TANIELU 4 - Tuvalu Revised Bible

Ko te Lua o Moemiti a Nepukanesa

1E isi se fekau ne avatu ne Nepukanesa ki tino katoa i malo katoa i te lalolagi. E penei tena fekau:

“Talofa koutou!

2Faka'logo mai ki taku tala e uiga ki mea fakaofoofogia mo vavega kola ne fakaasi mai ne te Atua Maluga ki a au.

3“Ko oko eiloa i te gali o mea fakaofoofogia ne fakaasi mai ne te Atua ki a tatou!

Ko oko eiloa te mana o vavega ne fai ne ia!

A te Atua ka fai mo tupu ki te se gata mai;

Ka pule a ia ki te se gata mai.

4“Au se tagata e ola i te olaga gali i toku palesi, kae fiafia i a au e maumea.

5Kae i te taimi e tasi, ne moemiti au, ne lavea ne au a ata fakamataku i te taimi ne moe ei au.

6Ne fai taku fakatonuga ki tino fakatonutonu katoa a te tupu ke o'mai o fakamatala mai te uiga o taku moemiti.

7Ne o'mai katoa a tino poto i fakamatala o mea tupu i aso fakamuli, pela foki tino fakataulaitu, mo tino poto katoa i vaega poto pena, tena, fakamatala atu ei ne au taku moemiti ki a latou, kae se maua ne latou o fakaasi mai tena uiga.

8Tena, kae vau mo Tanielu. Te sua igoa o ia ko Peletisala, se igoa o toku atua e tokotasi. A te agaga o atua malu e i a ia, tena ne fakamatala atu ei ne au taku moemiti ki a ia. Muna a aku penei:

9Peletisala, te pule o tino poto i fakamatalaga o mea tupu i aso fakamuli, e iloa ne au i te agaga o atua malu tena e nofo i a koe, kae e iloa ne koe a mea funa katoa. Tenei taku moemiti ka fakamatala atu, kae taku mai me se a tena uiga.

10“I te taimi ne moe ei au, ne lavea ne au se lakau lasi eiloa i te kogaloto o te lalolagi.

11Ne tupu aka te lakau tena o lasi, oko atu eiloa ki te lagi, kae ko mafai foki o lavea ne tino katoa i te lalolagi.

12A ona lau ko oko eiloa i te gali, ka ko fuaga o ia ko oko eiloa i te uke, kaati e lava eiloa i ei a tino o te lalolagi katoa ma kai i ei. A manu vae fa o te vao e nofonofo i lalo i tena maluga, a manu eva e fai olotou ofaga i ona kaula, ka ko fuaga o ia e kai ne mea ola valevale i te lalolagi.

13“I te taimi koi mafaufau ei au ki te fakaasiga tena ne lavea ne au, kae matea ne au te agelu e vau mai te lagi, e foitino malielie kae matapulapula.

14Ne valo te agelu tena penei, ‘Kati te lakau ki lalo kae sepe keatea ona kaula; katikati ona lau kae laku valevale atu ona fuaga. Afuli atu keatea a manu vae fa kona e faka'malu i ei, pena foki a manu eva kona e fai ofaga i ona kaula.

15Ka ko te tafito ke tuku eiloa ke tu, kae ke sai ki se filifili fiti mo palasi. Tuku i ei ke tu pena fakatasi mo mouku.

“‘Tuku ei a te tagata tena ke to ne te sau, kae ke nofo tasi mo manu mo lakau.

16I tausaga e fitu, a tena mafaufau ka pela eiloa mo te mafaufau o te manu.

17Tena te ikuga a te agelu foitino malielie kae matapulapula. Tela la, ke malamalama tino katoa i te lalolagi, i te Atua Maluga e pule i malo faka‐te‐lalolagi, kae e mafai o tuku atu ne ia latou ke fakatakavale ne so se tino e loto a ia ki ei, ke oko foki eiloa ki te toe tino malalo eiloa.”

18Muna a Nepukanesa, “Tena taku moemiti. Peletisala, taku mai me se a tena uiga. E seai se tino fakatonutonu a aku e mafai o taku mai ne ia te uiga, ko koe fua, me i te agaga o atua malu e nofo i a koe.”

Ko Fakamatala ne Tanielu te Uiga o te Moemiti

19A Tanielu, tela e fakaigoa foki ko Peletisala, ko oko eiloa i te poi ko se iloa ne ia me se a tena pati ka fai. Muna a te tupu ki a ia, “Peletisala, sa poi ona ko te moemiti.”

Muna a Peletisala, “Tou Malu, aku muna eiloa ko te moemiti ke fakauiga ki ou fili kae se ki a koe.

20A te lakau tela e oko tena taulu ki te lagi e mafai o lavea ne tino katoa o te lalolagi.

