekema mo Petamilo. Ke vau foki te afi mai tagata o Sekema mo Petamilo o sunu a Apimeleko.”

21Tena, ko Iotama eiloa ko tele o nofo i Peli, i a ia e mataku i tena taina ko Apimeleko.

22Ne pule ne Apimeleko a Isalaelu i tausaga e tolu.

23Tena, ne fai ei ne te Atua a Apimeleko mo tagata Sekema ke fai fili, tena ne teke atu ei latou ki a Apimeleko.

24Ne fai te mea tena, ko te mea ke fakasala ei a Apimeleko mo tagata Sekema kola ne fakamalosi ne latou a Apimeleko ke tamate a tamaliki tagata a Kitiona kola e tinofitu.

25Ne uga ne tino Sekema a olotou tagata ke olo o muni i luga i mauga o alamati a Apimeleko, kae ne ta kae fao ne latou a mea a tino kola ne ui atu i te koga e muni ei latou. Ka ko Apimeleko ne logo i te mea tena.

26Tena, ne vau ei a Kaala, te tama tagata a Epeto ki a Sekema mo ona taina, tena ne kau atu ei ki a ia a tagata o Sekema.

27Ne olo atu latou ki olotou togavine, o tau mai a vine, o faite ne uaina, tena fai ei se kaiga fiafia a latou. Ne olo atu latou ki loto i te faletapu o te olotou atua, o kai kae inu i ei, kae faipati ki pati se 'lei e uiga mo Apimeleko.

28Muna a Kaala, “Ne tagata pefea a matou konei i Sekema? Ai a e tavini ei matou ki a Apimeleko? Ko oi a ia? Ko te tama a Kitiona! A Sepula e fakalogo foki ki ana fakatonuga, kae ai a ka sona tavini fua ei tatou ki a ia? Masaua o fakamaoni ki te otou tupuga ko Hamola, tela ne mafua mai ei koutou!

29Aku muna eiloa i au e takitaki i tino konei, ke kau tagina a Apimeleko, kae ke fai au ki ei penei, ‘Fakatoka tau kautau, kae vau ke taua tatou!’ ”

30Ne kaitaua Sepula, te takitaki o te fa'kai, i pati a Kaala

31Tena, uga ei ne ia a avefekau ki a Apimeleko i Aluma mo te fekau tenei, “A Kaala, te tama tagata a Epeto, mo ona taina, konei i Sekema, kae ko se talia ne latou a koe ke ulu mai ki loto i te fa'kai.

32Nei, olo koutou mo tau kau i te po, o muni i te vao.

33Ala fakavave koutou i te vaveao o taua ki te fa'kai. Kae kafai ko olo atu a te kau a Kaala o fakafetaui koutou, fakapalele eiloa otou malosi o taua ki a latou!”

34Tena, ne olo atu ei a Apimeleko mo tena kau i te po o muni i tua o Sekema i potukau e fa.

35I te mateaga ne Apimeleko mo tena kau a Kaala ko fanatu o tu i te mataloa o te fa'kai, tena ne 'tu aka ei latou mai olotou koga muni.

36Ne matea latou ne Kaala tela ne fai atu ei ki a Sepula penei, “Kiloke! E isi ne tagata kona e o'mai mai luga i mauga!”

Ne tali atu Sepula, “A mea kona e se ne tagata, ne ata fua i luga i te mauga.”

37Ne toe fai atu a Kaala penei, “Kiloke! A tagata kona e olo ifo i te ulu o te mauga, ka ko te sua potukau kona e olo ifo i te auala mai i te lakau ko te oka o tino fakamatala mea tupu!”

38Tena ne fai atu ei a Sepula ki a Kaala penei, “Ko fea au pati lasi ne fai? Ko koe tena ne fesili mai sale me ai a e tavini ei matou ki a Apimeleko. Kona a tagata si muna masei sale koe ki ei. Fanatu la ki tua ke taua koutou.”

39Ne taki atu ne Kaala a tagata o Sekema ki tua mo te fa'kai o taua mo Apimeleko.

40Ne tele a Kaala kae afuli ne Apimeleko. E tokouke eiloa ne pakia, pela foki i tafa o te mataloa o te fa'kai.

41Ne nofo a Apimeleko i Aluma, ka ko Kaala mo ona taina ne afuli keatea ne Sepula mai Sekema, tena ko se nofo ei latou i kona.

42I te sua aso, ne logo a Apimeleko i tino o Sekema e mafaufau o olo ki olotou fatoaga,

43tena ne vaevae ei ne ia tena kau ki potukau e tolu, kae muni i fatoaga o fakatalitali ki tino Sekema. I te mateaga ne ia a tino ko o'mai ki tua mo te fa'kai, ne olo atu ei latou o tamate a tino Sekema.

44I te taimi ne olo atu ei a Apimeleko mo tena potukau o pono te mataloa o te fa'kai, ka ko te sua ava potukau a ia e ta valevale a tino Sekema i fatoaga.

45Ne fai eiloa te taua tena i te aso katoa. Ne fakatakavale ne Apimeleko a te fa'kai, tamate katoa a tino i ei, ofa ne ia ki lalo, kae ufi te laukele tena ki masima.

46I te logoga a takitaki i te olo i Sekema i te mea tena, ne tele ei latou o faka'lafi i te potu malosi i te faletapu o Paala o te Feagaiga.

47Ne logo a Apimeleko me kola e maopoopo katoa i kona,

48tena ne fano ei a ia ki luga i te Mauga o Salemona mo tena kau. I kona ne kati ne ia te kaula o te lakau ki te taku, kae tuku ki tena tuauma. Ne fai atu a ia ki tena kau ke fakavave o fakaakoako atu ki a ia.

49Tena, ne tofu tena kau mo te kaula, tau'tali atu ei latou i a Apimeleko o olo o fakaputu i mua o te potu malosi tena. Ne sunu ne latou a mea kona, tena mate valevale ei a tino i loto i te potu malosi tena, e tusa mo te afe tagata mo fafine.

50Ne fanatu foki a Apimeleko mai kona o nikoi a te fa'kai o Tepesa, kae fakatakavale foki ne ia.

51E isi se taoa malosi i kona tela la, ne tele ki ei a tagata katoa mo fafine fakatasi mo takitaki. Ne loka ne latou a mataloa kae olo aka ki te taulu.

52I te vauga o Apimeleko o puke te taoa, ne mua o sunu ne ia a te mataloa o te taoa.

532Samu 11.21 Kae e isi se fafine ne 'pei ifo ne ia se fatu solo saito ki tena ulu, tena ne pakia ei tena ulu.

54Tena ne ka'laga fakavave a ia ki te tamataene tela e pukepuke sale ne ia ana mea tau kae fakatonu atu ki ei penei, “Tapale tau pelu o tamate au. Au se manako ke fano se tala i au ne tamate ne se fafine.” Tena, ne velo a ia ne te tamataene tena, ko ia eiloa ko mate.

55I te laveaga ne tino Isalaelu i a Apimeleko ko mate, tena foki katoa eiloa latou ki koga ne mai ei latou.

56I te faiga tena, ko fakasala ei ne te Atua a Apimeleko e tusa mo tena agasala ki tena tamana, i te tamatega ne ia ona taina kola e tinofitu.

57Ne fakapuapuaga foki ne te Atua a tagata o Sekema e tusa mo amioga masei a latou ne fai, e pela eiloa mo muna a Iotama, te tama a Kitiona, i te taimi ne fetu ei ne ia latou.