21A ona lau ko oko eiloa i te gali, ka ko ona fuaga e lava ei a te lalolagi katoa mafai e kai ki ei. A manu vae fa o te vao e takato i tena malūga, ka ko manu eva e fai ofaga i ona kaula.

22“Tou Malu, a koe ko te lakau tena, e maluga kae malosi. A tou igoa ko oko eiloa i te takutakua tela ko oko atu ki te lagi, ka ko tou malosi ko salalau i te lalolagi katoa.

23I te taimi ne kilokilo atu ei Tou Malu, kae vau te agelu mai te lagi kae fai mai penei, ‘Kati keatea te lakau tena kae tuku ei tena tafito i kona. Sai atu se filifili fiti palasi ki ei, kae tuku ei i kona fakatasi mo mouku. Tuku atu ei te tagata tena i kona ke siu i te sau o te po, kae ke nofo tasi mo manu vae fa i kona i tausaga e fitu.’

24“Tou Malu, tenei la te uiga o tau moemiti, ko te mea tela ne folafola ne te Atua Maluga me ka tupu ki a koe.

25A koe ka afuli keatea mai te koga e nofo ei a tino, kae ka nofo tasi koe mo manu. I tausaga e fitu, ka kai koe i mouku e pela mo te pulumakau, kae moe i tafafale kae ka siu faeloa koe i te sau o te po. Kafai ko katoa tausaga kona e fitu kae ka iloa ne koe i te Atua Maluga e pule i malo faka‐te‐lalolagi katoa, kae e mafai foki ne ia o tuku ki so se tino e loto a ia ki ei.

26A agelu ne fakatonu mai ke tuku malie ei a te tafito ke tu i te laukele; ko tena uiga, a koe e toe fai mo tupu i te taimi e talitonu ei koe i te Atua e pule i te lalolagi katoa.

27Tela la, Tou Malu, fakalogo mai ki aku muna fesoasoani; sa toe agasala, fai faeloa te mea tonu kae alofa ki tino ma'tiva, kae ka tumau faeloa tou manuia.”

28A mea katoa kona ne tupu katoa ki a Nepukanesa.

29E sefululua masina fakamuli ifo, i te taimi ne sasale ei a ia i te tuafale o tena palesi i Papelonia,

30kae fai mo ana muna penei, “Kiloke ki te gali o Papelonia! Ne faite ne au ke fai mo laumua o toku malo, e fakaasi ei toku malosi mo toku maluga mo toku takutakua.”

31E seki motu atu ana pati, kae vau mo te leo mai te lagi penei, “Nepukanesa, fakalogo mai ki aku pati konei ka fai atu! A tou malu fakatupu ko ave nei ne au keatea.

32A koe ka afuli keatea mai te koga e nofo ei a tino; ka nofo tasi koe mo manu vae fa o te vao, kae ka kai koe i mouku e pela me se pulumakau i tausaga e fitu. Ka iloa ei ne koe i te Atua Maluga e pule i malo faka‐te‐lalolagi, kae e mafai fua ne ia o tuku ki so se tino e loto a ia ki ei.”

33I kona eiloa, te mea eiloa ko taunu a muna kona mai te lagi. Ne afuli keatea a Nepukanesa mai te koga e nofo ei a tino, kae kai mouku e pela me se pulumakau. Ne to te sau o te po ki tena foitino, ka ko ona laulu ko loa eiloa pela mo fulu o te aeto, ka ko ona ma'nia ko loa eiloa pela mo mania o se manu eva.

Ko Tavae ne Nepukanesa a te Atua

34Muna a te tupu, “I te katoaga o te fitu tausaga, ne kilo oku mata ki te lagi, ko au eiloa ko se fakavalevale. Ne viki au ki te Atua Maluga kae fakaaloalo ne au a ia tela e ola ki te se gata mai.

“Ka pule a ia ki te se gata mai,

Ka ko tena malo ka tumau ki te se gata mai.

35A tino o te lalolagi e pela me ne leai i a ia;

A agelu o te lagi mo tino o te lalolagi e i lalo o tena pulega.

E seai se tino e mafai o teke ki tena loto,

Io me sukesuke ki ana mea e fai.

36“I te taimi ne lei ei toku fakavalevale, tena kae toe fakafoki mai ne ia ki a au toku malu mo te takutakua o toku malo. Ne talia fakalei au ne aku ofisa mo tino maluga, kae ne toe fakafoki mai ki a au toku malosi faka tupu, kae ko silia atu i te taimi muamua.

37“Tela la, ko au ko Nepukanesa, ko viki kae fakaaloalo ne au a te Tupu o te lagi. A mea katoa e fai ne ia e tonu katoa, kae e mafai fua ne ia o fakamalalo so se tino e uiga fakamatamata.”